ئەشقی ئەوەشاریا
بەشەی ئەوەڵە
فرەتەروو داستانە کوڵەکا من گېڵاوە پەی ویردەو هۆرامانی، جار جاریچ داستانێ سەردەمانێچ منوېسو. ئەشقی ئەوەشاریا یۊ چا داستانانە کە ئێساڵ مەقامی دوەمش جە هەمامەو داستانە کوڵا نۊتشەیەنە بە دەس ئارد. ئۆمێڎوارەنا بە دڵتا بۊ.
شانازە ئەڎاو هەنارێ، باخچەو ساوایانە هەنارەش نیارە و بە پەلە گېڵاوە ڕوەو یانەی.
ڕۆی وەڵینش تەختێوه وتەیش پەی هەنارێ ئەسابێ. پاسە قەرارش چەنی دووکاندارەکەی نیابێرە، ڕۊی دمایین تەختەکەی بارا وەرو بەرەی پەیش.
بەینو باخچەو ساوایا، تاکو یانەو وېشا، دەوروو ویس دەیەقێ ڕا بې. حەفتێو پەنج جارێ ئاما و لوای ئا ڕای کەرې. دارە سنۆبەرێ و سوورە چنارێ یۊ شۊنۊ یۊی، دلې ڕاکێنە بەرزێ بییێ بېنېوە و ڕاکێ جە جادېوی کە پاڵشەرە لوێ، جیا کەرېنێوە. هەرجارێو چا ڕاینە تەنیا گنێ، ویرێ جۊراوجۊرێ سەرەش کەرېنێنە و تاکو تەمامیای ڕاکێ، وازش چەنە نارێنێ.
دەمېو بې ئیتر حەز نەکەرې ویر جە ویرەوەریە تاڵەکاش کەرۊوە. هەمیشە چا ویس دەیەقه و ڕاینە، کۊشش دێ، دنیایوی وەشتەره پەی خیاڵەکاش وەشه کەرۊ. دماو بەسەر ئاماو مەرگو شوەکەیش، ئیسە دیسان گەرەکش بې ژیوایوی سەرجەنۊ دەس پەنە کەرۊوە. بە تاییبەت ئا ڕوە، ڕۊ ئەڎا بییەیش بې و بې بە سی ساڵې. ئا سەحبانە وەرەتاو وەهاری شۆڵەش وسەبێ سەرو شاریورە و جریوەو مریچڵە پاساریا دلې دار سنۆبەرەکانە، حاڵ و هوایوی وەشتەرشا پەنە بەخشایبێ.
جار جار خیاڵېش لوێنێ پەی لاو سەرکاوی هامسایشا و بزێو گنێ سەرو لچاش.
سەرکاو چەنی ئەڎا و تاتەیش و یەرێ واڵاش، دلې یانېویەنە ژیوێنێ کەوتەبێ وەراوەرو یانەکەو ئاڎېوە. فرەو کاتا سەرکاو سەحبەنە وەڵێ ئانەیەنە بلۊ سەرو هەرمانەکېش، دەلاقەکەشانە نیشېرە تاکو چەمش گنۊ پەنەش و ڕوەکەش بە دیەی ئاڎې دەس پەنە کەرۊ.
شانازە پاسە زانێ سەرکاو شێت و شەیداشا و بې قەرارا پەیش، وەلېم ئێڎە هەڵای چەنی وېش ساقە نەبییێبێوە و دلې قووڵایی دڵیشەنە پەرسې بې جوابێ فرێش پەی مەنێبېنېوە.
سەرکاو تازە مەدرەسەش تەمامنابێ و چن ساڵېو چاڎێ گولانەتەر بې. شېرکەتێوەنە هەرمانە کەرې و کوڕېوی نەرم و نیان و تاکو واچی وەش پەنەکەوتە و وەش ئێخلاق بې. چەنی هەنارێ بەینش فرە وەش بې. بە تاییبەت چا کاته و هەنارە تاتەش نەمەنە بې، ئاڎ کۊشش دێ فرەتەر چەنیش بۊ. جار جار بەرێش یانەو وېشا پەی لاو واڵە گولانەکې وېش و چەنی ئاڎې دەس کەرې گەمەکەرڎەی.
تاتەو هەنارێ نامېش مەنسوور بې و ساڵ و نیمێو چاوەڵتەر فەوتش کەرڎەبێ و هەنارە هەتیمە کەوتێبێ.
مەنسوور پیایوی وەش پەنە کەوتە و چەنە ئاما و ژیر بې. وانای باڵاش تەمامنابێ و شېرکەتێوەنە بە دەرامەدېوی عاله و هەرمانە کەرې. کاتو وېش چەنی شانازێ ئاشقێ یەکتری بېنې و بە وەشەویسی یاوایبېنې بە یۊی. مەرگو مەنسووری چا کاتەنە، ژیوای شانازێش چېر و چوەر کەرد و دڵە گولانەکەو هەنارێچش تەزنا. ئیسە ئا خەمە گۆرە بە لوای ساڵ و نیمېوی کوچېو سارێژ بییەبێ.
ڕەزا بەهمەنی.[1]