کۆسار عوسمان
وەک کاردانەوەیەک بەرانبەر ئەو وشەیەی جەلال ئادان، بریکاری سەرۆکی پەڕڵەمانی تورکیا ڕۆژی 26-10-2023 ئاڕاستەی پارتی یەکسانی و دیموکراسیی گەلان-#هەدەپە# ی کرد، پەڕڵەمانتارانی ئەو پارتە لە کۆبوونەوەی ڕۆژی سێشەممەدا ڕۆیشتنە سەر سەکۆی وتاری پەڕڵەمان و بە چەپڵەلێدان سەرکۆنەیان کرد.
جوێنەکەی بریکاری سەرۆکی پەڕڵەمان کە گرژی درووستکرد ئەوە بوو دوای قسەکانی پەڕڵەمانتارێکی هەدەپ، وشەی گەوادی بەکارهێنا.
کۆبوونەوەی ڕۆژی سێشەممە 21-11-2023ی پەڕڵەمانی تورکیا گرژی تێکەوت. پەڕڵەمانتارانی هەدەپ دەڵێن، دەبێت جەلال ئادان بەهۆی ئەو زمانەی بەرانبەر فراکسیۆنی هەدەپەی بەکارهێنا، داوای لێبووردن بکات.
سری ساکیک، پەڕڵەمانتاری هەدەپ بە ئادانی گوت، دەبێت داوای لێبووردن لەم پەڕڵەمانە و لە ئێمەش بکەیت؛ هەروەها داوای لێبووردن لە ملیۆنان دەنگدەری ئێمە بکەیت؛ ناتوانیت بەمشێوەیە بابەتەکە تێپەڕێنیت.
ئەو گوتەیەی ئادان لە کاتێکدایە، ئەو وشەیەی بەکاری هێنابوو لە کاتێکدا بوو وای زانیبوو مایکەکەی داخراوە، کەچی مایک کراوە بوو و لە ڤیدیۆکانیشدا بە ئاسانی ئەو وشەیە دەبیسترێت. سری ساکیک بە بریکاری سەرۆکی پەڕڵەمانی گوت، دەبێت داوای لێبووردن بکەیت.
لەو کاتەدا جەلال ئادان ویستی بابەتەکە دابخات و پەڕڵەمانتارێکی بانگهێشتی سەر سەکۆ کرد تاوەکوو وتار پێشکەش بکات. بەڵام سری ساکیک بێ مایک و لە دەرەوەی کورسییەکانی فراکسیۆنەکەی قسەی دەکرد. لەو نێوەندەدا جەلال ئادان پێی گوت، درۆ دەکەیت؛ سری ساکیک وەڵامی دایەوە و وتی، تۆ درۆ دەکەیت.
پەڕڵەمانتارانی هەدەپ چوونە سەر سەکۆی پەڕڵەمان
گرژی بەردەوام بوو و هەرچۆنێک بێت ئەو پەڕڵەمانتارەی لەسەر سەکۆ بوو، وتارەکەی پێشکەشکرد. دواتر ساروهان ئۆڵوچ، پەڕڵەمانتاری هەدەپ لە بازنەی ئەنتاڵیا وتی، ئێمە ئەم شێوازەی کارکردن قبووڵ ناکەین. هێشتا داوای لێبووردن ناکەن.
ئەوەبوو پەڕڵەمانتارانی هەدەپ کورسییەکانیان جێهێشت و چوونە سەر سەکۆی نێو پەڕڵەمان و بە چەپڵە، مامەڵەی جەلال ئادانیان سەرکۆنە کرد.
هەرچەندە جەلال ئادان زۆری لەو پەڕڵەمانتارە کرد کە لە شوێنی خۆیەوە وتاری پێشکەش دەکرد لە قسەکردن بەردەوام بێت، دەنگی چەپڵەڕێزانی پەڕڵەمانتارانی هەدەپ زۆر زاڵ بوو.
چی ڕوویدابوو؟
ڕۆژی 26-10-2023 دوای ئەوەی سری ساکیک، پەڕڵەمانتاری پارتی یەکسانی و دیموکراسیی گەلان-هەدەپ لە کۆبوونەوەی پەڕڵەماندا ئەو گوتانەی ڕەجەب تەیب ئەردۆغان، سەرۆککۆماری تورکیای وەبیرهێنایەوە کە ساڵی 2013 لەبارەی کورد و جوگرافیای کوردستان کردبووی و بەرپەرچی جەهەپە و مەهەپەی دایەوە، دیالۆگ لەنێوان جەلال ئادان، بریکاری سەرۆکی پەڕڵەمان و سری ساکیک درووستبوو. دوای دیالۆگەکە جەلال ئادان وای زانی مایکرۆفۆنەکەی داخراوە و وشەی گەوادی بەکارهێنا. ئەگەرچی ئەو وشەیە لە پرۆتۆڵی پەڕڵەمان تۆمارنەکراوە، بەڵام لە ڤیدیۆی ڕاستەوخۆی پەڕڵەماندا بەڕوونی تۆمارکراوە و لە تۆڕە کۆمەڵایەتییەکانیشدا بڵاوکراوەتەوە.[1]

