نۋیستەی: ئاکۆ مارانی
11و ئەپڕیلو 2017
ۋەرینە
وەنەرې بەڕێزې، ئانە کە دلې ئی پەڕچنڵەینە من پېسەو پېشنېیارکەرڎەی کۊمەڵېۋ بابەتا ۋەرو چەماو شمەی ئازیزیش ۋزۇ، بەس ۋیرلەو من بېیەن و ھەن، پەیۋەڼیش بە ھیچ کەس و لایەنېۋی تەریۆ نېیا؛ من پېسەو کەسېۋی ئازاڎیوازی و سەربەوې بە نۋیستەی و ئاماڎەکەرڎەی ئی ھەنگامە سەرەتاییا ھۊرزتەنا. وەڵامدەرو ھەر ڕەخنېۋې و ھەر سەرنجېۋو شمەی ئازیزی، ھەر من وېم ھەنا و بە پەیلۋاو من ھیچ ۋیر و پېشنېیارېۋە و نۋیستېۋ چە کەموکوڕی بېیەش نېیا، مەتاۋۊ لاو سەری ڕەخنەیۆ بۊ و مافو گرڎ کەسېۋی و گرڎ وەنەرېۋی ھەن، کە ئازاڎانە ڕەخنې و سەرنجې وېش ئاراستەو بابەتەکا ئی پەڕچنڵەیە کەرۊ و چا بارۆ من وېم بە سپاسگوزارو ھەر کەسېۋی مزانۇ، کە ڕەخنې و سەرنجې وېش چە بارەشۆ بنۋیسۇ و ۋەڵاکەرۊۋە. ھەر پاسە سەرو ئا بنەمێ کە قسەکەرڎەی چە بارەو ڕاۋەبەریی ھەر کۊمەڵېۋې مافو گرڎ کەسیۋی ھەن، منیچ ئا مافەیە بە وېم مڎەۇ و ئی بابەتا بنۋیسۇ و بە شمەی ئازیزیشا پېشکەشې کەرۇ.
ھەڵبەتە پەنەۋاز کەرۊ، ۋەڵې گرڎ چېۋېۋینە بە شمەی بەڕێزی ۋاچۇ، کە من نە پلە و پایەی ئەکادێمیستی ھەن و نە گەرەکیچم ھەن، نامې و نامبانگ پەی وېم تاشۊ، یان وېم بە (ژیرلەو مەرې) بنیەوەرە. ئانە کە ھەن و من چە بارەش کۊشش کەرۇ، ئارەزۇمەڼیېۋی وېڕسو سەردەمو زاڕۊڵەی وېم و دماتەر ھەژمۇنو وەشەۋیسیی تاتەو من پەی زۋانی ئەڎایی وېش (زۋانی ھۆرامی) و سرۇشتو ناوچەو ھۆرامانی بېیەن، کە ئاڎ بە بەھەشتو سەرزەمینی نامېش بەرې، ئانە منش پەی گرنگیدای بە زۋانی ئەڎایی و کولتۇرئەژناسی و شیکاری سەرو پەیۋەڼییە کۊمەڵایەتییەکاو خەڵکو ھۆرامانی ھاندانا. ھەر چېرو ئا ھەژمۇنەینە و بەپاو وې-فېرکەرڎەی و ئەزمۇنگەریی وېم تاۋانم سەرەکېشۇ قۇڵایی گەرڎۇنو زۋانی ھۆرامی و ھەر ئانەیچە منش پەی ۋیرۆکەرڎەی سەرکەشانەی ھاندانا و ھەم فېرشکەرڎەنا قسەکەرڎەو وېم ڕێکۋزۇ و ھەم بنەما ڕازۋانییەکا زۋانی ئەڎایی وېم بېزۇۋە.
بەڕێزا، پاسە ۋاتم ئی نۋیستە یان کۊمەڵە مانیفێستې نە نۋیستەی پیرۊزې ھەنې و نە زاڎەو ھۊشی باڵای، بەڵکو ۋەرەنجامو ئەزمۇنگەریی و ئەزمۇنگیرتەو من ھەنې، کە چە ماۋەو سی و شش ساڵی ۋېیەرڎەینە و چېرو ھەژمۇن-ئەرەنیاو کەتواری و نەھەماتی و ئەزمۇنگەری سەرو ھۊشو من، ئی ۋیرلې چە ئاۋەزو منەنە سەرشاھۊردان و بە ئی ئاستە یاۋێنی و دماجار منشا بە ئەۋەنۋیستەو وېشا ناچارکەرڎەنا، ھومېڎواز ھەنا چی کۊششەنە سەرکۆتە بېیەبۊ یان بۊ.
چی بارۆ ھومېڎواز ھەنا، ئی نۋیستە بەھاو ئا کاتەیشە بۊ، کە شمەی بەڕێز پەی ئەۋەوەنەی و لەیەکۆدایش تەرخانتاکەرڎەن، بە ھومېڎو ئانەی چە کەموکوڕییەکاش چەمپۊشی ن ەکەرڎې.
ئاکۊ مارانی 11و ئەپڕیلو 2017
------------------------------------
وەنەرې بەڕێزی، پەی ئەژناسای پیتە تایبەتە ھۆرامییەکا دلې ئی نۋیستەیە، سەرو لینکو پیتەکا کلیک کەردې:
- ڎ: ئەڎا: دەنگ https://t.me/Ferhengu.Zvani.Horami/6322
- ۋ: ۋاران: دەنگ https://t.me/Ferhengu.Zvani.Horami/6328
- ڼ: مەڼ: دەنگ https://t.me/Ferhengu.Zvani.Horami/6324
- ۊ: لۊ: دەنگ https://t.me/Ferhengu.Zvani.Horami/6326
- ې ې: دەنگ https://t.me/Ferhengu.Zvani.Horami/6330
- ﯗ = و: مۇ
لینکو گرڎو پیتەکا ئەلفابێتی ھۆرامی
https://t.me/Ferhengu.Zvani.Horami/7588
[1]