Ew zaroka ku ji aliyê çeteyên DAIŞ`ê ve hatibû revandin, firotin, îşkencekirin û tecawiz lê hatî kirin û li hemberî hovîtiyê qîr dikir ji aliyê şervanên YPJ`ê ve di Pêngava Mirovî û Ewlehiyê ya li Kampa Holê de hate rizgarkirin. Wefa dê jiyana ku jê hatî dizîn ji nû ve dest pê bike.
Dema ku mirov li kûrahiya çavê Wefa dinêre tenê xemgîniyê û bêadeletiya cîhanê dibîne. Ew êş, xemgînî, hesret li bedena wê jî tesîr kiriye ku gelekî zeyîf e. “Êdî xwarinê naxwim û jê hez nakim. Rewşa min wiha ye, ez roj bi roj zeyîf dibim” bi van gotinan sedema zeyîfbûna xwe tîne ser ziman. Kî ev êş û zilim kişandibe helbet wê laşê wê nema radike. Çîroka Wefa ne tenê çavê wê di heman demê de bedena wê jî qîr dikir.
Jina ciwan a ezidî Wefa Elî Ebas ku niha 18 salî ye, di temenê 9 saliyê de bi xwişka xwe ya ker û lal re (13) ji aliyê çeteyên DAIŞ`ê ji gundê Koço yê Şengalê hatin revandin. Di wê temenê biçûk de ceteyan tecawîz lê kir û di encamê de ducanî bû. Ew çeteyên ku tecawîz lê kiribûn pitikê di zikê Wefa de qetil kir. Jina ciwan a êzidî 7 caran hatiye firotin. Zimanê wê, çand û ola wê lê qedexe bûye.
`ME QÎR DIKIR LÊ BÊ FEYDE BÛ`
Bihûşte Wefa li Koço bi êrişên DAIŞ`ê re herimî. Bûyerên 9 salan ne hêsan in ku di çend rûpelan de bên nivîsandin. Em ê tenê kurtejiyana 9 salan guhdar bikin, lê li ber çavê Wefa wekî temenê kalekî ye. Wefa der barê wê rojê de ku jiyana wê binguhev kiriye got: “Çeteyan di dibistanên gund de em dorpêç kirin. Ji şêxê eşîra Koço re gotin ku 3 roj bi were hene ku hûn xwe radestî me bikin an jî em ê we bi zorê bigrin. Şêx got ew xwe radestî wan nake. Paşê çeteyan gund dorpêç kirin, em li dibistanên gund kom kirin û dema ku em di dibistanê de bûn em ji hev cûda kirin. Bav, kesên temen mezin, dayik, zarok, keç û xort ji hev cûda kirin. Paşê bas anîn û me ber bi Mûsilê ve birin. Wê demê dayik û xwişkeke min bi min re bûn. Paşê em birin, nehiştin ku em û dayika xwe bihev re bimînin. Me qîr dikir lê bê feyde bû.”
TECAWÎZ LÊ KIRIN Û FROTIN
Çeteyan Wefa ji malbatê qut kir û ji Mûsilê ber bi Reqa re revand û di dibistanekê de hişt. “Her yek ji wan hat, yek ji me bir, firotin û kirîna me dest pê kir” bi van gotinan hovîtiya çeteyan tîne ser ziman.
Wefa gelek caran hewl dide ku xwe xilas bike lê bi ser neketiye. Wefa wiha berdewam kir: “Carnan keça ku tecawîz li wan dihatin kirin ew vedigerandin. Destpêka ku em ketin Reqa, me hewl da ku em birevin lê nebû. Hejmara me nêzî 70 kes bû. Di serê kolanê de me û DAIŞ`ê hev dû dît, dîsa hatin me girtin û vegerandin dibistanê. Dema ku em vegerandin li me dan û heqaret li me kirin. Her saetek yek dihat tecawîz li me dikir. Çeteyek di nîvê şevê de hat xwişka min a lal û ker bir. Min hewl da wê ji nava lepên wî xilas bikim, me qîr kir û nerazîbûnê xwe nîşan da lê nebû. Çete got ez ê wê tenê bibim. Çete xwişka min ji porê wê kişand û bir. Ji wê demê ve ez nizanim çarenûsa wê çi ye.”
7 CARAN HAT FIROTIN
Zilma li ser Wefa bi dawî nebû, ku heya li Kampa Holê jî berdewam kir. Wefa 7 caran tê firotin. Ev nebes bû tecawîzkirin berdewam kir. Wefa bi domdarî got: “Paşê yek hat bi zorê ez birim û destavêt min. Min jê re got hûn çima wisa li me dikin, mane em biçûk in wekî kevok û çûkên li ser daran in. Yê destpêkê meh û nîvek ez pê re mam. Paşê ez firotim kesekî din. Ez 7 caran hatim firotin. Di cara 6`an de got ku azadî, yanî kesek êdî te naxwaze û destdirêjiyê li te nake. Ji ber wê jî ew kes di bombebaranê de hate kuştin. Paşê min meta xwe li Dêrazorê dît û me bi hevre jiya. Ji Meyadînê em derbasî Hecînê û paşê Meraşida bûn. Li wir min bi Ebû Ehmed re zewicandin. Ez hevjîna wî a 3`yan bûm. Paşê em derbasî Baxozê bûn û ji wir hatin Kampa Holê. Agahî ji min re hat ku Ebû Ehmed di girtîgeha hevalan de hatiye kuştin. Hevjîna Ebû Ehmed a duyemîn derket Hewlêrê û ez li cem wan mam. Bi darê zorê li Kampa Holê bi kesek din re hatim zewicandin ku rojane tecawîz li min dikir.”
`EZ DITIRSIYAM BIBÊJIM ÊZIDÎ ME`
Li Kampa Holê jî Wefa dibe şahida gelek bûyeran. Der barê hovîtiya şaneyên veşartî yên DAIŞ`ê li kampê de Wefa ev tişt anîn ziman: “Di navbera wan de dijminahî, kîn û şer hebû. Jina li gor wan nebaş qetil û serjê dikirin. Dema ku min dibîhîst ez pir li ser xwe ditirsiyam ku rojekê çete werin û min serjê bikin. Min nedixwend û ne jî ji konê xwe derdiketim, têkiliya min tenê bi min re bû, kesekî min nas nedikir ji derveyî hevjînên mêrê min ku ez êzidi me. Ez ditirsiyam ku ez bêjim êzidî me, ji ber ku her digotin êzidî kafir in. Ji ber vê yekê min xwe bi kesî nedida nasîn.”
YPJ`Ê EW RIZGAR KIR
Di encama qonaxa duyemîn a Pêngava Mirovî û Ewlehiyê de ku bi pêşengiya Hêzên Ewlekariya Hundirîn û piştgiriya QSD, YPG, YPJ`ê hatiye destpêkirin Wefa li beşa 9`an hate rizgarkirin. Têkoşerên YPJ`ê ew rizgar kir. Wefa ji bo şervanên YPJ keyfxweşiya xwe anî ziman ku niha dixwaze vegere cem malbata xwe û ji nû ve dest bi jiyanê bike.
Herî dawî Wefa ji çeteyên ku jiyana wê dizîn re got: “Li ser tiştên ku we bi min kirin dema ku ez zarokeke biçûk bûm û tecawîz li min kirin û jiyana min veguherandin dojeh e, îşkence li min kirin xwedê ji wan ne razî be.”
ANHA
[1]