مەلا حەسەنێ قازی (شاهۆ) 1882-1971
مەلا حەسەن قازی کوڕێ مەلا عەبدولقادر کوڕێ مەلا ئەوڕەحمانە، ساڵا (1882ز) ل بیارە ژدایک بوویە، پشتی خوەندنا زانستێن شەرعی و زمانێ فارسی و عەرەبی، چەند ساڵەکان دەبیتە قازی، هەلبەست ب زمانێ کوردی و فارسی و عەرەبی هەنە، کەسەک زیرەک و بلیمەت و قسەخوەش بوو، ل (#23-06-1971#) وەغەرا داویێ کرییە.
ناڤێ مەلا حەسەن کوڕێ مەلا عەبدولقادرێ کوڕێ عەبدولرەحمانە، بابێ وی ب مەلای گەورەیێ بیارە بناڤبانگ بوو و ژن و ژن خوازی دگەل شێخ عومەر زیائەدینی یێ بیارە کربوو.
پشتی کوو مەلا حەسن خوەندنا ئایینی و زمانێ عەرەبی ل ناوچەیا بیارە پێش جەنگێ جیهانیا ئێکەم تمام دکەت، بەرێ خوە دکەتە باژێڕێ بەغدا پشترە دەچیتە ئیستانبۆڵێ.
مەلا حەسەن ل ئیستانبۆل پەیوەندی ب ئەندامێن کۆما (تعالی کوردستان) دکەت.
پشترە ل ساڵا 1926 ڤەدگەڕێتە کوردستانێ و ل وێ ساڵێش ب قازیێ #هەڵەبجە# هات دەستنیشان کرن.
ل ساڵا 1937 بەرێ خوە کرە باژێڕێ بەغدا و ل وێرێ پۆستێ نڤیسەری ل تەمییزا شەرعی پێدا، هەیا ساڵا 1953 د ناڤبەرا دادگەهێن باژێڕێ #چەمچەماڵ# و #کەرکووک# و #هەڤلێر# وەکە دادوەر کار کرییە، هەر ل وێ ساڵێش هات خانەنشین کرن.
مەلا حەسەن زەڵامەکێ زیرەک و دانا ژبلی زمانێ کوردی، زمانێن عەرەبی و تورکی و فارسی دزانی.
مەلا حەسەن گرنگییەک زور ب هەلبەستان ددا و مژویلی نڤیسینا هەلبەستان بوو.
مەلا حەسن یاخود شاهۆ هەلبەستێن وی ب سەر سێ تەوەران دابەش ببوون، ئەو ژی ئایینی و غەزەلی و نشتیمانی.
هەروەسا شاهۆیێ شاعێر، شارەزاییەکە باش ل دیرۆکا هەلبەستێن ئەدەبی و کوردی هەبوو.
مەلا حەسن ئێکەک بوو ل وان زەڵامێن ئایینی کو هەلبەستێن وی ب ئالیەکێ ڕەوان و زور ڕێکوپێک هاتبون ڤەهاندن.
هەلبەستێن شاهۆ ل دوو بەرگان چاپ ببون، ل ساڵا 1976 چاپخانەیا ڕاپەڕین ل باژێڕێ #سلێمانی# بەشا ئێکەم چاپکر، پشترە ل ساڵا 1980 هەمان چاپخانەیێ بەشا دووهەما هەلبەستێن شاهۆی چاپکر.[1][2]