نووسینی: عەبدولجەبار قەرەداغی
پێغەمبەری خوا ڕۆژێکیان لەکاتی چیشتەنگاودا باسی (دجال)ی بۆ کردین، کە لە ئاخر زەماندا پەیدا دەبێت، بە شێوەیەک باسی دەکرد کە دەنگی تێدا نزم، بەرز دەکردەوە، بۆیە وا گومانمان برد کە لە نێوان ڕیزی دار خورماکاندا خۆی حەشار دابێت، جا کاتێک لە ئێوارەدا گوێمان لێ گرتبوو، چووینە قووڵایی فەرمودەکانییەوە، هەستی پێ کردین، کە هێندە ئالودەی باسەکەی بوین.. بۆیە لێی پرسین:
(ئەوە چیتانە؟) وتمان: (ئەی پێغەمبەری خودا، لەکاتی چێشتەنگاودا باسی (دجال)مان بە شێوەیەک بۆ دەکەیت، دەنگی خۆتی تێدا بەرزء نزم دەکەیتەوە، تا وای لێهات وامان دەزانی کە هەر ئێستا (دجال) پەیدا بووە، لەناو دار خورماکاندایە).. ئینجا پێغەمبەر فەرمووی: (من لە غەیری (دجال) مەترسی تر لەسەر ئێوە شک دەبەم، خۆ ئەگەر ئەو لە سەردەمێکدا پەیدا ببێت کە من لە ناوتاندا مابم، ئەوا من بە بێ ئێوەیش بەرەنگاری دەبمەوەو چاری دەکەمو دژایەتی دەکەم. خۆ ئەگەر لە سەردەمێکدا پەیدا ببێت، من لە ناوتاندا نەمابم، ئەوا هەر کەسەو بە تواناو بەرگری خۆی بەرەنگاری دەبێتەوە، سەرەڕای ئەمەیش خوای گەورە بۆ خۆی لە پاش من سەرۆکاری هەموو موسڵمانان لە باتی من دەکات.
بزانن کە (دجال) لە هەڕەتی لاوێتی و گەنجیدایەو موو کرژی سەر ئاڵۆسکاوییەو چاوی بە قووڵدا چووەو تروسکە ناکات لەبەر چاوی من لە (عبدالعزی ی کوڕی قگن) دەچێت، واتە (لەو پیاوەی کە هەموو هاوەڵان دەیناسن) جا هەر کەسێک لە ئێوە لەو زەمانەدا پێی گەیشت با دە ئایەتەکەی سەرەتای سوورەتی (الکهف)ی لە بەرامبەردا بخوێنێت. هەروەها ئەم (دجال)ە لە ڕێگەیەکەوە کە دەکەوێتە نێوان شام و عێراقەوە پەیدا دەبێت بۆ گیانی ئێوە، ئیتر بە ڕاست و چەپدا خراپە و تاوان و فەسادی بڵاو دەکاتەوە.. دە ئەی بەندەکانی خوا ئێوەیش لەو ڕۆژەدا جێگیر و دامەزراو بن لەسەر ئیمان و باوەڕەکەتان). ئێمەیش وتمان: (ئەی پێغەمبەری خودا، ئایا (دجال) چەندە لەسەر زەویدا دەمێنێتەوە؟) فەرمووی: (چل ڕۆژ دەمێنێتەوە، بەڵام ڕۆژێک لەو چل ڕۆژە بە ئەندازەی ساڵێکەو ڕۆژێکی تریشیان بە ئەندازەی مانگێکەو ڕۆژی سێیەمیش بە ئەندازەی هەفتەیەکەو ئیتر پاشماوەی ڕۆژەکانی تری کە (37) ڕۆژە وەک ماوەی ڕۆژەکانی ئێوە وایەو ڕۆژانی ئاسایین، واتە (هەر چل ڕۆژەکەی (دجال) لە ماوەی ساڵێک و مانگێک و هەفتەیەک و سی و حەوت ڕۆژی ئێوەدایە).. ئێمەیش وتمان: (ئەی پێغەمبەری خوا ، ئایا ئەو ڕۆژانەی کە لە ماوەی