دواڕۆژ، ئاوارە حەمید
بڕیاردەری لیژنەی ناوخۆ و ئاسایش لە پەرلەمانی کوردستان ڕایدەگەیەنێت، سێ هەزار و 500 عەرەب لەسەر میلاکی وەزارەتی پێشمەرگە و ناوخۆ بەبڕیاری بارزانی دامەزراون، هاوکات بەشێک لە پێشمەرگەی تریش بۆ پارتی و یەکێتی دادەمەزرێندرێن و بۆ بزوتنەوەی گۆڕانیش بەناوی گەڕانەوەی سزادراوانی سیاسی چوار سەدکەس دادەمەزرێندرێن.
لەگەڵ بەردەوامی قەیرانی دارایی لەماوەی یەک ساڵدا، زیاتر لە هەشت هەزار پێشمەرگە دامەزراون ئەمە سەرەڕای لە شوێندانانەوە و بەشێکی زۆی ئەم پێشمەرگانەش عەرەبن و لە دەشتی نەینەوادان.
ساڵح گەڕگەڕی، کارگێڕی مەڵبەندی موسڵی یەکێتی نیشتمانی کوردستان بە دواڕۆژی ڕاگەیاند، سێ هەزار و 733 کەس ناونوسکران لە ناوچە و لقی پارتی دیموکراتی کوردستان بۆئەوەی وەک پێشمەرگە دەست بە ڕاهێنان و دەوامی خۆیان بکەن.
وتیشی "ئەو پێشمەرگانە لە ناوچەی ئەتروش ڕاهێنان دەکەن و هەزار کەسیان ڕاهێنانیان تەواوکردووە و مووچە وەردەگرن".
بەوتەی ئەو بەرپرسەی یەکێتی، بەشێک لەو پێشمەرگانە خراونەتە سەر وەزارەتی پێشمەرگە و بەشێکی تریش خراونەتە سەر فەرماندەیی زێرەڤانی، کە گەورەترین فەرماندەیە و سەر بە وەزارەتی ناوخۆیە.
کارگێڕەکەی مەڵبەندی موسڵی یەکێتی، ئاماژەی بەوەشکرد، دوو بەشی ئەو کەسانەی ناونوسکراون بە ڕەگەز عەرەبن و ئەوانی تر کوردن.
قادر ڕەزگەیی، بڕیاردەری لیژنەی ناوخۆ و ئاسایش و ئەنجوومەنە خۆجێیەکان لە پەرلەمانی کوردستان بە دواڕۆژی ڕاگەیاند، هەزار و 500 کەس بەناوی میلاکی زێرڤانی بۆ لایەنیکی سیاسی هەرێم لە ژێر ناوی مەجلیسی شەعب دامەزران و دەوامیش ناکەن و مووچە وەردەگرن.
مووچەی ئەو پێشمەرگانەی دامەزراون، جگە لە دەرماڵەی خێزان و منداڵ و پلەی بەرپرسیاریەتی، زیاتر لە 500 هەزار دینارە و مانگانە لەلایەن وەزارەتی پێشمەرگەو ناوخۆ بۆیان دابیندەکرێت.
رەزگەیی ڕوونیدەکاتەوە، دوو هەزار کەسی تریش بە بڕیارێک بەناوی بڕیاری مەکتەب سەرۆک لە خەڵکی پارێزگای موسڵ کە بە ڕەگەز عەرەبن دامەزراون.
لەبارەی دامەزراندنی عەرەبەکانی موسڵ و پێشمەرگەکانی تر، بەرپرسێکی باڵا لە فەرماندەیی زێرەڤانی کە نەیویست ناوی بڵاوبکرێتەوە تایبەت بە دواڕۆژی ڕاگەیاند، سەرەتا بەرنامە هەبوو لە ناحیەی باتووش هێزێگی گەورە لە خەڵکی ئەو ناوچەیە دروست بکەین، دواتر بەرنامەکە سەرکەوتوو بوو هێزەکە پێکهێندرا.
