نامۍ: عەبدوڵڵا
نازنام: عەبدوڵڵا بەگ
نامۍ تاتەی: حەمە شەفیع بەگ
ساڵەو ئامای دنیای: 1881
یاگۍ ئامای دنیای: #هۆرامانی تەخت#
ساڵەو کۊچی دمایی: 1944
یاگۍ کۊچی دمایی: هۆرامانی تەخت
$ژیواینامە$
عەبدوڵڵا بەگ شاعیری نیشتیمان پەروەر، میللەت دۊس، عاشق و کەش و کۊ هۆرامانی. جە نەوەو بەگزاڎەکاو هۆرامانیەن کە مەگېڵاوە سەرو (هەسەن سانو هۆرامانی). ئاڎ جە شارو هۆرامانی تەختی جە ئەڎێ بیەن، بە زارۊڵەیی فېرو خوڼەواریشان کەردەن، چونکوم تاتەش دارا بیەن، میرزای خاسش پەی گېرتەن پەی فېرکەردەی و وانای، مامۊساکەیش شارەزاو ئەدەبی فارسی و جوان نویسی کەردەن. دماتەر لوان پەی شاروو (سنەی)، چاگە جە حوجرەنە فیقهی ئیسلامیش وانان و گېڵانۆ پەی زېدو وېش.
عەبدوڵڵا بەگ بارەقەڵڵای ڕۊشنویری و ئەدەب دۊسیش، خاوەن بەهرێ شاعېرانەی زەریف، گیانو وەرگیری و موقاوەمەی دلۍ مەژگ و دەروونیشەنە چەکەرەش کەردەن، ئاڎ سەرەتاو خېزیای ئاوەزیش هەسش بە زوڵم و زورداری فەرماندارە ئېرانیەکا کەردەن، دەسەڵاتی شاهەنشاهی و ڕەزا شای پەهلەوی ئیستبدادو زورداریشان پەی خەفەکەردەی گیانی نیشتیمان پەروەری خەڵکو هۆرامانی و کوردەسانی، مەڵامەت بیەن پەی ئەنگېزیای شۊڕشی دلۍ میللەتو هۆرامانینەو تەمامو کوردەوارینە. عەبدوڵڵا بەگ وەرچەمو ئا شوڕشەیە بیەن وەراوەرو زوڵمو ناحەقیاوە، ئاقیبەت عەبدوڵڵا بەگ و ڕەفېقەکېش ساڵەو(1931ز) کە تەمەنش(51) ساڵی بیەن، بە فەرمانو(ڕەزاشا)ی بە تۊمەتو ئازاڎیوازی پەی ماوەو(10) دە ساڵا چەنی هامویرەکاش جە (زیڼانو ئەسفەهان)ی زیڼانی کریان.
زیڼان گیانی وەرگیری و خەباتی نەتەوەییش جە دڵ و دەروونو عەبدوڵڵا بەگینە زیاتەر جۊش دان، حەتتا ساتو وەرمیچەنە جە شیرین وەرمەنە گەشتش پەی هۆرامانی کەردەن و لوان دیڎارو قەومو خوېشی و بە ڕۊح گوزەرش کەش و کۊ ڕەنگینەکاو هۆرامانیرە کەردەن، جە بېڎارینە گوزەرو دلۍ وەرمەکاش جە چوارچېوەو شېعرێنە نەخشنان، کەردەنش سەوقاتی پەی هۆرامانی و خەڵکەکەیش
یاران هامسەران ئېشەو خاوێ دیم
جە زیندان تار عەجەب خاوێ دیم
ئازادی وەتەن هەورامانم دی
ئېڵاخان چۊڵ، کۊساڵانم دی
وەنەوشەی وەش بۊ چنوور جە هەردان
ئامانە خاوم پەی بارو دەردان
ڕېحان پەلش دېز، شەسپەڕ جە باخان
سوسەن و نەسرین شەوبوی ئېلاخان
بەرزەڵنگ جە کۊ، چنوور جە کاوان
سەوزی و مېرغوزار، هاڕەی وەرواوان
چەنی هامسەران نیشتەبېم وە شاد
بە کەیف و ئاهەنگ خەم مەدام وە باد
گۊش بە سەدای ساز، چەم بە نیگاوە
جە (قاوەخانەی) ڕای کەماڵاوە
لېو بە پیاڵەی عەقیق ڕەنگەوە
گاهێ پەڕ بە شەوق، گاهێ خەندەوە
جەی عەیش و نیشات، جەی خەوی بەتاڵ
زیڼانم ئەسڵەن نامان وە خەیاڵ
دمای ئازادڎ بیەیش جە زیڼانو ئەسفەهانی، بەردەوام بیەن جە خەبات و شوڕشی، هەتا جە ساڵەو(1944ز) بە دەسو سوپاو ڕەزاشاو پەهلەوی شەهید کریان و گیانش کەردەن سەوقاتی پەی هۆرامانی و خەڵکەکەیش، تەرمەکەش جە(هۆرامانی تەخت) بە خاک ئەسپاریان.[1]