بەسما ل گەل شەش زارۆ و زەلامێ خوە ل ڕۆژا #03-08-2014# ل تاخێ نەسرە ل قەزا #شنگال#ێ کەڤتنە د دەستێ #داعش# دا و بەسما دبێژت: تیرۆرستێن داعش ب کوستەران ئەم ل کولانا د گێراندین بۆ فروتنێ د ناڤبەرا #تەلەعفەر# و ڕەقە دا ل کولانا گازی دکر(سەبایە). کچێن جوان د فروتنە عەرەبان. ھەروەسا ھەر گەنجەکێ ببا تیرۆرست کچەک ب دیاری دایێ.
بەسما بۆ ڕۆژناما ئەڤرۆ دبێژت: ل ڕۆژا کارەساتا شنگالێ دایک و بابێن من و ژنبرا و دو برازایێن من ل پێش چاڤێن من گولەباران کرن، چ جاران ئەو دیمەن ل پێش چاڤێن من ناچن.
ھەروەسا زێدەتر گۆت: “تیرۆرست ئەبو ئیبراھیم 25 جاران ئەز ل گەل خوە برم ل جارا ئێکی ئەز و چوار ژنێن دی ل گەل ئەبو ئیبراھیم چووین ئەم کرینە د ژورەکێ ڤە و جلکێن مە ل بەر مە کرن و ھەول دا بێی ڕازیبوونا ئەمیرێ خوە دەستدرێژیێ ل سەر مە بکەت، لێ ئەم ڕازی نەبووین چونکو بیێ ڕازیبوونا ئەمیری و سەرکردێن تیرۆرستان چ تیرۆرستان ماف نەبوو دەستدرێژی ل سەر کچ و ژنان بکەن”.
ڤێ ژنێ گۆتژی: “ل ڕۆژا #03-08-2014# زەلامێ من بر پشتی سێ ھەیڤ و 15 ڕۆژان ڕێک دا من کو ئەز ھەڤژینێ خوە ببینم ئەوژی بتنی ژبەر گوھۆڕینا ئایینی و پاشی بر ھەتا نوکە چ ژ چارەنڤیسێ وی نزانم دەمێ ئایینێ مە ھاتیە گوھارتن داعشا نڤیسارەکا گوھۆرینا ئایینی ددا مە بۆ وێ چەندێ دەمێ ژ باژێرەکێ بۆ ئێکێ دی دھێینە ڤەگۆھاستن داعش بزانن مە ئایینێ خوە گۆھارتیە ڕۆژانە ل تەلەعفەر شەش دەمژمیران ل قوتابخانێن ئایینی ئەم فێری نڤیژێ و قورئانێ دکرین”.
بەسمايێ دا زانین ژی، ھەر کچەک و ژنەکا جلکێن ڕەش نەکربانە ل بەر خوە داعشا ئەشکەنجە ددا و نە دھێلا خۆ پارچەیەکا لەشێ مە دیار ببیت ھندەک جاران دو ھەیڤا نەدھێلا ئەم سەرێ خوە ب شووین و ڕۆژانە ژی بتنی دو جاران خوارنەکا گەلەک بێ سەروبەر ددا مە و گەلەک جاران زارۆ ژ برسا دگریان و چ خوارن نەبوون ئەم ب دەینە زارۆیێن خوە ژیان گەلەکا سەخت و دژوار بوو د دەستێ داعشادا.
بەسمايێ ئاشکرا کر بۆ ماوێ سالەکێ ئەو ل مووسل و تەلەعفەر ھێلان و پاشی بۆ سوریا و باژێری ڕەقە ڤەگوھاستن و گۆت: ل ڕەقە ئەم کرینە د زیندانەکا بن ئەردیڤە بۆ ماوێ چەند ھەیڤا نەھێلا ڕۆژی ببینن.
ھەروەسا بەسما دبێژیت: “داعشا جلکێن کچێن 7 سالی ل بەر دکرن و سەح دکرە سینگێ وان ھەکە سینگێ ئێکێ ھاتبا بخوە دبر و ھندەک جاران دەمژمێر سێ شەڤێ ل ڕەقە داعش ھاتن ژن دبرن و زارۆیێن وان دھێلان ڤیچا زارۆ دگریان مە گەلەک دیمەنێن نەخوش ب چاڤێن خوە دیتن د دەستێن داعشادا نەدھێلا ژن ئاڤێ ب دەتە زارۆیێ خوە و ھاویژ بکەت”.
بەسما پشتی ژ دەستێن داعش ڕزگار بووی دبیژت: “رۆژانە دیمەنێن ئەشکەنجەدانێ و گریا کچ و زارۆیان دھێتە پیش چاڤێن من و ب دلەکێ سۆتی گۆت، نھا ئەز حەز دکەم چەکی ھەلگرم و بچم شەرێ داعشا بکەم و تولا خوە ژ وان عەرەبان ڤەکەم ھەموو عەرەبین بەعاج و تەلەعفەر و دوروبەرین شنگال بوون ھندەک ژ وان من ناس دکرن”.
ل دووماهيێ ژى گۆت: “250 کچ و پتر ژ 300 زارۆیان ل ڕەقە کرنە د زیندانەکا بن ئەردیڤە، دااعشا ھەموو کارێن خوە ب شەڤی ئەنجام ددان و ھەر جارەکا پێشمەرگا دەڤەرەک ڕزگار دکر و پێشڤە دھات تیرۆرستان چاڤدێری ل سەر ڕەڤاندیان توندتر دکر و ڤەدگوھاستن ژ جھەکێ بۆ ئێکێ دیتر”.[1]