ساڵێک و مانگێک و هەفتەیەکی ئێمەدایە، بە ئەندازەی ماوەی ڕۆژێکی خۆمان نوێژی تێدا بکەین؟) فەرمووی: (نەخێر، بەڵکو بە قەدەر ماوەی ئەو زەمانە حەقی خۆیی پێ بدەنو نوێژەکان لە کاتە ڕاستەکانی خۆیدا بکەن و بە ئەندازەی خۆی ئەندازەی بگرن).. پاشان وتمان: (ئەی پێغەمبەری خودا، خێرایی و سستی ڕۆیشتن و گەڕانی (دجال) بە ناو خەڵکیدا چۆنە؟). لە وەڵامدا فەرمووی: (خێرایی ڕۆیشتنەکەی وەک ئەو بارانەیە کە بای بە دوادا دێت و بە باوە دەبارێت.. ئینجا بەناو خەڵکەکەدا دەگەڕێت و بانگەوازیان دەکات بۆ ڕێگەی خۆی.. خەڵکەکەیش باوەڕی پێ دێنن و بەدەم بانگەوازەکەیەوە دەچن، هەروەها (دجال) فەرمان بە ئاسمان دەکاتو ئاسمانیش (بێگومان بە خواستی خودا) باران دەبارێنێت، ئیتر ئاژەڵەکانیان هێندە تێر ئاو و تێر لەوەڕ دەبن، کە شیرێکی یەکجار زۆریان دەبێتو گوانەکانیشیان پڕ پڕ دەبێتو تەنیشتەکانی جەستەیان قەڵەو دەبێت.. پاشان (دجال) دێتە لای کۆمەڵێکی تر کە ئیماندارن و دەیەوێت بە خودای بزانن، بەرپەرچی وتەکانی دەدەنەوە، ئەویش لێیان زویر دەبێت، کەچی لە پاش ئەو دەکەونە سەغڵەتی و قات و قڕی و گرانییەکی وەهاوە کە هیچ ماڵ و سامانیان بە دەستەوە نامێنێت.. پاشان (دجال) بەلای کەلاوەیەکدا تێپەڕ دەبێت و پێی دەڵێت:
گەنجینە حەشار دراوەکانتم بۆ دەربکە.. ئەویش بە گوێی دەکات، گەنجینەکانیش هێندە زۆرن کە وەک پوورەی هەنگ چۆن شوێنی شاکەیان دەکەون، ئەویش ئاوا شوێنی ئەو دەکەوێت. لە دواییدا (دجال) پیاوێکی گەنجی ڕێک و پێک بانگ دەکات و قەممەیەکی لێ دەدات و دەیکات بە دوو کەرتەوە بە ئەندازەی تیر هاوێژێک دوو لەتەکەی لە یەکتر دوور دەکەونەوە.. پاشان بانگی دەکاتو زیندوو دەبێتەوەو ڕووی تێ دەکاتو بە ڕووی گەشو شادییەوە پێدەکەنێت.. جا کاتێک (دجال) بەم جۆرەیەو لەم حاڵەتەدایە لەسەر فڕ و فێڵی خۆی، لە ناکاو خودای گەورە (عیسی ی کوڕی مەریەم) دەنێرێتە خوارەوە، لە خۆرهەڵاتی شاری (دمشق) لای منارە سپییەکە، لە نێوان دوو بەرگی بە زەعفەران زەرد کراو یان دوو بەرگی لەتکراو، دادەبەزێتە خوارەوە، هەردوو لەپی دەستی خستۆتە سەر باڵەکانی دوو فریشتە، ئەوەندە پاک و خاوێنە دەڵێی تازە لە گەرماو خۆی شۆردوە، کاتێک سەری دادەنەوێنێت ئاوی لێ دەتکێت، کاتێک سەریشی بەرز دەکاتەوە وەک بەردە درەوشاوە و مروارییەکان وایە، ئیتر لەو کاتەدا هەر کافرێک بۆنی هەناسەی بکات، کوت و پڕ دەمرێت، تا چاویشی بڕ بکات بۆنی هەناسەی دەڕوات..
