دلدار محەمەد
رۆژەکێ، من دەمەکێ ڤالا هەبوو، ما دێ بوچی وەکی وان نڤیسەران کەم ئەوێن خوە ب کەسێن نموونە و بلند نیشان ددەن، هەما راستی من ژی هاتن و چوون دناڤ تۆرێن جڤاکی دا دکر، ژ نیشکان ڤە پەرتووکەک ب بەرچاڤێن من کەفت، کۆمەکا کورتە چیرۆکان بوو ب ناڤێ( تابووت) ژ نڤێسینا عبدالرحمن بامەرنی. هەر ژ ئێکەم دیتن بۆ من پرسیار چێ بوو، بۆچی تابووت؟ بۆچی ئەڤ هەمی ناڤێن ئەدەبی هەین، بامەرنی ڤیا ڤێ کۆما قەشەنگ ب ناڤێ تابووتێ بناڤ بکەت؟! ژڤێ کورتە چیرۆکێ بۆ یادی و هەتا گەلەک دەمژمێر من دگەل ڤێ پەرتووکا ب ناڤێ تابووت دەرباس کرین، دەمەکی گەهشتمە وێ کورتە چیرۆکا ب ناڤێ (تابووت) یا پەرتووک پێ هاتیە ناڤکرنێ، ئەڤ تابووتە کەڤالەک بوو پر ژ برینێن جڤاکی، مرۆڤی هەست دکر چیرۆکنڤێسی دڤیا بێژیت: ئەم زیندیێن مرینە، یا مە بەس خوارن و ڤەخوارنە و بێ هەست و لڤین و هەلویست، دەمێ گۆتی (ئەڤە زێدەترە ژ چوار دەمژمێران ئەز دناڤ ڤێ تابووتێ دا درێژکری، دچوار دەمژمێران دا هەمی رۆژێن تەمەنێ من وەک شەریتەکا سینەمایی دکەڤنە بەرچاڤێن من و دەرباز دبن، شەریتەکا سینەمایی یا ژ هەستا ساڕ).
مرۆڤ هەست دکەت بامەرنی دڤێت بێژیت: ژیانا مە هەمی کورتە چیرۆکەکا پری مرن و بێ هەستە، ئەم ژ هەمی رابردوویێ خوە پەشیمان و دلسار و نە دلخوەشین، لەوما ژی رەڤێ بەرەڤ تابووتێ د هەلبژێرین، تابووتەک ب هەناسە و زیندیەک ب تەرزێ مریان!
پەیڤێن ڤێ چیرۆکێ هێشتا ئەز دگەل پێلا خوە برم، پرسیارەکێ خوە هەلاڤێت، ئەڤە چ هێزە، دەستێ کێ ل پشتە مە د مرینیت و ژیانێ ژ هەژی مە نابینیت، هەتا پێنڤیسێن نڤیسەران کورتە چیرۆکان ب ناڤێ تابووتان بۆمە ب ئافرینن؟ نەفرەت ل هەمی هێزێن زال، یێن ئەم نەهێلاین ئەم.
پاشی ئەز ب ڤەچنقین ڤە ژ گۆتنا خوە لێڤە بووم، هەکو من د رێزکەکێ دا دیتی، (ئەڤە دوماهی بریارا منە، ئەز هەستێن ساڕ و چاڤێن گەمار و گرتی و کەنیێ ژ قەستا ل پاش خوە بهێلم). پاشی من گۆتە خوە عەجێب نەمینە پێنڤیسەک ڤێ بریارێ ب هەمی هشیاری بدەت، ما جڤاکێ پری هەستێن بەستی گرتی و چاڤێن هەما بەس رەنگ چاڤ و چ تشتان نەبینن و لێڤێن دوور ژ گرنژینان ژ هەژی چنە تابووت و رەڤین بەرەڤ مراندنێ تێنەبیت! ما مرۆڤێ نە هشیار و دوور ژ هەر هەستەکی مرۆڤە، ما هەر ئێکێ د خۆت و ڤەدخۆت مرۆڤە؟ من دیت بامەرنییێ نڤیسەر دڤیا بێژیت ئێدی دەمە ژ ڤێ تابووتێ بدەرکەڤن، بۆ دەرکەفتنێ هوشیاربوونێ و رابوونە سەر پیا ئێڤار ژی بیت، نە درەنگە!
