دەقی گوتارەکەی مەسرور بارزانی کە لە هەشتەمین فێستیڤاڵی نێودەوڵەتیی فیلم لە دهۆک پێشکەشی کرد:
ئەز گەلەک خۆشحالم، ئەڤرۆ ل هەشتەمین فیلمە فەستیڤاڵا نێڤدەولەتی یا دهۆکێ پشکدارم. دەستخۆشیێ ل رێڤەبەر و رێکخەرێن ڤێ فەستیڤاڵێ دکەم، کو ئەڤە چەند ساڵن ب رەنگەکێ سەرکەفتی فەستیڤاڵێ ئەنجام ددەن.
ب خێرهاتنەکا گەرم ل هەموو مێهڤانێن بەرێز و سینەماکار و فیلمسازان دکەم، کو ژ دەرڤەی هەرێما کوردستانێ هاتینە، زۆر ب خێر بێن.
من بهیست کو تیمەکا هونەرمەند و سینەماکارێن ئەفغانی ژی یێن لڤر، ئەز ب خێرهاتەکا گەرم یا وان ژی دکەم، چونکی رەوشا وەڵاتێ وان ژی وەکی وەڵاتێ مە یێ دژوارە، لێ بەلێ گرنگیدان ب کارێ فیلمسازی و هونەریێ بۆ بەرچاڤکرنا ئێش و ژانێن گەلێ وان نیشانا وێ یەکییە، کو باندۆرا هونەرا فیلم و سینەمایێ لسەر جڤاکێ و جیهانێ چەندا زۆرە، ژبەر وێ یەکێ دەستخۆشیێ لێ دکەم و دەستخۆشیێ ل رێخەرێن ڤێ فەستەڤاڵێ ژی دکەم.
جهێ خۆشحالیێ یە، کو ب رێکا ڤێ فەستیڤاڵێ، سینەماکار و فیلمسازێن کوردستانێ و وەڵاتێن دەوروبەر و جیهانێ پێگڤە دروونن و یەک ودوو دناسن و دانوستاندنان لسەر بەرهەمێن خۆ و پێشڤەبەرنا سینەمایێ و فیلمسازیێ ب گشتی دکەن. ئەڤ جۆرێ فەستیڤاڵان، دەلیڤەیێن زۆر گرنگن بۆ پێشڤەچوونا هونەرێ سینەمایێ و د هەمان دەمدا بۆ پتر ناساندنا کوردستانێ.
بێگومان سینەما، هونەرەکا ئێکجار گرنگ و کاریگەرە، کو دشیان دایە ب رێکا ڤی هونەری، چەندین پەیامێن گرنگ و مرۆڤایەتی بگەهینیتە خەلکی، هەروەتۆڤ سینەما دکاریت رۆلەکێ کاریگەر د پرۆسەیا هشیارکرنەڤێ و پێشڤەبرنا جڤاکی دا هەبیت.
گەلێ کوردستانێ، ب درێژاهییا دیروکا خۆ، راستی دەیان کارەسات، جینۆساید، سیاسەتا رەگەزپەرستیێ و ژناڤبرنێ بوویە. هەر بۆ نموونە، بتنێ د پێنجی ساڵێن دەربازبووییدا تاوانێن مەزن و هۆڤایەتی ل دژی گەلێ کوردستانێ هاتینە ئەنجام دان. مخابن ئەڤ تاوانە و دیروکا تراژیدی یا گەلێ کوردستانێ، وەکو پێدڤی د سینەمایێدا رەنگڤەنەدایە. ل دەمەکی کو ژ هەژی هندێ نە کو ژ لایێ سینەماکارێن کوردستانی و بیانیڤە، ببنە دەیان فیلمێن کاریگەر و ب هێز. ل هەمان دەمدا، دیروکا گەلێ کوردستانێ، یا تژییە ژ سەدان داستانێن ئازایەتی و قەهرەمانیێ، هەروەتۆڤ چەندین سەرکردە و رێبەر و کەسایەتی و هێمایێن نیشتیمانی و وەڵاتپارێزیێ هەنە، کو هەژی وێ چەندێ نە ببنە مژار و بابەتێن سینەمایێ و بەرهەمێن نوکە و پاشەرۆژێ.
هەروەتۆڤ، جوگرافیا و سروشتێ هەرێما کوردستانێ، رەنگە زۆر ب گونجن کو ببنە جهێن وێنەگرتنا فیلمێن سینەمایی بهێنە بکارئینان. حکومەتا هەرێما کوردستانێ، پێشوازیێ ل وان هەموو سینەماکاران دکەت، کو بهێن و وێنەیێن خۆ بگرن. ژ بۆ ڤی مەرەمێ ژی، د چارچووڤەیێ رێکار و یاسایێن کار پێ دهیتە کرن، ئەم د ئامادەینە بۆ هەر هەڤکاری و پشتەڤانییەکا پێتڤی.
حکومەتا هەرێما کوردستانێ پشتەڤانییا خۆ بۆ پێشڤەبرنا بوارێ کەلتووری و رەوشەنبیری ل کوردستانی ب گشتی دووپات دکەتەڤە و ل ساڵێن دەربازبووییدا، حکومەت لدویڤ ئیماکاناتێن بەردەست هاروکارێ بوارێ سینەمایی و هونەری بوویە و ب شێوەیێن ماددی و مەعنەوی و نوکە ژی ب هەمان رەنگ، ئەم د ئامادەینە ل گۆڕەی شیانێن حکومەتێ، هەماهەنگ و هەڤکار بین. هەر چەندە هنگ د ئاگەهدارن کو مخابن ل دو ساڵێن دەربازبوویی، ب ئەگەرێ قەیرانا دارایی، هەرێما کوردستانێ د رەوشەکا زەحمەت یا دارایی دایە، کو هەتا نوکە ژی مە نەوەستیاینە ب تەمامی ژ ئەڤێ رەوشا ب زەحمەت دەرباز بین. نوکە کارێ بەراهیێ یێ حکومەتێ دابینکرنا مووچەیێ مووچەخۆرێن هەرێما کوردستانێ یە، لێ دگەل ڤێ چەندێ ژی ئەم کار دکەین بۆ ئاڤاکرنا ژێرخانەکا ب هێز یا ئابووری و د هەمان دەمدا ژی پێشڤەبەرنا بوارێ کەلتووری.
جارەکا دی، دەستخۆشیێ ل رێکخەرێن ڤێ فەستیڤاڵێ دکەم و هیڤییا سەرکەفتنێ بۆ سینەماکارێن کوردستانێ دخوازم و هیڤیدارم ل ئاستێ وێ بەرپرسیاریێ بن، یا ل سەر ملێن وان و ب رەنگەکێ بابەتی، رەوش و دوورهێل و دیروکا گەلێ کوردستانێ ب باشی ب رێکا ئەکرانێن سینەمایێ، بگەهیننە هەموو جیهانێ.[1]