Teknolojî û Kurdên Binerd
İkram Oguz
Di nav çend salên dawî da, di warê teknolojîyê da pêşveçûnên gelek mezin çêbûn. Ev ji alî zanyaran va wek şoreşa teknîkî tê bi nav kirin.
Bi saya vê şoreşê dinya guherî…
Dinya piçûk bû, têkilîyên mirovan bi hev ra xurt, dan û sitandinên wan zêde bûn.
Di navbera gund û bajaran da ferq nema…
Karker û xebatkarên li bajêr dijîn bidin alikî, şivan û gavanên li serê çîyê jî îro dikarin qasî ronakbir, sîyasetmedar û nivîskaran ji bûyerên dinê agahdarbin.
Di berika şivan û gavanekî da jî telefona destan heye û heger bixwaze, şivan jî li serê çîyê li alîki dikare pez biçêrîne, li alîyê din jî dikare têkeve ineternetê û agahîyên di dinê da qewimîne, bixwîne.
Gundîyek jî îro dikare di mala xwe da runê û hemû rojnameyên ku di zimanê wî da çap dibin, hê ji çapxanê dernektine, bi alîkarîya înternetê bixwîne.
Ev pêşveçûna ku di warê teknolojîyê da pêk hatîye, jîyana mirovan hêsan dike û wan diguherîne.
Yên ku vê realîtê nabînin û xwe naguherînin, hinek Kurdên meyên binerd in…
Serê wan di bin erdê da, quna wan ji derva ye…
Were gotinê, hem demoqrat, hem aştîxwaz, hem jî mirovhiz in…
Lê di jîyana xwe da ne ji demoqrasîyê, ne ji aştîyê ne jî ji mirovatîyê nisîbê xwe girtine…
Kî ku wek wan nefikire, gor wan, yan xayîn, yan paşverû ye…
Nivîskarek gor dilê wan nenivîse, ji destên wan were, wî di ava îskanekî da dixeniqînin. Xwedî çek û rext bin, bi kirinên xwe rihmê li leşkerên Tirkan tînin.
Heger kuştin ji destê wan neyê, rêyeke din dibînin û bi awayekî din, kirinên xwe yên qirêj bi cîh tînin.
Di malên xwe da rûdinên, computera xwe vedikin. Berê ji xwe ra çend navên sexte dibînin. Bi wan navan çi were devê wan, bi peyvên xirêj û bi nivîsên xirab, wan li pê hev rêzdikin û ji mirovan ra dişînin.
Wek şexsîyetên xwe, bi wan navên xweyên sexte, li alikî xwe vedişêrin, lewra ji cesareta medenî bêpar in, li alîyê din jî bi van navên sexte xwe zêde nîşan didin.
Hinek peyvên xweyên qirêj diguherînin û bi navek din careke dîsa dişînin.
Lê ji jîyan û realîta jîyane ewqas dûr in, tiştekî ji bîr dikin.
Ew jî nezanî û xizanîya wan e…
Bi navên xweyên sexte, tenê xwe û der-dora xwe dixapînin, ji wan wetrê computer û sîstema internetê jî tê xapandin…
Tu dinihêrî bi pênc, deh, panzdeh nav û adrêsên sexte ji te ra peyamên cûda cûda dişînin, lê nafikirin ku çiqwas nav û adrês werin guhartinê jî, dema ku ji computerekî were şandin, hemû bi çavkanîyekî tên xuyakirin.
Bi vî awayî serê wan neyê xuyakirin jî, lê hinek derên wan wek ala Tirkan li her derê tê dîtin.
Pêşîyên me çi gotine; „Çêleka ku dizî were ga, eşkere dizê”.
Ez bawerim qasî vê hevokê tu gotinek Kurdên meyên binerd û kirinên wan ên qirêj baş tarif nake…[1]