Peter Turrin yek ji nivîskarên şanoyê yê ji Avusturyayê ye ku li dinyayê tê nasîn. Niha teksta lîstika wî ya bi navê “#Dawiya Dawî#” bi kurdî wekî pirtûk hat çapkirin. Nivîskar û werger Asya Xerzan tekst wergerandiye û pirtûk ji Weşanxaneya Na derketiye.
Peter Turrini nivîskarekî ji Avusturyayê ye. Lê ew bi almanî nivîsên xwe dinivîse. Lîstika xwe “Endlich Schluss” (Dawiya Dawî) jî dor 25 sal berê nivîsandibû û lîstik di sala 1997’an der derxistibûn ser dikê. Ji wê rojê de lîstik ji bo gelek zimanan hatiye wergerandin û niha jî ji bo kurdî hat wergerandin. Nivîskar û werger Asya Xerzan ku li Almanyayê dijî pirtûka Turrini ji almanî wergerandiye kurdî. Di lîstika yek kesî ji serî heta dawî ji monolagan pêk tê. Di lîstikê de kesekî ku di jiyana xwe de serketiye û bûye xwedî her tiştî êdî ji wan kerixiye û dixwaze dawî li jiyana xwe bîne. Derî li ser xwe radide, kilîdê vedişê re, di quncikê odeya tarî de heya hezarî dijmêre, gava digîhîje 999’an ji nişke ve disekine… Lîstik ramana xwekuştinê wekî rêyeke xelasbûnê pêşkêş dike. Bi çapkirina vê pirtûkê klasîkek din a dinyayê li pirtûkxaneya kurdî zêde bû û yên bixwazin lîstikê derxin ser dike jî ji bo wan bû firsendek.
Peter Turrini kî ye?
Peter Turrini, roja 26’ê rezbera 1944’an li Sankt Margarethen Karntenê ya Avusturyayê hatiye dinê. Ew ji 1971’ê ve wekî nivîskarekî serbixwe û xweser e; şano, senaryo, pexşan û helbestan dinivîsîne. Ew bi rexnegirîya xwe ya civakî, bi taybetî jî di xebatên xwe yên destpêkê de, bi Leyîstikên Gel ên Provokatîf gelekî navdar e. Berhemên wî li zêdetirî sih zimanî hatine wergerandin û li seranserê cihanê şanoyên wî têne lîstin.
Peter Turrini li Kleinriedenthal a nêzî Retzê dijî.
Asya Xerzan kî ye?
Asya Xerzan di sala 1974’an de li Herêma Xerzan, li gundê Qorixê yê girêdayî navçeya Qubîna Batmanê hatiye dinê. Wê dibistana destpêkê li Qorixê xwend û dibistana navendî li Oberkirchen a Almanyayê xwend. Xerzan, sala 2016’an di 24’mîn Pêşbaziya Çîrok û Helbesta Kurdî ya Huseyîn Celebî de xelata yekemînîyê girtiye. Ji sala 1985’an ve tevî malbata xwe li Almanyayê dijî.
Pirtûkên wê ev in:
- Dengê Bêdengîyê /Helbest /Weşanxaneya Sîtav / 2016 / Wan
- Dengê Bêdengîyê / Helbest / Wergera Soranî / Weşanxaneya Sîtav 2018 / Wan
Asya Xerzan, niha ligel nivîsîna çîrokan, wergera ji Almanî bo Kurdî jî dike.
[1]