بەیتا بلبلی 3

ب دەستوری خودی

سبحانه ژ ته سبحانه
چی حوکمەکی هۆیی گرانە
هون برێنە بلبلی و طەیرانه !
* * *
وەختەکی طەیر دێ جەما بن
دێ ب رایەکی رابن
بەندا بلبلێ مسکین دێ دامابن
* * *
وه دبێژە مەزنێ طەیرانه
وێ دچنە با میر سلێمانە
گۆ : میرۆ ! ئەمێ د گرین وەک طاڤێت بارانە
* * *
میرۆ ! ئەمێت دگرین و وێ د بارینن
چەنگ و باسکا ژ خوناڤا بەرێ سبێ داوەشینن
دا بەندا بلبلێ مسکین ب گازینن
* * *
میرۆ ! بخێر وێ بێت بەهارە
ئەم ب رۆژێ د خونن ب هەزارە
ب شەڤێت گران ختم دکەن دەفتەرەکێ ژ دەفتەرێت مارە
* * *
میرۆ ! بەهار وێ بێیۆ
بلبل ب رۆژێ زاڤ دبێیۆ
شەڤێت گران ب دەنگێ خۆ دسترێیۆ
* * *
سلێمان پێغەمبەر وە دبێژییە
بلبل طەیرەکێ ئاغییە
خۆزی من زانیبا مەسکەنێ وی ل کو دبییە ؟
* * *
سلێمان پێغەمبەر وە دکەت سوخنە
بلبل طەیرەکێ پر گۆتنە
ئێقین بلبل نە یی لبەر حوکمێ منە !
* * *
وه دبێژە قومیسێ طەیرانه
وێ دچتە با میر سلێمانە
دبێژە ; میرۆ ! مەسکەنێ بلبلی ناڤ باغێ گولانە
* * *
وه دبێژە قومسییه
ب دیوانا میر سلێمانی ڤە دچییە
مەسکەنێ بلبل ناڤا گولێت سۆر و سپییە
* * *
سلێمان پێغەمبەر وە دکە فروارە
ژ طەیرا بازی دژواره
کره قاسد و با بلبلی ڤە د هنارە
* * *
گۆ : بازیۆ هەرە بلبلی بینە
روحا وی ژێ مەستینە
ب ساغی بگرە و بۆ من بینە
* * *
بازی دفریه
وەلات بەروەلات دگەریه
مەسکەنێ بلبل دیتیه
* * *
بازی فری ژ هنداڤە
وەلات و بەروەلات گەراڤە
مەسکەنێ بلبل دیتبو ب چاڤا
* * *
بازی چۆیە جیەکی خالی
دی بلبلی تەخت دانی
بلبلێ مسکین دناڤ دا دنالی
* * *
بازی چۆیە چیکێت بەستی
دی بلبلی تەخت دانی ، سۆر گول ب سەردا شکەستی
بلبلێ بەزە د ناڤ دایێ نڤستی
* * *
گۆ; بلبلۆ ! هۆیی بلبلۆ !
هەی حەیرانۆ ،سۆتی دلۆ
تو یی ل ناڤ باغێ گولا ، حزرەتاتە ئەو گولۆ
* * *
بلبلۆ یێ دل دەروێشە
من خەتەک ئانیه ژ پێشە
سلێمان پێغەمبەر وێ ل تە دکەت تەفتێشە
* * *
بلبلۆ یێ دل فەقیرە
من خەتەک ئانیه ژ با میره
سلێمان پێغەمبەر وێ تە کە ئێقسیرە
* * *
بلبل گۆ : ئەز ب وی کەم یێ رەحمانە
هەتا رووح د بەر جانێ من دانه
ئەز نا چمه دیوانا میر سلێمانە
* * *
ئەم د کێمن خودێ یێ تەمامە. [1]