ژ ڕەنگێ دلبەرا حووری؛ گەلۆ یا ڕەب دبن پەیدا
زەریفا شەنگ نها بووری؛ شەفەق دابوو د ئەرزێدا
شەفەق دا ئەرز و ئەسمانی؛ ل من دلبەر مەها سانی
دخووم سۆندێ ب سوبحانی؛ زولەیخا بوو د مسرێدا
تو چێتر بووی ژ زولەیخائێ؛ دخووم سۆندێ ب تاهائێ
نەهن وەک تە د دونیائێ؛ مونەووەر بوو د نوورێدا
مونەووەر بوو د نێڤ نوورێ؛ کەمەر دابوو ل سەر سوورێ
ژ ڕەنگێ دلبەرا حوورێ؛ ل من تیرا کەڤان لێدا
ل من دا تیرەکێ دژوار؛ سەرێ تیرێ ددل چوو خوار
دائیمی ئەزم دکم هاوار؛ وەکی مەجنوون ب دەشتێدا
وەکی مەجنوون دمینم ئەز؛ شوبهی بلبل دخوینم ئەز
حەتا گەنگی بمینم ئەز؛ د زیندان و د حەبسێدا
ئەزێ مامە د زیندانێ؛ وەکی یووسف ل کەنعانێ
نزام دلبەر گەلۆ کانێ؛ مە چاڤ مابوو د وێ ڕێدا
مە چاڤ مابوو ڕییا خەیلا؛ کو جارەک بێتە دەر لەیلا
دەرینی مە ژ واوەیلا؛ ببینم وێ د خەملێدا
ببینم جام و دیسائێ؛ شەپالا ڕەنگ ژ ڕەعنائێ
دخووم سۆندێ ب تاهائێ؛ نینە وەک تە د بەغدائێدا
نینە وەک تە د نێڤ ڕۆمێ؛ گەلی خەلقا نەکن لۆمێ
ئەزێ سۆتم شوبهی مۆمێ؛ کرم ئێسیر د گاڤێدا
کرم ئێسیر ژ ڕەیحانا؛ ڤەبهتم شوبهێ چووگانا
کرم وەک دینێ دێرانا؛ شوبهی شەیخێ د خلوێدا
ئەزێ سەردارێ خلوێمە؛ دائیمی ئەز دگەل وێمە
قەوی موحتاجێ سەلوێمە؛ شوکور یا ڕەب تە ئەڤ چەندا
#فەقێ تەیران# [1]