نامۍ: شێخ عومەر
نازنام: زیائەدین
نامۍ تاتەی: شێخ عوسمان سیراجەدین
ساڵەو ئامای دنیای: 1839
یاگۍ ئامای دنیا: بیارۍ - هۆرامان
ساڵەوکوچی دمایی: 1900
یاگۍ کوچی دمایی: بیارۍ- هۆرامان
$ژیواینامە$
شېخ عومەرو بیارۍ وەردەسو ماموسا مەڵڵا مەحموڎی دشەیینە قورئانی موبارەکش وانان و تەمامنان، کتېبەکانو نەحو سەرفش تەمامنێنۍ و خزمەتو تاتەیشەنە تەمەسوکش کەردەن و تەریقەتش وەرگېرتەن. دمای دوۍ ساڵا تەشریفش بەردەن پەی(بیارۍ) و جە مزگی بیارېنە خەریکو ئیرشادی بیەن. شېخ عومەر جە گەشتێنە پەی ناوچەو گەرمیانی چن خانەقێش وەشکەردېنۍ جە گەرمیان و خانەقین و کفری، بە نیازو خزمەت بە دینی و تەریقەتی. دمای سەفەرەکەیش گېڵانۆ پەی بیارۍ و چاگەیچ خانەقاو بیارېش جە ساڵەو(1889ز) وەشکەردەن و بیەن بە میانێ دینی و ئەدەبی و مەعریفی کە دماتەر بە ئەزهەرو کوردستانی ئەژناسیان. شېخ عومەر(خەت وەش و نویسەرو ئەدیب) بیەن، شېعرېش بە زوانەکان و عەرەبی و فارسی و کوردی(هۆرامی و سورانی) بیېنی، نازنامی شېعریش(فەوزی) بیەن.
قیبلەم وەردەنم، قیبلەم وەردەنم
چەوساوە ژاراو دووریت وەردەنم
چەنی دڵ و گیان شەرتێ کەردەنم
مەیل نەڎەو بە کەس تا ڕۊی مەردەنم
دڵ یەند مەینەتان موسیبەت کېشان
تای تامڵ ئازیز، جە دەستش بڕیان
پای سەبرش هاڵا شکست ئاوەردەن
پەوکە شەو تا ڕۊ ویردش ئەی فەردەن:
(فەلەک داخ وە دڵ جەستەمدا بەردی
ژاراو دووری ئازیز پېم وەردی).
جە پارچە شېعرێتەرەنە شېخ عومەر زیائەدین فەرماۊو:
قیبلەم ها بەردم، قیبلەم ها بەردم
داخ دووری تۊ، وە گڵکۊ بەردم
وە مەیلی تۊوە، ڕوو وە چۊڵ کەدم
ژار دووری دەرد هیجران گرد وەردم
یانۍ ئازیزم عەشق تۊم نە سەر
وە عەشق تۊوە ها شیم وە مەحشەر
تۊ بۊ بەو وەفاو مەیلی وەرینت
بنمانە جار جار وە من جەمینت
بنمانە قامەت وەی زامەت وەردە
پەرێ ئەو قامەت داخ وە گڵ بەردە
تا جەو ڕۊ دەم دەم وە بۍ مودارا
(قەد قامەت) واچوون هەر سات نەو سارا
چوونکە زیکر تۊن مایەی حەیاتم
وەشی و شادی و شەوق مایەی نیشاتم
جەو مەماتەدا با تۊم جە یاد بۊ
جەو عالەمەدا دڵ وە تۊ شاد بۊ.
خانەقاکۍ شېخ عومەرو بیارۍ پەناگێ بیېنۍ پەی خەڵکی غەوارەی، سەرەڕاو دەرس وانای و زیکرو فیکری چەنی مېمانا جمەش ئامان. میرزا ئۆلقاڎرو پاوەیی ئەپېسە ماچۊ:
یا جای غەریبان تورک و هیند و چین
یا سەلاحەت خوای بەین موسلمین
یا مەئزوون خاس جە کارخانەی حەق
یا ڕەد ئافەت قەزای موعەللەق
یا سامع جە سەوت زکر ئەشجاران
یا وەحشی پەروەر نە پای موغاران
یا بۍ مەرتەبان وە ڕوتبە یاوان
یا جەرگەی ناپاک حاسدان تاوان
یا دەست قودرەت پادشای ئەکبەر
هانا هەر وە تۊن هانا یا عومەر. [1][2]