کاروان کوژەیە
ئەم ئیدیۆمە بۆ یەکێک بەکاردێت، کە زۆر فێڵبازە و خەڵک هەڵدەخەڵەتێنێت و لە خشتەیان دەبات، وەک کاروان کوژە، کە ئەستێرەیەکە بە هەڵهاتنی جارەهای جار، سەری لە کاروان و قافڵەچی شێواندووە، وا تێگەیشتوون، کە ئه و ڕوناکییە، ڕۆشنایی ڕۆژبوونەوە و شەوقی بەرەبەیانە، بۆیە هەڵساون و کەوتوونەتە ڕێگا، بەڵام لە پڕ و لەناکاو ئەم ئەستێرەیە، ون بووە و ڕێگاکە تاریک بووە و ڕێگەی بە کاروانچییان هەڵە کردووە، لە چۆڵ و بیابان ماونەتەوە و توشی جۆرەها تەنگ و چەڵەمە و کارەسات و دەرد بوون، تاوەکو کوشتن و مردنیشیان تێکەوتووە، واتە: بۆیە ناوی ئه و ئەستێرەیان ناو ناوە (کاروان کوژە)، چونکە کاروانی بە کوشت داوە. ئەمە و جۆرەها ئەستێرەی دیکەش لە کوردەواریدا ناوی بۆ دانراوە، ئەمەش لە ئەنجامی پێویستییەوە بووە، چونکە بەهۆی ئەستێرەکانەوە، کاتی زانیوە و وەرزەکانی پی ناسیوە و بازرگانی و کشتوکاڵی لەسەر ئه و بنچینەیە کردووە.[1]