ئینجا (عیسی) بە دوای (دجال)دا دەگەڕێتو لە لای (باب اللّد) دەیبینێتو دەیکوژێت، پاشان (عیسی ی کوڕی مەریەم) دەگاتە لای کۆمەڵێک کە ئیماندارنو خودای گەورە لە (دجال) پاراستوونی، هەواڵی ناو پلە و پایەکانی ناو بەهەشتیان پێ ڕادەگەیەنێت کە بۆ ئەوانەو دەیان حەوێنێتەوە..
ئیتر ئەوا عیسا سەرگەرمی کار و باری خۆیەتی و لە ناکاو خودای گەورە وەحی بۆ دەنێرێت: ئەی عیسا ئەوا من چینێکم لە بەندەکانی خۆم بۆ بەرەڵڵا کردووە، کەس بە شەڕ و هەرا دەرەقەتیان نایەت، جا تۆیش بەندە باوەڕدارەکانم بۆ کێوی (گور) ببەو لە دەست ئەو بەندە دڕندانە ڕزگاریان بکە).. ئیتر خودای گەورە (یأجوج ومأجوج) دەنێرێتو ئەوانیش لە هەموو گرد و یاڵ و بەرزییەکەوە بە تەکان دێنو جمەیان دێتو ڕیزە سەرەتاکەیان بەسەر دەریاچەی (گبریە)دا دەڕۆنو هەرچی ئاوی دەریاچەکەیە هەمووی دەخۆنەوەو چۆڕی لێ دەبڕن، پاشان ڕیزەکانی تریان پیایدا تێپەڕ دەبنو دەڵێن: (لەمەو پێش لێرەدا ئاو هەبووە). ئینجا عیسا و هاوەڵە ئیماندارەکانی لە تەنگانەیەکدا دەبنو گیر دەخۆن کە هیچ خۆراک و کەرەستەیەکی ژیانیان پێ نییە، بۆیە تەنها سەرە گایەک بۆ کەسێکیان لە سەد لیرەی زەردی ئەمڕۆی کەسێکی ئێوە باشترە لە لایان.. لەو کاتەدا پێغەمبەر عیسا (علیە السلام) و هاوەڵەکانی بە کوڵ و بە سۆزی دڵ لە خودا دەپاڕێنەوە، کە لە ناویان بەرێتو بیان فەوتێنێت، دەرویەکی ڕەحمەتیان لێ بکاتەوەو بەسەر ئەو دوژمنە زۆر دڕندەیەدا سەریان بخات.. نزاکەیان گیرا دەکاتو کرمێک دەداتە گەردنیانو سەرجەم بە یەک دەم هەمویان دەتۆپێن (واتە: یأجوج ومأجوج) وەک مردنی یەک کەس دەمرن.
پاشان پێغەمبەر عیسا و هاوەڵەکانی لە چیای (گور) دادەبەزنە خوارەوە بۆ ناو وڵات، بەڵام دەبینن ئەو سەر زەوییەش یەکپارچە پڕ بووە لە لاشەی ئەوانو لە هەر تاکە بستێکی سەر زەوییەکەیشەوە بۆگەن و بۆنی جەستە مردارەوەبووەکانیان دێتو ئەو هەموو بۆگەنە بڵاو بووەتەوە، بۆیە پێغەمبەر عیسا و هاوەڵەکانی داوا لە خودا دەکەنو لێی دەپاڕێنەوە، کە ئەو حاڵەتە ناسازەیان بۆ بگۆڕێت.. خودای گەورەیش داواکەیان پەسەند دەکاتو بۆ ئەم مەبەستە جۆرە باڵندەیەکی گەورە دەنێرێت (وەک گەردنی وشتری مل درێژ) ئەم باڵندانە یەکە یەکە هەموو لاشە مردارەوە بووەکانی (یأجوج ومأجوج) هەڵدەگرنو لە شوێنێکدا بە خواستی خوا فڕێیان دەدەن کە ئیتر خەڵکی وەڕست نەکات.
