Nivîskar û rojnamevan Dijwar Axa da zanîn ku belavbûna çeteyên HTŞ’ê li gelek herêmên dewleta Tirk dagir kirine bi armanca avakirina kembera terorîst a nû li bakurê Sûriyê ye û her wiha amadekirina hêzên perwerdekirî ji bo çi şerekî di pêşerojê de ye.
Piştî belavbûna çeteyên Heyet Tehrîr El Şam (HTŞ) (Cebhet El Nusra ya berê) li gelek deverên dagirkirî, gelek guhertin li herêmên di bin dagirkeriya Tirkiyê de çêbûn, nexasim li ser eniyên şer ên bi ser hêzên Meclisa Leşkerî ya Minbicê, li Efrînê û kantona Girê Spî ve.
′ERÊKIRINEKE TIRKÎ Û PÎROZBAHIYEKE RÛSÎ′
Der barê kontrolkirina çeteyên El Nusra li hin deverên dagirkirî de, nivîskar û rojnamevan Dijwar Axa wiha got: “Tiştê ku diqewime bi erêkirineke eşkere ya dewleta Tirk û pîrozbahiyeke Rûsî ye, nexasim ku Rûsya, piştî civîna sêalî ya dewleta Tirk, Îran û Rûsya li Astanayê, dixwaze Şam û Enqereyê li hev bîne, ji ber wê jî ew hin tawîzan dide dewleta Tirk da ku çeteyên HTŞ’ê li herêmê belav bibin û çeteyên ku bi navê Artêşa Niştîmanî ji wan herêma vekişin.”
′ARMANCA DEWLEAT TIRK AVAKIRINA KEMBEREKE TERORÎ YA NÛ YE′
Der barê yekkirina HTŞ’ê bi çeteyên girêdayî dagirkeriya Tirk re, Axa wiha domand: “Ev armanca sereke ya dewleta Tirk e, ji bilî têkbirina projeya Rêveberiya Xweser a Bakur û Rojhilatê Sûriyê, armanca wê ew e ku ew aliyên çekdar ên mayî di bin sîwaneke nû de bike yek, lê belê tiştê ecêb ew e ku ew alî wek Heyet Tehrîr El Şam, Cebhet El Şamiyê û Ehrar El Şam ku navê “Şam” li başûrê Sûriyê li xwe kirine û berê xwe didin bakurê wê.”
Axa wiha li gotina xwe zêde kir: “Armanca dewleta Tirk a dagirker avakirina kembereke terorî ya nû li bakurê Sûriyê ji bo amadekirina çeteyan ji şerên pêşerojê re ye.”
′AMADEKIRINA HÊZEKE PERWERDEKIRÎ JI BO KU ŞERÊ QSD’Ê BIKE′
Girêdayî pevçûnên rûtînî yên di navbera komên çete de Axa wiha axivî: “Pevçûn li ser bingeha dizîna mal û milan in, ji ber ku ew diz in û li ser mal û milkên şêniyên koçber şerê hev dikin, ji ber wê jî dewleta Tirk a dagirker xwest hêzeke navendî hebe da ku wê li dijî Hêzên Sûriya Demokratîk (QSD) bi kar bîne, eger êrişek li dijî wan herêmên dagirkirî pêk hat.”
Axa destnîşan kir ku armanc ji amadekirina hêzeke perwerdekirî ew e ku şerê QSD’ê bike.
′BELAVBÛNA NÛ ÎŞARETÊ BI ŞEREKÎ NÊZÎK Ê MEZIN DIKE′
Axa ev tişt got: “Belavbûna çeteyan nexasim çeteyên Ehrar El Şam û bicihbûna wan li gundên li ser sînorên gundewarên Minbic û Babê, îşaretê bi şerekî nêz li dijî Bakur û Rojhilatê Sûriyê dike.
Axa wiha anî ziman: “Dibe ku neerêkirina ji dewleta Tirk re ku êrişên berfireh li ser herêmê pêk bîne, hişt ku van komên çete li dijî QSD’ê amade bike.”
′ÇARENÛSA ÎDLIBÊ ÇI YE?′
Têkildarî rewşa Îdlibê û çarenûsa wê, Axa got: “Dibe ku lihevkirinek li ser mijara vekişîna komên çete û hêzên hikûmeta Şamê hebe, Rûsya dê di hin aliyan de li hember vekişîna komên çete ji hin deverên Îdlibê û radestkirina wan ji bo hêzên hikûmeta Şamê, destekê bide dewleta Tirk, ev jî tê texmînkirin û niha bi pratîkî pêk tê.
′DEWLETA TIRK A DAGIRKER HEWL DIDE TECRUBEYA RÊVEBERIYA XWESER TÊK BIBE′
Axa destnîşan kir ku dewleta Tirk a dagirker hewl dide tecrubeya Rêveberiya Xweser têk bibe, ji ber wê jî wê rê da komên çete ku xwe bikin yek û li eniyên şer ên ser bi QSD’ê ve bi cih bibin nexasim ên ser bi Meclisa Leşkerî ya Minbicê ve.
′TEXMÎNA QEWIMÎNA ÇI TÊ KIRIN?′
Dijwar Axa axaftina xwe wiha domand: “Tiştê ku hatiye texmînkirin ku biqewime ew e ku dewleta Tirk tevliheviyekê li herêmê derxe û îstîqrara wê têk bibe, nexasim bi rêya wan çeteyên ku li dijî QSD’ê amade kirine da ku bêhtir deveran dagir bike û şêniyan koçber bike û careke din zextê li civata navneteweyî bike da ku herêmeke ewle li bakurê Sûriyê ava bike.”
Dijwar Axa wiha gotina xwe bi dawî kir: Ka ew herêmên ewle yên ku Erdogan digot dê tê de 30 milyon kes bi cih bibin? Lihevkirina di navbera wî û hikûmeta Şamê de ji bo vegerandina penaberên Sûrî û radestkirina wan ji bo rêjîmê ye, ev rastî li ser erdê pêk tê.”[1]