هەکو ئەز دناڤ ڤێ کورتە چیرۆکێ دا دچووم، پتر نیشانێن پرسیارێ خوە د هەلاڤێتن، ب تایبەتی هەکو دگۆت (چار دەمژمێران دناڤ ڤێ تابووتێ دا هێشتا تشتەک نەشیایە هزرێن من ب گوهۆڕیت!). راستی ژی سەیرە ژیان بگەهیت ئاستەکی مرۆڤ ژ چاڤێن گەمار برەڤیت و پەنایێ ببەتە بەر تابووتێ! کو ب دیتنامن ئەڤ هەست و بریارە دوماهیک ئاستێ بێ ئومێدبوونێ یە هێشتا ڤان هەمی ئێشان و هەستا، ڤان هەموو تابووت و کەلەخان نەشیایە هزرێن مە ب ئاڤا گوهۆڕینێ فرشک بکەن، ئەز وەسا تێگەهشتم نڤیسەری دڤێت بێژیت راستە ژیانێ گەلەک گڤاشتن هەنە، بەلێ ئەم یێن (تاک جڤاک) قوربانیێن هزرێن خوینە، چەند بارانێن گوهورینێ ببارن، چەند ئەم بۆ تەنابوونێ ژڤان ئێشانا هەمیا پەنایێ بۆ تابووتان ببەین یا بێ رامان و بێ بەرهەمە، ئه و قەیدا هزرێن مەیە رێک نەدایی پێشڤە بچین، هندی ئەم ژ گەمارا هزرێن خوە قورتال نەبین، گوهارتنێن ئەم دکەین ئەگەر مە روحا گوهۆڕینێ ژی ڤەگەراندە جەستەیێن خوە یێن مری هەر بێ مفایە، چونکی هزرێن مەنە بۆ تابووتان مالبچویکن هەتا ژ تابووتەکا پری بزمار دەردکەڤین بەرەڤ ئێکا دیترڤە دچین، ئەم د مرینە بەلێ هەناسە ددەین و عەشقا مە دگەل تابووتان عەشقەکا دێرینە د هەمی سات و چرکەیان دا بوومە دبیتە پەناگەه.
من تابووت دیت زەنگلەکا هشیارکرنێ، بەلێ ئەرێ نڤیسەرەک دێ شێت هشیارکرنێ دجڤاکەکی دا بکەت دناڤبەرا تاکێن وی و خواندەڤایێ دا، دیوارێن ب قەدەر درێژیا دیوارێ چینێ هەبن! جڤاکەک دێ شێت ب کورتە چیرۆکەکێ ژ تابووتێ دەربکەڤیت، کو هەتا نوکە دناڤ وی جڤاکی دا کتێب بێ بهاترین تشت بیت، ئاهەنگێن ئیمزاکرنێ یێن کتێبان ب هەروە نەبن ژ کەفتنا تایێ شەرمێ نەبیت کەس ناکریت.
یا ژمن ڤە تابووتا بامەرنی یا جوان و کارتێکەربوو، بەلێ نە بوو تاکێن جڤاکەکی کو ژ مێژە گۆڕێ خوە ب دەستداهێلانێ کولایی و بۆ بەرژەوەندێ نووکرن کریە د هزار تابووتان دا، ژمێژەیە هەمی دبێژنەمە خودێ ژێ رازی بیت، بەلێ ما تو بێژی خودێ ژ دەستداهێلایی و بێدەنگ و هەلویستان رازی ببیت؟![1]