=KTML_Bold=Hilbijartinên li Tirkiyê û #HDP#=KTML_End=
İncil Selçuk
Li Tirkiyê careke din hilbijartinên pêşwext ketin rojevê. Kurd jî dê di bin banê HDPê de tevlî hilbijartinan bibin. Erê, belkî wekî nav çend partiyên din jî li Bakur hene lê di nava civakê de giranî û ciyê wan partiyan tune ye. Her çendî wan partiyan navên islamî û kurdistanî li xwe kiribin jî, tu dilsoziyeke wan bi Kurdistanê re nîne, ew tenê ji bo berjewendiyên şexsî û hizbî hatine avakirin. Lewra mirov nikare wan wekî partî jî bihesibîne.
HDP li gel kêmasiyên xwe jî tevgera ku heta îro li Bakur wekî hêza azadîxwaz a kurd tête qebûlkirin. Ji ber ku HDP ji kevneşopiya tevgera azadiyê tê, gelê Bakur bi her awayî û di her şert û mercî de piştgîriya wê dike. Lê mijara ku dibêjin “HDP ne partiya kurdan e” hinekî mirov diêşîne. Yanî gava tu şivanekî deynî ber pêz, ew pez tev nabite şivan. An jî heke tu bizinekê bikî pêşenga revdek xezal, ew xezal tev nabine bizin. Lewra HDP tevgerek kurd e ku hemû deng û rengên cuda di nava xwe de dihewîne.
Ma heke kurd hebin, doza mafê xwe yê sosyal, siyasal û nasnameya xwe jî dikin çima gelo partiyeke wan a kurd jî tunebe? Ma gelo “nanê genim ji sêwiyan re heram e?” Yan jî heke navê “kurd” li ser HDPê be dîsa jî nikare wekhevî û demokrasiyê biparêze? Bi rastî ez bi vê sosretê tê nagihêjim. Bi ya min HDP dikare weke partiyeke kurd jî bi hêsanî ji miletên cuda yên li Tirkiyê ku ji derveyî pergalê mane, piştgiriyê bigire.
Ji bo serkeftina HDPê ya Hilbijartinên 24’ê Hezîranê parastina sindoqan girîng e, ji ber ku bi rastî desthilatdarên Tirkiyê dizên profesyonel in. Di warê potansiyela parastina sindoqan de HDP potansiyeleke mezin heye. Carinan girtina tedbîran dikare dizan ji hizira diziyê poşman bike.
Di navbera Hilbijartinên 7’ê Hezîrana 2015’an û yên 24’ê Hezîrana 2018’an de wextekî pir dirêj nîne, lê ji bo kurdan bi qasî esrekî dirêj e. Lewra divê HDP bi anekdota Hilbijartinên 7’ê Hezîranê neçe ber deriyê gel. Hilbijartinên 7’ê Hezîranê gelê kurd bi gelemperî dengê xwe da HDPê ji bo ku bendava ji sedî deh derbas bike û bikeve meclisê, da ku pirsgirêka kurdan bi rêyeke aştiyane çareser bike. Lê îro hêviya gel ji meclisa Tirkiyê şikestiye. Ji bo ku ev milet bibêje “li gel hemû zilm û zora te ez heme û bi tevgera xwe re me”, divê car din heman bendav were şikênandin.
Piştî encamên Hilbijartinên 7’ê Hezîranê derketin holê, dewletê dest bi talankirin û hilweşandina bajarên kurdan kir, dikarim bibêjim: di dîroka tevgera Bakur a legal de HDPê sinava herî xerab da û bi giştî mîsyona xwe ya ku gel li bendê bû bi cih neanî. Ez li ser egerên wê tiştekî nabêjim, a di çavê gel û hilbijêran de dixuye, wê dibêjim. Ev rastî nayên wê maneyê ku gel dê careke din dengê xwe nede HDPê, erê dê bide, lê HDPa ku van rastiyan li ber çavan bigire û bi vê berpirsyariyê tev bigere, dê bihêztir bibe û rêjeyekê ji hilbijartinên dema berê zêdetir bigire.
Serkeftina HDPê ya li Bakur dikare bandoreke erênî li her sê perçeyên Kurdistanê, taybetî Başûr û Rojavayê kurdistanê jî bike. Lewra her çi qas ev sed sal e ku Kurdistan ji hev hatiye qetandin jî, qedera me bi hev ve girêdayî ye. Di van salên dawiyê de me ev rastî baştir dît ku çawa Şengalê bi xwe re Cizîr, Şirnex, Sûr û Nisêbîn birin. Çûyîna Kerkukê jî bi xwe re dagirkirina Efrînê anî. Lê li gel van karesatan jî em xwediyên destaneyeke wekî Kobaniyê ne. Kobaniyê jî bi xwe re berxwedan, rûmet û serkeftin anîn. Lê divê neyê jibîrkirin ku li Kobaniyê yekîtiya kurdan berxwedana wê bi serkeftinê tacîdar kir. Lewra yekîtî dikare berxwedan û serhildanên li Kurdistanê bi serkeftinê tacîdar bike.
Nivîsên ku tên weşandin, nerînên xudanên xwe ne.
[1]