دهۆک، نەوزاد هلۆری:
ئەنجومەنێ ئافرەتێن دەورۆبەرێن دهۆک ب هەڤکاری ل گەل سکرتاریەتا ئێکەتیا ئافرەتێن کوردستانێ 20 ئافرەت خەلات کرن کو ل
سەر دەمێ ڕژێما بەعس هاتینە زیندان کرن و شەڤ و ڕۆژێن تاری بوراندینە.
غەریبا سەبری، ئێک ژ وان ئافرەتایە کو هاتیە خەلات کرن، بۆ ئەڤرۆ گۆت: (ئەز ل سالێن هەشتێیا ل گەل هەشت ژ ئەندامێن خێزانا خوە هاتمە گرتن و بۆ دەما دوو سالان ژی د زیندانێ دا مە شەڤ و ڕۆژێن نەخوش و ب ئازار و تاری بوراندن، دەمێ ئەز هاتیمە گرتن یا ب دوو گیان بووم و ل زیندانێ من زارویەک هەبوو).
غەریبایێ زێدەتر گۆت: (ئەڤە چەند سال بورین و هێشتا دل و دەروونێ مە ئارام نەبوینە، هندەک ژ کەسوکارێن مە شەهید بوون و هندەک ژی ل بەر لێبورینێ کەفتین، جهێ داخێ یە هەتا نوکە چو کەس و لایەنان چو تشت بو مە نەکریە).
نەزیفا عەبدولخالق، ئه و ژی ئافرەتەکا دیە کو هاتیە خەلات کرن دیار کر کو ژیێ وێ 10 سال بوون دەما هاتیە گرتن و گۆت: (ئەز ل پولا چارێ سەرەتایی بووم، ل وی دەمی ئەز ل گەل دایک و برایەکێ خوە هاتینە گرتن و دوو سال و چەند هەیڤان ماینە ل زیندانا ئالوکا، ل وێرێ هەموو نەخوشی ب سەرێ مە هاتینە، هەتا ژبەر نەبونا ئاڤێ نەچار بوین ب تەنەکەیان ئاڤا بارانان کوم بکەین و ڤەخوین، ئەز خوشکا سێ شەهیدان مە).
فەیروز عەباس، ئه و ژی ئافرەتەکا دیە سەبارەت بابەتی گۆت: (بیرا من ناهێت ئەز ل گەل کێ و سالا چەندێ گرت بووم، بەلێ بیرا من دهێت کو مە زۆر نەخوشی و ئاستەنگ برینە و چو جاران نەشێین ژبیر بکەین، بەلێ سوپاس بۆ خودێ نوکە ئەم د ئازادیێ دا دژین و دخوازیت خزمەت و ماندیبونا ئافرەتێن دناڤ زیندانێن سیاسی نەهێتە ژبیر کرن).
لاهیجان ڕەشید، بەرپرسا ئەنجومەنێ دەورۆبەرێن دهۆک ب وەکالەت بۆ ڕۆژناما ئەڤرۆ گۆت: (ب خوشحالیڤە ئەنجومەنێ ئافرەتێن دەورۆبەرێن دهۆک ب هەڤکاری ل گەل سکرتاریەتا ئافرەتێن کوردستانێ، 20 ئافرەت خەلاتکرن کو هەموو ژی ب سیاسی ل سالێن حەفتێیا و هەشتێیا هاتینە گرتن و زیندانکرن ژلایێ ڕژێما بەعس ڤە و سالێن ڕەش دناڤ زیندانێن ڕژێما بەعس دا بوراندینە، گونەها وان ئافرەتان تنێ ئه و بویە کو ددەما خوە دا هاریکاریا پێشمەرگەیان کریە و کورد پەروەر بوون و کار بۆ ئازادیا نوکە دکر).
لاهیجانێ زێدەتر گۆت: (رولێ ئافرەتان زۆر یێ گرنگە و وان خزمەتەکا باش بۆ کوردستانێ و ئەڤ ئازادیا نوکە ئەم تێدا دژین کریە، لەوا نابیت ئه و بهێنە ژبیر کرن و دڤێت خزمەتا وان بهێتە کرن).[1]