پاشان دوای ئەمە خوای گەورە بارانێکی وایان بۆ دەبارێنێت کە هەموو شار و گوند و خێوەتگایەک دەگرێتەوەو زەوی دەشواتەوەو پاک و خاوێن وەک ئاوێنەی ساف و ڕوونی لێ دەکات.
ئینجا فەرمان بە زەوی دەکرێت کە: (بەر و بوومت دەربکەو خێر و بەرەکەتەکانت دەر بکە وەک جاری جاران)، تا وای لێ دێت بەر و بووم و بەرەکەتەکانی هێندە دەبێت، کە کۆمەڵە کەسێک لە یەک هەنار دەخۆنو ئەو تەنها هەنارە بەشیان دەکات، هەروەها لەژێر سێبەری قاوغەکانیدا دەحەسێنەوە، ئاژەڵی لەوەڕ خۆریش پیت و فەڕێکی وای تێ دەکەوێت، شیری ژەمی وشترێکی تازە زاو بەشی کۆمەڵێکی زۆر دەکات، ژەکی ژەمی مانگایەکی تازە زاو بەشی خێڵێک دەکات، فرۆی ژەمی مەڕێک یان بزنێک بدۆشرێت بەشی تیرەی خێڵێک دەکات. جا ئەو ئیماندارانە لەو بار و دۆخە خۆشەدان بۆ ماوەیەک، تا لە ناکاو خودای گەورە کزە بایەکی خۆش دەنێرێتو ژێر باڵی هەموویان دەگرێتەوەو گیانی گشت باوەڕدار و موسوڵمانێک دەکێشێت.. ئیتر تەنها خەڵکی خراپ و بەدکار لەسەر زەوی دەمێنێتەوە، کە سەرگەرمی هەراء و هوریا و بەزم و ڕەزمی ناو خۆیان دەبن وەک کەرگەل و دێڵە بەبا بە بەر چاوی یەکترییەوەو بێ شەرم و شکۆ لە یەک هەڵدێنو لە یەک دەپەڕن، لەم حاڵەتەیشدا قیامەت بەدی دێت!).
هەروەها (مسلم) لە شێوە گێڕانەوەیەکی تردا بڕگەیەکی تری بۆ ئەم فەرموودەیە، بەم جۆرەی لای خوارەوە زیادکردووە:
پاشان ئەوان (واتە: یأجوج ومأجوج) هەر دەڕۆن هەتا دەگەنە چیای (الخمر) لە (بیت المقدس)و دەڵێن: (ئەوا هەموو خەڵکی سەر زەویمان کوشت، دە با بچین ئەوانە بکوژین کە لە ئاسماندان.. بۆیە تیرەکانیان دەگرنە ئاسمانو ئەو کاتەیش خودای گەورە تیرەکانیان بۆ خوێناوی دەکاتو بۆیان هەڵدەداتەوە، تاکو دڵیان بەوە خۆش بێت گوایە خەڵکی ئاسمانیشیان کووشتوە).
بێگومان (یأجوج ومأجوج) زۆرترین ژمارەی نەتەوەکانی تر پێک دەهێنن، هەر ئەوانیش زۆرترین کافرانی دۆزەخنو بەو ژمارە هەرە زۆرەی خۆیان ژمارەی کافرانی ناو دۆزەخ لە قیامەتدا زۆر دەکەن. [1]