هێمن عەساف
پەڕڵەمانتارێکی پارتی داد و گەشەپێدان (ئاکپارتی) ، هێرش دەکاتە سەر پەڕڵەمانتارێکی پارتی یەکسانی و دیموکراسیی گەلان (#هەدەپ# ) و پێیدەڵێت: تیرۆریست، پەڕڵەمانتارەکەی هەدەپیش لە وەڵامدا پێیدەڵێت باوکت تیرۆریستە، خۆت تیرۆریستی.

شەوی ڕابردوو، 14-11- 2023، مەرال دانیش بێشتاش، جێگری سەرۆکی فراکسیۆنی هەدەپ، لە کۆبوونەوەیەکی پەڕڵەماندا سەبارەت بە گوشاری دەسەڵات بۆ سەر کورد، وتارێکی پێشکەشکرد و لە کاتی وتارەکەیدا پەڕڵەمانتارێکی فراکسیۆنی ئاکپارتی، بە تیرۆریست ناوی برد، ئەویش یەکسەر وەڵامیدایەوە و پێیوت باوکت تیرۆریستە، خۆت تیرۆریستی، بەهۆیەوە گرژیی لەنێوان پەڕڵەمانتارانی هەردوو فراکسیۆن درووستبوو.

مەرال دانیش بێشتاش لە وتارەکەیدا باسی لەوە دەکرد لە تورکیا جیاکاری لە دژی کورد و عەلەوییەکان دەکرێت و وتی؛ ڕێگری لە عەبدوڵڵا ئۆجەلان دەکرێت چاوی بە کەسوکار و پارێزەرانی بکەوێت، دوورگەی ئیمراڵی، گرتووخانەیەکی ئەم وڵاتە نییە؟ دامەزراوەیەکی سەر بە یاسای سزاکان نییە؟ بۆچی ڕێگەنادەن چاوی بە کەسوکاری بکەوێت؟ دەزانن ڕێگەنەدان بە بینینی کەسوکار و خێزان و پارێزەرانی مانای چییە؟ مانای ئەوەیە من دەوڵەتی یاسا نیم، دەوڵەتی هۆز و خێڵم. بە مانای ئەوە دێت کە چەتەئاسا ئەم وڵاتە بەڕێوەدەبەم.

ئەو پەڕڵەمانتارەی هەدەپ، وتیشی ئەگەر لێرە ڕێز لە یاسا نەگیرێت، لێرە کار بە یاساکان نەکرێت، لە کوێ کاری پێدەکرێت؟ لە کوێ داوای یاسا بکەین؟ نۆ پەڕڵەمانتارمان بەبێ بڕیاری دادگە تەنیا بەهۆی بڕیارێکی وەزیری ناوخۆ، ناتوانن گەشت بکەن. تەنانەت بەشێک لە پەڕڵەمانتارانمان ناتوانن بچنە کۆبوونەوەی ئەو لیژنانەی تێیدا ئەندامن، کە یەکێکیان جێگری سەرۆکی ئەو پەڕڵەمانەیە. ئەگەر ئەمە ڕەفتاری چەتەیی نەبێت، چییە؟ با یەکێک ناوێکی ڕەوای پێبدات من، ڕێزی لێبگرم.

لەو کاتەی مەرال دانیش بێشتاش قسەی دەکرد، پەڕڵەمانتارێک لە ڕیزی فراکسیۆنی ئاکپارتی، بە دەنگێکی بەرز وتی تیرۆریست. ئەویش دوای ئاوڕدانەوە بۆ پەڕڵەمانتارەکە، پێیوت باوکت تیرۆریستە، خۆت تیرۆریستی دوای ئەمە، گرژیی لەنێوان پەڕڵەمانتارانی هەردوو فراکسیۆنەکە درووستبوو. [1]