بەپێی بەدواداچوونی باسنیوز، دوای دەستپێکردنی تۆماکردنی ناوی مووچەخۆران و فەرمانبەران تا داخستنی تۆمارکردن، وێڕای ئەوانەی کە قوتابیی تواناسازی و مۆڵەتی بێ مووچە و خانەنشینانی دەرەوەی وڵات و ئەوانەیشی لەناوخۆ تۆمار نەکراون، 43 هەزار مووچەخۆر بەهۆی ئەوەی خۆیان تۆمار نەکردووە، لە لیستی مووچەدا لابراون.
بەپێی زانیارییەکان، یەک ملیۆن و 305 هەزار مووچەخۆر لە هەرێمی کوردستان تۆمار کراون، بەڵام تا ئێستا یەک ملیۆن و 202 هەزار کەس خۆیان تۆمار کردووە، نزیکەی 60 هەزار کەسی تریش لە قوتابی و مۆڵەتدراوەکان و خانەنشینانی دەرەوە و ئاسایش ماون تۆمار بکرێن.
بەپێی داتاکان، دەردەکەوێت 43 هەزار مووچەخۆر خۆیان تۆمار نەکردووە، یانیش لە لیستی مووچەدا دەرهێندراون.
بەپێی بەدواداچوونەکان، بەشێک لەو کەسانەی لە تۆماری مووچەدا تۆمار نەکراون، پەیوەندییان بەوەوە هەیە دوو مووچەی نایاساییان هەبووە، لە ترسی لێرسینەوەی یاسایی، تەنیا لە یەک شوێندا خۆیان لە سیستەمی بایۆمەتری تۆمار کردووە و لە فەرمانگەی پێشوویان دەستیان لە کار کێشاوەتەوە. بەشێکی تریشیان پەیوەندییان بە مووچەی کۆمەڵایەتییەوە هەیە، لە کەمئەندامان و خاوەن پێداویستیی تایبەت.
ئەگەر ئەو 43 هەزار کەسە مانگانە هەر یەکەیان 400 هەزار دیناری هەبووبێت، ئەوا مانگانە 17 ملیار و 200 ملیۆن دینار بۆ بودجەی گشتی دەگەڕێتەوە.
سەمیر هەورامی، گوتەبێژی سیستمی بایۆمەتریی مووچە دووپاتی کردەوە، کە ژمارەیەک لە مووچەخۆران خۆیان تۆمار نەکردووە، یانیش تۆمار نەکراون، گوتی: ”یەک ملیۆن و 202 هەزار مووچەخۆر تۆمار کراون، بە گشتی 60 هەزار کەس ماون تۆمار بکرێن، بەشێک لەوانە قوتابییانی تواناسازی و مۆڵەتی بێ مووچە و مووچەخۆرانی دەرەوەی وڵاتن“.
روونیشی کردەوە، تیمەکانیان دەستیان کردووە بە بەراوردکردنی داتا تۆمارکراوەکان، گوتیشی: ”دەست کراوە بە بەراوردکردن و پڕۆسەی وردبینیکردن بۆ ئەو ناوانەی لە سیستەمەکە تۆمار کراون، ئەوەی دوو مووچەی نایاسایی هەبێت، ئەوا لە لیستی مووچە دەردەهێندرێت“.
هەورامی دووپاتی کردەوە، یەک ملیۆن و 305 هەزار مووچەخۆر لە هەرێمی کوردستاندا هەن، بەڵام تا ئێستا یەک ملیۆن و 202 هەزار خۆیان تۆمار کردووە، نزیکەی 60 هەزار کەسی تریش ماون تۆمار بکرێن.
ئارام حاتەم محەمەد، بەڕێوەبەری تۆڕی پاراستنی کۆمەڵایەتی لە وەزارەتی کار و کاروباری کۆمەڵایەتیی حکوومەتی هەرێمی کوردستان بە (باس)ی ڕاگەیاند، زۆر لە کەمئەندامان و خاوەند پێداویستیی تایبەت حۆیان لە تۆماری بایۆمەتری تۆمار نەکردووە.
ئاماژەی بە هۆکاری خۆ تۆمارنەکردنەکەشیان دا و گوتی: ”زۆر لەو کەسانەی خۆیان تۆمار نەکردووە هۆکارەکەی ئەوە بووە کە ئەوان کەمئەندام نەبوونە و بە فێڵ و واستە خۆیان تۆمار کردووە، هەیە دوو مووچەی هەبووە، لە ترسی لێپرسینەوە تەنیا خۆی لە تۆماری مووچەخۆری تۆمار کردووە“.
ئاشکراشی کرد، بەپێی ئەو داتایانەی لەبەردەستیانە، زیاتر لە هەزار کەس لە کەمئەندامان لە سیستەمی تۆماری مووچە خۆیان ناونووس نەکردووە.
پێشووتر هیوا ئەفەندی، سەرۆکی فەرمانگەی تەکنەلۆژیا و زانیاری بۆ (باس) ئاشکرای کردبوو: (لە هەر 100 هەزار ناوی تۆمارکراو لە بایۆمەتریدا 10 هەزار کەس ناوی دووبارە بووەتەوە).
سەمیر هەورامی ئاماژەی بەوەش دا، تا ئێستا هیچ ژمارەیەکیان لەسەر دوو مووچەییەکان بۆ دەرنەکەوتووە، چونکە پڕۆسەکە تەواو نەبووە، گوتیشی: ”ناوەکان بەتەواوی داخیل نەکراون، کە ئەو پڕۆسە تەواو بوو فەرمان بە سێرڤەرەکە دەکرێت کە ناوی دوو مووچەییەکان بە یاسایی و نایاسایی جیا دەکرێنەوە“.
ئەو جەخت دەکاتەوە، لە مووچەی مانگی داهاتوودا ئەوەی تۆماری بایۆمەتریی نەبێت و کۆدی سیستەمی تۆمارکردنی نەبێت، مووچەی پێ نادرێت، بەمەش داتای تەواوی ئەو کەسانە ئاشکرا دەبێت کە خۆیان لە سیستەمی بایۆمەتریدا تۆمار نەکردووە.[1]
ماڵپەڕی باسنیوز: 22-08-2017