من و ئازاڎیی و هەزاران ویرۍ ناحەزۍ
نویستەی: شەریفی_ بېساران
بە دەسېم سەرپۊشیە تایبەتی ورازوو تاکو ۋا زوڵفۍ پەخشانېم نەوزۊ سەما، باکێوەم نېیەن.
بۍ چرپە هەنگامۍ واڕوو تاکو پایېم تەنیا بە خوڵەپۊتۍ عاڎەت کەرا، باکێوەم نېیەن.
بە کۊنەتەرین جل و بەرگی پۊشتەوە مەورە مێڎان جە ئیشارەتوو هەنگووسا تەرسیم نېیەنە و ملو، باکێوەم نېیەن.
تۊ!
ئەرۍ تۊ!
بە یاگۍ ئانەیە پېسەو ژەرەژەی تازە ئەسیرۍ پەلېم کەنی و دیسان خزمەتی پېچەوانەم کەریویە تاکو ئی جارە بە دڵوو وېت پەلۍ بزنوونە و ڕاو تەکوو جمیم بڕی و حەد و مەرزوو فڕیایم فېرە کەری بازەم، بازەم با چەنی بازا گیوەڵکانۍ کەروو. بازەم با حەسرەتوو بەرزە فڕی ئاسمانوو ژیوایم نەتاریکنۊرە. بازەم با شۊڵەو چراوە مووشیێ دلۍ یانەی تاریکی دڵ وەشەم نەکەرۊ. بازەم با وېم تریفە خولقنوو و ڕام ڕۊشنە کەرۇۋە/کەرۇوە.
هیچ وەخت باسوو وەنەوشەی و وەشبۊیش مەکەرە پەیم. بازەم با وېم گېڵوو شۊنیشەرە حەتا ئەر دلۍ تاقمەو دڕیایچەنە بیەبۊ وېم حیسش کەروو، وېمبۊوەش کەروو.بە چەپکە وەنەوشەی بێۍگېیانی دڵوەشم مەکەرە.
دڵوەش بە فریاییم کەری، بەڵام پەل و پۊم کەنی و شاباڵېم ژاکنی؟
تامە وەشەو ژیوای شیرینیم چەنە گېری و بە بەرهەموو هەنگی سەرو سفرەو دڵیت دڵوەشەم کەری؟
ویرم تێکەڵوو ویریت کەری و بە باوڕام سەلمنی سەرو ئایینیت شەهات و ئیمان بارا؟
بە یاگۍ ئانەیە خڕوو سەرە ڕایم لابەری. وەروو کۊ کەمەری مڎیوە تاکو وڕۊرە ملمەرە و خاپوورم کەرۊ؟
داری بە هېزوو هەستەکام پاچیرە و مزگانی نەمامی بېڕېخەیم مڎەی؟
سرمیچەو یانەکەیت کەردېنە بەهانۍ و شانەکام بېیېنۍ کۊڵەکۍ ژیوایت؟
دڵوەش بە ڕۊشنای گڵۊپوو یانەیم کەری و بەڵام ڕۊشنای ڕۊجیاری وەنەم قەڎخە؟
بە کرامەتوو هەزار سەڵواتا مەژگیم خڵەتنی و چەنی شێتانی مەرحەببای کەری؟
وېنەو کڵەشیم چەنە شاریوە و بە هەزاران تیرۍ بۍ تەقۍ لاشەیم کەری سەرەنگە؟
شار بە شار و کۊڵان بە کۊڵان شۊنی نام و نیشانوو گەرەکەو هەقیقەتیرە گېڵوو ڕانمام شوویانن و قوتبەکېش کەوتېنۍ لەرزای.
ڕۊشمارم گمەن و ئەژمارش دەسمەنە بەرشیەن، دلۍ چن ڕوا جە ساڵێ ماچا ڕوێو دریان پەنەم، یۊبۊنەو گلەیاوە وزۊشوە ویرم، یۊچ بۊنەو ڕەسمیوە، ئەو یۊیچ پەی لاساویۍ کەردەی جە کەسانېو تەری.[1]