دەقێ پەیاما سەرۆک مەسعود بارزانی، ب هەلکەفتا دەربازبوونا 34 سالان ل سەر تاوانا ئەنفالێن بەهدینان :

ل 25 ئاب 1988 هەتا شەشێ ئیلۆنا 1988 ل درێژیا زنجیرە تاوانێن ڕژێما ئیراقێ ل دژی خەلکێ کوردستانێ، پشکەکا مەزن ژ دەڤەر و گوندێن بەهدینان کەفتنە بەر هەوا نە مرۆڤانە یا کیمیابارانکرن و گدەستەسەرکرن و کوشتن و ڤەگوهاستن و ئەنفالکرنا وەلاتیێن بێ تاوان ژ ئالیێ هێزێن ڕژێما وی سەردەمی یا ئیراقێ، ژ ئەنجامێ وێ تاوانا نە مرۆڤانە ب هزاران وەلاتیێن کوردستانێ شەهید و بێ سەروشوین و ئاوارە بوون و ب سەدان گوند هاتنە خرابکرن.
مەبەستا ڕژێمێ ژ وێ ڕەفتارا شوڤینی و ئه و تاوانە مەزن گوهۆرینا دیموگرافیا کوردستانێ و شکاندنا ئیرادا گەلێ کوردستانێ ب ڕێیا چەکێ و ستەمکاریێ بوو. بەلێ ئیرادا گەلێ کوردستانێ بۆ مانێ و ئازادیخوازیێ سەرکەفت و دوژمن و نەیار و تاوانبار کەفتنە د زبلدانا دیرۆکێدا.
ب هەلکەفتا 34 سالیا تاوانا ئەنفالێن بەهدینان سلاڤان بۆ گیانێ پاقژێ شەهیدێن کومکۆژیا کوردێن فەیلی و ئەنفالێن بەهدینان و گەرمیان و بارزان و هەموو شەهیدێن ڕێیا ئازادیا کوردستانێ دهنێرین. د ڤێ هەلکەفتا دلتەزیندا ڕادگەهینین کو گەلێ مە چ جاران زمانێ زۆرداریێ و تاوانێ قبوول ناکەت و پێدڤیە دەولەتا ئیراقێ ژی قەرەبوویا هەموو وان تاوان و ستەمکاریان بدەت کو دژی مللەتێ مە هاتینە ئەنجامدان.[1]