شەبان مزوری
بباوەریا باشترین دەرونناس، کومەلناس و فەیلەسوف ئەگەر مروڤ داخوازێ ژێ بکەت بو مروڤی ڕاپورتەکێ دوروست کەن لسەر هوشمەندیا #جڤاک#ا کوردی دناڤا سالەکێ دا، ئەو مروڤ نە تەنیا هیچ ڕاپورتا دوروست نا کەن بەلکو دێ دەستبەرداری کارێ خوە بن و بچولا کەڤن. چونکە ئەستەمە کەسەک بشێت پیڤەرەک یانژی مێتودەک لێ کولینێ لسەر جڤاکا کوردی بکەتە بنگە ژبو لێکولنێ. گەلێ کورد ژ دەرڤەی ئەوا ئەم دبێژینی مروڤاتی دژیت. بهەمی سالوخێن نەباش گەلەک جیاوازە.
دڤی تەمەنێ من دەرباسکری من تێکەلی لگەل پتر ژ سەد نەتەوا لجیهانێ هەبویە، بەشەک تێکەلیێن سەردەما خواندنێ بون، بەشەک دی ژ ئەنجاما کاری بو، ئەگەرا سەرەکی بێگومان مشەختی بو. زۆر جاران مە کوردا ژبو کێمکرنا کەسەکی مە ناڤێ نەتەوەک دی دداناسەر، برامانا ئەم کورد زۆر لپێشیا وانین. پشتی ژ نێزیک من تێکەلیا وان نەتەوا کری و نەتەوێن دی ئەز گەهشتم وێ باوەریێ کو ئەگەر کەسەکێ بڤێت کەسەک ژ نەتەوا خوە کرێت کەت بلا بێژتێ ما تو کوردی.
من گومان نینە و پشتراستم کو جڤاکەک یەک دەنگ و یەک ڕەنگ، جڤاکەک بێ واتەیە. خوەشیا ژیانێ بپر دەنگی و ڕەنگیێ یە. هەبونا بوچونێن جودا لسەر هەر بابەتەکی یانژی کارەکی، وا دکەت کوجڤاک بکێم تر و ئەرزانترین نرخ و ڕەنج بگەهیتە ئارمانبجێن خوە. لێ موخابن کورد تا ڕۆژا ئەڤرو هزر دکەت بمێژیێ ( دێ ئەو بیت یان من گوتی، تەنها ئولێ من و مەزهەبێ من دوروستن، تەنها سەروکێ من زانایە، ڕاستی ئەوە یا لدەف و یێ لگەل من نەبیت دوژمنێ منە و دڤێت نەمینیت، هندەک نوینەرێن خودێ نە، هندەک نوینەرێن ڕێبەرینە، هندەک نوینەرێن ئبلیسینە، هندەک زەلامن لێ نوینەرێن ژنکانە، هندەک هێترو سێکسوێلن لێ لگەل هومۆسکسوێلانە، بەشەک دی ترانسن لێ خودێ نیاسن، خودێ نیاس دبێژن ئەڤە خودێ نە ناسن، پەدەکە نوکەرا داگیرکەرایە، یەکگرتو خزمەتکار و خولامێ ئیخوانیا یە، یەنەکە کارێ وێ جاشاتیە، کۆمەلە داعشە، کومونیست گاورە) باشە پرس لڤێرە لناڤ لکویژان نەتەوێ ئەڤ دیمەنە هەیە؟
زۆر جاران دبێژم ئەڤ ژیێ مایی دبیت هەفتیەک لسەر من دەرباس بیت و جڤاکا بدەڤ و لێڤێت یەکدیڤە نەبیت لسەر خەلکێ دی؟ بەرشەلونە و ڕیال فوتبولێ دکەن، کورد شەری دکەن، سەدر و مالکی ڤێکناکەن، کورد شەری دکەن، عەلی و عومەر ڤێکنا کەن، کورد شەری دکەن، ڕوس و ئەمریکا ڤێکنا کەن کورد شەری دکەن، ئەحمەد یاسین مر کوردا شەرکر، داعش هات کوردا شەر کر، حەشد هات کوردا شەر کر، بەشەک ژ خانمێن ئیرانێ دەرسوکێن خوە سوتن، کوردا شەرکر، تورکا ئاخا مە داگیرکر ل دو پارچێن دی، کوردا شەر کر، موبارەک چو مورسی هات کوردا شەر کر، مورسی چو سیسی هات، کوردا شەر کر، کەسەکی گوت مەککە ژ کوردستانێ پیروزترە، کوردا شەر کر، کەسەک دن گوت لسەر دەما ئوسمانێ کورێ ئەفان ژی گەندەلی هەبو، کوردا شەرکر…..هتد؟؟؟؟؟؟؟) کوردا شەر کر مەبەستا من شەرێ هەڤدو کر.
بوسرمانێ مە خەلکێ دی ناسدکەت ئەوێ باوەری بئولا وی نەی لێ دیسان دێ بێژیت کافرە، جەهنەمیە، دڤێت بمریت. بێ دینێ مە دێ بێژیت ئەڤێن دیندار پاشکەفتینە و ئەگەرا هەمی وێرانیا مەنە لەوما دڤێت بن بر ببن. یێ دەرسوکێ دکەن سەرێ خوە بو وان یێن بێ دەرسوک بێ ڕەوشتن، بێ دەرسوک دبێژن ئەڤێن دەرسوکێ دکەن سەرێ خوە دخوازن بێ ڕەوشتیا خوە لژێر دەرسوکێ ڤەشێرن.
ڤا ئەم نێزیک دبین ژ 500 سالیا چاکسازیا لناڤا دێرا کاتولیکا دا برێبەریا مارتین لوتر، کو پروتستانت ژناڤ دەرکەفتن. دەما ئمپراتورێ ئەلمان گوتی یەک دێر و یەک وەلات، پروتستانتا گوتن بیلا چەند دێر هەبن و یەک وەلات و گوتن بلا ئەم هەمی ئازاد بین کەس هزرا خوە لسەر کەسێ نە سەپینیت، لێ ئمپراتور قایل نە بو و جەنگا خوێنا وی دەست پێکر کو بسەلان ڤەکێشا، ماسترین وێرانی و کوشتن بدویف خوەدا هێلا. لێ پاشان زانی کو بنگەهێ مروڤاتیێ ئازادیا بیروباوەریانە.
پرس لڤێرە ئەم هەمی وەک تاکێ کورد دێ کەنگی دەستبەردارێ سەپاندنا هزر و بیروباوەرێن خوە بین لسەر کەسێن نە هەڤبیر لگەل مروڤی. کەنگی ئەم دێ قایل بین کو هیچ ئیدولوژی یەک نە بویە و نابیت وەک خوە بمینیت پشتی بورینا دەمەکی. یەک ئول نینە لدوف پێزانینا من لجیهانێ کو یەکگرتی مابیت، یەک ئیدولوژی نەمایە یەکگرتی بیت؟ بکوردی دگتون هەمی ڕێ دچن ئاشی، هەرچەند ئەڤە گوتنەک پر جوانە ئەگەر مروڤ لسەر ڕاوەستێت، واتە لڤێرە ئارمانج ئاشە نە ڕێکە. هەبونا گەلەک ڕێکا واتە هەبوونا گەلەک هزرا، هەبونا گەلەک هزرا ژێرخانا هەرا موکما پێشڤەچونا هەر وەلاتەکی و مللەتەکی یە.
بکورتی و بکوردی ئەم کورد ڕێنجبەرێن هەرێ باشین بو بیانیا و ژەهرا هەرا دژوارین بو یەکودو.[1]