بەلای دەردەوە
مەستوورە، چی شېعرېنە دیارەن جوابو نامێوە مڎۊوە کە پەیش ئامێنە، ئاڎە گیرۊڎەو دەردۍ بیېنە، بەڵام بە یاوای نامە میسک بوەکۍ، دڵش گوشاڎ بیەن، خەم و دەردش پڕنان.
مەستوورە چڼین سەوگەندۍ وەرۊن بە زاتو خوڎای، گۆرەیی پېخامئاوەری، بە مانگۍ،بە وەرەتاوی، کە ئاڎۍ وەشی دنیێشەنۍ، گۆره هەم سەرهەنگېشەنۍ، یۊشا قەڼدەن، ئەویچ شەکەرەن، پاسە دیارەن دوۍ کەسېنۍ، کە ڕەنگە یۊشا خەسرەو خانی هامسەرش، ئەویچشا براش بۊن.
ئەمڕۆ کەفتەبېم بە لای دەردەوە
نامەی نەوجەستەم تازە کەردەوە
ساتێ زیاتەر خوابم بەردەوە
جەو دما نە ڕووی میهر و وەفاوە
هۆرېزام نە جا وېسام وە پاوە
تەعزیمی نامەی مشک فامم کەرد
مەڵهەم بی پەی زام، دەوا بی پەی دەرد
قەسەم بەو خودای هەفت ئاسمان بۊ
سەوگەند بە یەکتای حەق حاڵزان بۊ
قەسەم تەبارەک نووری ئەحمەد بۊ
قەسەمم بە تاج شاهی سەرمەد بۊ
قەسەمم بە میهر عالەم ئارا بۊ
قەسەمم بە حەق میهر و وەفا بۊ
قەسەمم بە ماه، سەوگەند بە پەروین
قەسەم بە وەحدەت ڕەب العالمین
بە گیانی فەرزەند وېنەی ماهی من
یەعنی دڵارای غوڵام شاهی من
بە مەرگی فەرزەند چوون گیانم قەسەم
خانم، وە سۊمای چاوانم قەسەم
بە نووری زەمیر دەروېشان قەسەم
بە سۊزی دەروون دڵڕېشان قەسەم
بە میهری قەلبی چەنی تۊم قەسەم
بە گیانی عەزیز یاری نۊم قەسەم
نییەن جەی دنیا پەی دڵەی تەنگم
شادی غەیر جە تۊ، غەیر جە سەرهەنگم
هەردووتان مایەی خۆشیی حاڵمەن
هەردووتان سالار دوورە ماڵمەن
هەردووتان دڵدار غەم ئەندېشمەن
هەردووتان مەرهەم دڵەی ڕېشمەن
هەردوو عەزیزتەر جە فەرزەندمەن
یەکێ شەکەرەن، یەکێ قەندمەن
باقی والسلام ئەی نووری دیدەم
بینایی چاوان هەم بەرگوزیدەم
موبارەکت بۊ بە شادمانی
پەی تەفریحی دام تېدا بوانی.[1]