ڕێکەفتی#02-11-2024#، ل باژێڕێ لیلەسترۆم یا وڵاتێ نەرویژ، ڤیستەڤاڵا کولتووری یا گەلان ب ناڤێ “کولتوور میکس” ب ئامادەبوونا بەرپرسیارێن ئەڤی باژێڕەی و پشکدارییا هەژمارەکە بەرچاڤ ل نەتەوێن جودا ئێن ئاکنجی لڤی پارێزگەهەی ل هۆڵا کولتوور مەڵبەندا لیلەسترۆم بڕێڤەچوو.
کولتوور میکس ڕێوڕەسمەک ساڵانەیە کو ل وڵاتێ نەرویژ و باژێڕێ لیلەستڕۆم بڕێڤە دچیت و هەژمارەک بەرچاڤ ل نەتەوێن جودا وەکە: کورد، پاکستانی، عەرەب، سۆماڵی ئەفغانی و… تێدا پشکداری دکەن. مەبەست ل پێکهێنان و ڕێڤەبرنا ئەڤان پرۆگرامان ژئالێ کۆمونی لیلەسترۆم، ئینتیگرێرینگ و ئاشنا بوونا نەتەوێن جودایە ب کولتوور و جورێ ژیان و هونەر و بەهائێن گرنگێن جهاکی یێن هەڤدوو.
ئیمساڵ ژی هەر وەک ساڵێن بەرێ ڕێوڕەسمەکە ل ڕوژا 2یێ نۆڤەمبەرێ ل لیلێسترۆم بڕێڤەچوو.
کۆمیتەیێن دەرڤە و کومیتەیێن یەکێتی ژنێن دێموکرات یێ ڕوژهەڵاتێ کوردستانێ ل وڵاتێ نەرویژ وەک ساڵێن بەرێ ژبو نیشاندانا کولتوورێ بەرزێ نەتەویی ب ستران، شایی و خارنێن کوردی پشکدار بوون.
هەژمارەک بەرچاڤ ل ئەندامێن یەکییەتی یا ژنان و کوردێن ئاکنجی یێن ئەڤێ دەڤەرێ ب جلوبەرگێ کوردی پشکدار ببوون.
دەستپێکێ ژ ئالێ دەستەیا ڕێڤەبەرێن بەرنامەیێ کو خانمەک پاکستانی و لاوەک نەرویژی بوون، بخێرهاتنا بەشداربوویان کرن.
ڕێوڕەسمەکە ل چەندین بڕگە و بەرنامەیێن جودا پێکهاتبوو، ب پێشکەشکرنا گوتارەکێ ژ ئالێ شارەداریا لیللەسترۆم دەست پێ کر. وی د گوتارا خوەدە ئیماژە ب وێ چەندێ کر کوو کۆمونا لیللەسترۆم، ئێکەم کۆمونە کو کاربیت بەرنامەکە بڤی ئالییەی و ب بەشدارییا زوربەی نەتەوێن جودا بڕێڤە ببەت.
پشترە هەر نەتەوەیەکی ل دەمێ دیار کری دا ب ئالییەک تایبەت، کولتوورێ خوە ب موزیک و ستران و شایێ و جورێن دن پێشکەش کر. کۆمەک لاوێن خودان شیان و بەهرەمەند ب ئالییەک جوان و ژێهاتی هەر ئێک و کولتوورێ نەتەوێ خوە نیشاندا.
تەڤا بەرنامەیان جهێ ڕەزامەندی و خۆشحاڵییا ئامادەبوویان بوو و هیواخاز بوون کو ئەڤ بەرنامەیە ژبو ئاشنا بوونا پتر دگەل ئێک پێک بهێن و ببنە هەوێنا پتر پەرەدان ب فەرهەنگێن لێک تێگەهشتنێ و هەڤودد قبوڵ کرن ب هەمی ڕەنگێن جودا.[1]