زەرێ و فەخری ڕازی
بەشەی دوەمە
شێعرێوەیچ هەنە جە بارەو فەخری ڕازیوە دایېمە هەنە سەرو زوانیشوە. مەعسێ واتش: نەنێ گېرە حەر ئا فەخری ڕازیە کرێڵوو ئی ڕازێ بۊ، مشیۊم دلې لۆرد مەحەلێنە (مەحەلێ کەرگ ورەشا) دووکانش بۊ.
چوون چن جارێ دیم زەرێ نامې فەخری ڕازی بەرێ. نامې کەرگېچ بەرێ و دلې شێعرەکاشەنە جە کەرگې (مرغ) و پەل و پۆوی فرەی هەمیشە واچې.
کوتەککاری زەرێ ئڼە عادیوە بېیەبێ ئێتر هەزار هاوار و داڎێش کەردایانێ کەس نەلێ هەواڵش پەرسۆ.
ئا ڕوە مەڵڵا نەواتی 60 ساڵە لوا سەرو بانی و خۆڕا ملشارە و واتش: نا حەساوا ئا کناچېتا کوشتە. خوڎا هۊر نمەگېرۆ، ئێتر وەسېن. عەباس سەرو لێواروو حەوزەکەیوە نیشتەبێرە دابېش چیروو پرمەو گرەوای و قێڕنێ ئابڕووما لوا.
مەڵڵا نەواتی بە سڵتانێ واتش: بەرەو یانەکەی هاڵی کەرە ئا کناچې پاش سووچیان مشۊم بەرمێش پەی دوکتری.
ڕەسووڵ نەعرەتێوەش پێکا و واتش: حەر ئانەما کەمەن ئا مەلعوونێ بەرڎې پەی دوکتری.
حەتمەن بە چوار شێعرێ دوکتری خام کەرۊ.
ڕەسووڵ هۆرئێستوە واتش: نەنێ من گەرەکمەن بلوە پەی دەگای. ئی بېئابڕویە بی بە هۆکاروو ئانەیە دەگانە کەس لووتەم پۊرە نارۆ و مامەڵەم چەنی نەکەرۊ. من گرڎ ساڵېو دلې تەعزیەو عاشووراینە نەقشم بې، ئېساڵ بە بۊنەو ئی بېئابڕوویوە چەنەشا گېرتانی. ئا گاوەیچە نەرخەو 455 هەزاراێشا نیایبێ سەروە، ئارۊ 400 هەزارێ زېیاتەرشا پەنە نەڎا.
من ملوە گرڎ چېو مڎەو داروو هەڕاجی و ئی شارېو جیا مازوو، ئێتر شمە کەیفوو وېتانەن.
ئەر ئی کناچېچە بەرڎې دوکتر خوڎا سەر شاهێڎەن مەو ونێوە مجوو و وێچم مکوشوە. دمایی ڕوەش کەرڎە برا میچکلەکەیش عەباسی واتش: تۊ هۊشت بۊ ئی مەلعوونێ نەبرا دوکتر، حەر ئانەما مەنەن گرڎو شاری پەنەما بزانۆ و ئابرووما بشۆ.
بەرەو یانەی هاڵی کریا و مەڵڵا نەواتی بە لێوانێوە ئاو و قەڼوە ئاما چوەر و لوا سەرو سەرەو زەڕێ هەڕبەسەرې. لێوانەش گېرت دەسوە و داش بە زرێ و واتش: خوڎا هۊر نمەگېرۆ ئڼە ئازاروو ئی کناچې بڎەیدێ.
ڕەسووڵ کەردشوە جواب شمە هامسای هەقوو دەخاڵەتیتا نېیەن. واڵێ وېمانەنە ئەسڵەن گەرەکمانەن کوشمێش بە شمە چېش؟
مەڵڵای واتش: هەو ڕەسووڵە بېحەیا تۊ شاگرڎو من بېنی، من دەرزوو قورعانیت دێنێ، ئیسە سەرو قساو منەرە قسێ کەری؟
شمەی بېئاوەز هەکە گەرەکتانەن گندێ شۊنی فەخری ڕازی دلې لۆرد مەحەلەینە شۊنیش هۆرکەرڎې، زانانتا فەخری ڕازی شاعێر بېیەن و چن سەڎ ساڵېن فەوتش کەرڎەن و ئی بەسە زوانێچە شێعرەکاش وەر کەرڎەن و موانۊشاوە. تازە ئی چن دانە شێعرەیچە من فێرە کەرڎېنە.
عەباس هەکە بە حەساو وېش تازە شۆنێوەش هۆرکەرڎەبێ و گەرەکش بې بلۆ لەمەو فەخری ڕازی دڕۆ، مات مەنە.
شەریفی_ بېساران.[1]