90٪ی دەریاچەی #ورمێ# کە دووەمین دەریاچەی گەورەی ئاوی سوێری جیهان بوو، لە ماوەی 30 ساڵی ڕابردوودا وشک بووە.
بەهروز ساری سەراف، بەڕێوەبەری گروپی کەشناسیی زانکۆی تەبرێزی ئێران لە لێدوانێکدا بۆ ئاژانسە هەواڵییەکانی ناوخۆی ئەو وڵاتە ڕایگەیاندووە، کە 90٪ی دەریاچەی ورمێ وشک بووە و ڕەخنەی جدیی لە سیاسەتەکانی دەوڵەتی ئێران گرتووە.
ساری سەراف، وتوویەتی: بەرپرسانی حکومی لە ئێران لە خۆیانەو بەڵێن بە خەڵک دەدەن، سەرەڕای ئەوەی ئاوی دەریاچەی ورمێ ڕووی لە وشکبوونی بەتەواوەتییە، بەرپرسان بەڵێنی دروستکردنی بەنداو دەدەنە خەڵک بۆ گەشەپێدان بە کشتوکاڵ لە دەوروبەری ورمێ.
ئەو مامۆستایەی کەشناسی لە زانکۆی تەبرێز وتووشیەتی، لە ماوەی 30 ساڵی ڕابردوودا 90٪ی ئاوی دەریاچەی ورمێ وشک بووە.
ڕاشیگەیاندووە، کە وشکبوونی ئاوی دەریاچەی ورمێ وایکردووە کە کەشی ناوچەکە گەرم بێت، تەنانەت لە وەرزی سەرماشدا.[1]
#25-12-2017#

بەڕێوەبەری بەرنامەداڕێژی بۆ ناوەندیی وەژاندنەوەی #دەریاچەی ورمێ# وتی: چاوەڕوان دەکرێت لە مانگی خەرمانانی ئەمساڵ ئاستی دەریاچەی ورمێ دەگاتە 1700 کیلۆمەتری چوارگۆش.
بەپێی هەواڵی کوردپرێس:،مەسعوود تەجریشی ئاماژەی دایە دوایین دۆخی دەریاچەی ورمێ و ڕای­گەیاند: هاوینی ئەمساڵ هەوای ئازەربایجانی ڕۆژئاوا 2 پلەی گەرما لەچاو مامناوەندی 40 ساڵی ڕابردوو زیادی کردووە و ئەم بابەتە بووەتە هۆی ئەوەی‌ بە هەڵم بوونی ئاوی دەریاچەکە خێراتر بێتەوە.
ناوبراو ڕوونیشی کردەوە: چاوەڕوان دەکرێت لە کۆتایی مانگی خەرمانانی ئەمساڵدا ئاستی دەریاچەی ورمێ بە 1700 تا 1800 کیلۆمەتری چوارگۆش بگات کە پێش لە دەست­ بەکاربوونی چالاکیی ناوەندی وە‌ژاندنەوەشدا 1700 کیلۆمەتری چوارگۆش بوو.
ماڵپەڕی کوردپرێس: 08-08-2017
تەجریشی زیادیشی کرد: دابەزینی باران بارینەکان و زیادبوونی ڕێژەی پلەی گەرما و تەرخان نەدانی گوژمەی وەژینەوەی دەریاچەی ورمێ بووەتە هۆی ئەوەی تاکوو ئەمساڵ بە پێی بەرنامەی پێشبینی­کراو کار نەکەین.

گەرچی بارانبارینەکانی ڕۆژانی ڕابردوو هەم بەستێن و هەم ڕووپێوی ئاوی دەریاچەی #ورمێ#ی زیاد کردووە، بەڵام هێشتاش مەترسیی وشکبوونی دەریاچەکە نەڕەویوەتەوە.
پارێزگاری ورمێ لە یەکەم کۆڕبەندی تەندروستیی پارێزگاکەدا کە ڕۆژی پێنجشەممە بەڕێوەچوو هۆشداریدا کە لە ئەگەری وشکبوونی دەریاچەی ورمێ تەندروستیی 20 ملیۆن کەس لە ئێران ڕووبەڕووی مەترسی دەبێتەوە و دەبێ شوێنی ژیانیان بگۆڕن.
محەممەد مەهدی شەهریاری پارێزگاری ورمێ جەختی لەوە کردەوە کە بوژانەوەی دەریاچەکە پێویستی بە فەرهەنگسازی هەیە بۆ ئەوەی جەماوەریش لەو پرسەدا ڕۆڵیان هەبێ. ڕەخنەی لە دامەزراوەی جیهادی کشتوکاڵیی پارێزگای ورمێ گرت کە وەک بەرپرسی ئەو بوارە کەمتەرخەمیی کردووە لە ئەرکەکانیدا.
دەریاچەی ورمێ گەورەترین دەریاچەی ئاوی سوێری ڕۆژهەڵاتی ناوەڕاست و شەشەم گەورەترین دەریاچەی ئاوی سوێری جیهانە. لە ئەگەری وشکبوونی دەریاچەکە بیابانێکی خوێ بەجێ دەمێنێ کە لەگەڵ هەڵکردنی هەر بایەکدا تەپوتۆزی خوێ ژیانی خەڵکی دەوروبەر بەتایبەتی لە ڕووی نەخۆشییەکانی کۆ ئەندامی هەناسە دەخاتە مەترسییەوە و دەبێتە هۆی وشکبوونی دارستان و کێڵگەکانی دەورووبەریش.[1]
#02-03-2018#