نامۍ: عەبدوڵڵا
نازنام: شېخ عەبدوڵڵاو خەرپانی
ساڵەو پېڎابیەی: 1742ز
یاگۍ پېڎابیەی: خەرپانی - هۆرامان
ساڵەو کوجی دمایی: 1838ز
یاگۍ کوچی دمایی: خەرپانی - هۆرامان
$ژیواینامە$
شېخ عەبدوڵڵاو خەرپانی کوڕو شېخ ئیسماعیل، کوڕو شېخ محەمەد کوسەین. تاتەش جە دەگاو خەرپانینە خەریکو دەرس واتەیۆ بیەن. شېخ عەبدوڵڵا وەردەسو تاتەیشەنە جە خەرپانی زانستە شەرعی و دینیەکېش وانێنۍ، پەی زیاتەر ئاشنابیەی فرەو یاگەکا کوردەواری(کەرکووک، هەولېر، خوشناوەتی،...هتر) گېڵان و زانستش وەرگېرتەن و یاوان بە پلەو(یاوانەی و یاوای پەنەی)، (تێگەیشتن و پێگەیشتن). پاشاو بابانی فرە چەمداریش کەردەن، پەی ئانەی زیندەگېش ڕاگیرنەبۊن جە وانای و تەدریسی، جە باخەکا خەرپانی و بیارۍ و تەوېڵۍ، باخ و موڵکش پەنە بەخشان.
مەشهوورا یۊ جە سانەکا هۆرامانی گەرەکش بېیەن بە فېڵۍ و حیلە باخەکا خەرپانی و دەرەو تەۋېڵۍ چېرو دەسو شېخ عەبدوڵڵاینە بەربارۊ، بەڵام چا وەختەنە مەڵڵا جەلالو خورماڵی کە دۊسێ نزیکو شېخ عەبدوڵڵای بېیەن پی دېڕە شېعرۍ هاگاڎارش کەرۊوە:
از بهر تست مخصوص خرپانی و طویلە
آگاە باش نستانندت بە مکر و حیلە
شېخ عەبدوڵڵاو خەرپانی زیاتەر جە(70) ساڵۍ تەمەنیش خەریکو دەرس واتەیۆ بیەن. شېخ عەبدوڵڵاوخەرپانی چەنی (مەڵڵا جەلال و خورماڵی و مەڵڵا ئیبراهیم و بیارۍ) چا سەردەمەنە یەرۍ چراوۍ ڕۊشنۍ زانستەکا(بەلاغەو فیقهو ئوسوڵ و فیقهی و ئوسوڵو کەلامی) بیېنۍ. مەولانا حالیدی نەقشبەندی وەردەسو ئا یەرە زانا نامدارانە دەرسش وانان. شېخ حەسەن و گڵەزەردەی هامچەرخ و مەڵڵا عەبدوڵڵایەن. چوار موستەعیدی خزمەتو شېخ عبدوڵڵاو خەرپانینە بیېنۍ(مەڵڵا یوسفی تەشاری، مەڵڵا یاسینی تەوېڵەیی، مەڵڵا موحەمەد و زەهاوی، کە دماتەر بیەن بە موفتی عیراقی و بە موفتی زەهاوی ئەشناسیان، مەڵڵا خدری نالی شاعېر). بە مەڵامەت و بەرزی پایەو شېخ عەبدوڵڵای و شارەزاییش جە دین و دنیێ، شېخ عوسمان سیراجەدین دوۍ کناچۍ وېش دێنۍ بە دوۍ کوڕا شېخ عەبدوڵڵای. دمای تەمەنێ پەڕ بەرەکەتی، ساڵەو(1838ز) کوچی دماییش کەردەن و جە گوڕستان و خەرپانی ئەسپەردە کریان.
شېخ موحەمەد کوڕو شېخ عەبدوڵڵای دمای مەردەی تاتەیش بە چن شېعرێ لاونانشۆ و ماچۊن:
بۍ شەریک و زات، واحیدی موتڵەق
نییەن کەسێ تەر، مەعبوود بۊ بە حەق
حەیوان و نەبات، چەنی جەمادات
تەحتە ئەمرتەن، تا حەفت تەبەقات
جە هەنگام چاشت جە ڕوژی بیستەم
ماهی ڕەجەب بۍ، شېخی موعەززەم
عیزرائیل تەشریف ئاوەرد وە باڵین
قەبز ڕوحش کەرد بە ئەمری موبین
تەئریخ جە هەزار دووسەدو پەنجا
هەم چار ساڵ ویەرد شېخ کەردش وەفا
جە (دار المحنە) پەی (دار الرحمە)
ڕوحش کیانا بە ماوای جەڼە
بە شوغل تەدریش چل ساڵ، بەل فېشتەر
ڕۊ بە ڕۊ شەوقش مەبی زیاتەر
یا شېخ چەوساوە تەشریفت بەردەن
جە سنەو بەغداد تەحسیلم کەردەن
هەم جە سابڵاخ، جە شەهر کەرکووک
پەرێ کەسب عیلم بیەنان مەهتووک
هیچ کەسم نەدیەن چوون تۊ موفید بۊ
وېنەی تۊ شەوقش جە سەر تەدریس بۊ
هەرچن مەگېڵوو پېسەو تۊ کەسێ
بگنۊ بە دەسم، نییەن هیچ کەسێ
کوتوبخانەکەت ها چاگە کەوتەن
یە شوومی منەن، بەدبەختی بەختەن
خودا شادکەروۊ ڕوحت بە جەڼەت
ئېمەیچ سا کەمێ هەم مەبۊ قسمەت.[1]