بەپێی زانیارییەکان، لە مانگی تشرینی یەکەمی ساڵی 2014 تاوەکو 12ی کانوونی یەکەمی 2015، چوار هەزار و 759 پێشمەرگە ناونوسکراون.
لەمبارەیەوە بڕیاردەری لیژنەی ناوخۆ و ئاسایش و ئەنجوومەنە خۆجێیەکانی پەرلەمانی کوردستان، ڕوونیدەکاتەوە کە لەکۆی ئەو چوار هەزار و 759 پێشمەرگەیە، چوار هەزار و 57 پێشمەرگە بۆ پارتی دیموکراتی کوردستات دامەزراون، هەروەها بۆ یەکێتی نیشتمانی کوردستان 702 پێشمەرگە بوون، لە بزوتنەوەی گۆڕانیش بەناوی گەڕانەوەی سزادراوانی سیاسی چوار سەد پێشمەرگە دامەزراون.
لەبارەی ڕێکخستنی دەوامیان، قادر ڕەزگەیی وتی"پێشمەرگەکان بەسەر فەوجەکانی 1 شەنگال، 2 شەنگال، کاکەیی، شەبەک و فەوجی متەفەرقەی دهۆک لەگەڵ لیوای چواردە و فەوجی یەک لە لیوای 16 دابەشکراوە".
بڕیاردەری لیژنەی ناوخۆ و ئاسایش و ئەنجوومەنە خۆجێیەکان، کە هاوکات ئەندامی لیژنەی پێشمەرگەیە دەڵێت "هەر پێشمەرگەیەکی ئاسایی کە دادەمەزرێت مووچەکەی لە پێنج سەد و یەک هەزار دینارە و سەرباری دەرماڵی خێزاند و منداڵ و پلەکەی، بۆیە دامەزراندنی ئەو پێشمەرگانە لەم قەیرانە دارایە کاریگەری دەبێت لەسەر باری دارایی هەرێم".
رەزگەیی کە بەدواداچوونی بۆ دامەزراندنی ئەو پێشمەرگانە کردووە و لیست ناوی پێشمەرگەکانی لەلایە، بە دواڕۆژی ڕاگەیاند"پرسیارم لە وەزیری ناوخۆ کە وەزیری پێشمەرگەیە بە وەکالەت لەگەڵ ئەنجوومەنی وەزارەتی پێشمەرگە کردووە بۆئەوەی تا چەندە ئاگاداری دامەزراندنی ئەو پێشمەرگانەن، لەوڵامدا وەزیری ناوخۆ و پێشمەرگە بە وەکالەت وڵامی پێ نەبووە و ئەندامانی ئەنجوومەنی وەزارەتی پێشمەرگەش بێ ئاگایایی خۆیان لە پرسێکی وا دەربڕیووە".
جەبار یاوەر، ئەمینداری گشتی وەزارەتی پێشمەرگە بە دواڕۆژی ڕاگەیاند "بەهۆی قەیرانی داراییەوە ماوەی زیاتر لە ساڵ و نیوێکە هیچ کەسێک لەنێو وەزارەتی پێشمەرگە دانەمەزراوە، بەڵام پێشتر چەند فەوجێک بۆ کاکەیی و شەبەک و ئێزیدییەکان و پلەدارە کوردەکانی نێو سوپای عێراق کە دوای هاتنی داعش گەڕابوونەوە دامەزرێنراون.
لەبارەی دامەزراندنی عەرەب لەسەر میلاکی وەزارەتی پێشمەرگە، جەبار یاوەر وتی "لە وەزارەتی پێشمەرگە هیچ کەسێکی عەرەب دانەمەزراون، بەڵام ئەوەی باسدەکرێت کە لەسەر میلاکی زێرەڤانی دامەزراون، ئەوە پەیوەندی بەئێمەوە نییەو دەبێت پرسیار لە فەرماندەیی زێرەڤانی بکرێت".
- 19-01-2017