#ئاراس شێخ جەنگی#:
#بافڵ تاڵەبانی#، مادەم حەزی لە شێتخانەیە با واز لە یەکێتی بێنێ و حیزبێکی تر بەناوی یەکێتی شێتخانەکانی کوردستان دابنێ.

دوای ئەوەی لە چەند ڕۆژی ڕابردوو بافڵ تاڵەبانی لە کۆڕبەندی ساڵانەی #هەولێر# ڕایگەیاند من حەزم لەو شێتخانەی حیزبایەتییە ، دیارە ئەمە سووکایەتیەکی گەورەیە بە یەکێتی و بەو خەباتەی کە زیاتر لە 22 هەزار کەس لەپێناویدا شەهید بوون، ئەو حیزبە گەورە و خاوەن مێژوو قوربانی دانە و ئەو حیزبەی سەرۆکەکەی جەنابی مام جلال بوو خاوەنی ڕووبارێک خوێن و داستانە کەچی ناوبراو ناوی لێنا شێتخانەی حیزب ، بۆیە منیش وەک وەڵامێکی تەنز ئامێز پۆستێکم کرد وتم یەکێتی شێتخانەکانی کوردستان بەو مانایەی باشترە ناوبراو مادەم حەزی لە شێتخانەیە با واز لە یەکێتی بێنێ و حیزبێکی تر بەناوی یەکێتی شێتخانەکانی کوردستان دابنێ ، بۆیە دووپاتی ئەوە دەکەمەوە کە ئێمە خاوەن و دڵسۆزی ئەو یەکێتیەین کە بۆی ژیاین و قوربانی و خەباتمان بۆ کردووە بەشانازیەوە .نەوەک ئەو یەکێتیەی ئەو ناوی ناوە شێتخانە یان یەکێتی نوێ، لەگەڵ ڕێزم..[1]

#لاهور شێخ جەنگی# هاوسەرۆکی پێشووی #یەکێتی نیشتمانیی کوردستان# نوێنەری خۆی ناردووەتە لای ئێرانییەکان، ئەوەش بۆ گەیاندنی چەند پەیامێک.
ماوەی ڕابردوو، هەریەکە لە #ئاراس شێخ جەنگی# و #ئاڵا تاڵەبانی# بە نوێنەرایەتی لاهور شێخ جەنگی لەگەڵ لایەنی ئێرانی لە شاری #بەغدا# کۆبوونەوەیان کردووە.
کۆبوونەوەکە بۆ گەیاندنی پەیامی لاهور شێخ جەنگی بووە بە بەرپرسانی ئێرانی، کە پەیامەش تایبەت بووە بە دۆخی ناوخۆیی یەکێتی و خراپی دۆخی حیزبەکە بە تایبەتی لە سنووری #سلێمانی#.
دوای کۆبوونەوەکە، بەرپرسانی ئێرانی بە پەیامێک وەڵامی لاهور شێخ جەنگیان داوەتەوە و داوایان لێکردووە، هیچ دەستوەردانێک لە دۆخی ناوخۆیی یەکێتی نەکات، چونکە ئەوان لە ئێستادا بە تەواوی پشتگیری #بافڵ تاڵەبانی# دەکەن. [1]

ئێران بۆ چارەسەری کێشەکانی نێوان #پارتی دیموکراتی کوردستان# و #یەکێتیی نیشتمانیی کوردستان# دێتە سەر خەت و پشتگیری هەوڵەکان بۆ ئەنجامدانی کۆبوونەوە دەکات.
ئێرانییەکان لە ڕێگەی پەیامێکەوە، کە ئاڕاستەی بەرپرسانی پارتی و یەکێتیان کردووە، جەختیانکردووەتەوە لەگەڵ چارەسەری کێشەکانی نێوان هەردوو حیزبن.
ئێرانییەکان لە پەیامەکەیاندا، پشتگیری خۆیان بۆ هەوڵەکانی #نێچیرڤان بارزانی# جێگری سەرۆکی پارتی و #بافڵ تاڵەبانی# دووپاتکردووەتەوە.
جگە لە ئێرانییەکان، هاوپەیمانانیش لەگەڵ چارەسەری ئەو کێشانەن و داوایان لە بەرپرسانی هەردوو حیزب کردووە، کە بەزوویی کۆبوونەوە بکەن و چارەسەری کێشەکانیان بکەن. [1]

#ئەدهەم بارزانی#: بەناوی خوای گەورە و میهرەبان
هاووڵاتییانی کورد هاووڵاتییانی ستەم دیدەی ناوچە جێناکۆکەکان

ئەمڕۆ ڕێکەوتی #16-12-2023# دەنگدانی تایبەت بۆ هەڵبژاردنی ئەنجوومەنی پارێزگاکانی ئێراق دەستی پێ کرد، کە پڕۆسەیەکی گرنگ و هەستیارە لە بەردەم دۆزی ڕەوای میللەتەکەمان بە گشتی و هاووڵاتییانمان لە ناوچە جێناکۆکەکان بەتایبەتیی.
من ڕووم بەتایبەت لە ئێوەی کوردانی ستەم دیدەی #نەینەوا# و #کەرکووک#ی دڵمان و #خانەقین#ی سەربەرز و کوردپەروەرە، کە ساڵانێکی زۆر خۆتان و باوباپیرانتان قوربانی دەستی ستەمی ڕژێمە سەرکوتکارەکانی ئێراقن، ئێستا هەلێکی زێڕین لە بەردەمتانە تاوەکوو بتوانن بە پڕکردنی سندوقەکان بەدەنگی کورد، جارێکیتر دەستی ستەم کوورت بکرێت و کوردستانی بوونی ئەو ناوچانە بەدەنگی بەرزی ئێوەی خۆشەویست بسەلمێنن سەرمانبەرزبکەن.
لێرەشەوە داوا لە هەموو ئەو کەسانە دەکەم کە پەیامەکەی بەندەیان پێدەگا، دەنگبدەن بە کاندیدەکانی هێژا کاک #بافڵ تاڵەبانی# چونکە ئەو سەرکردەیەیە کە بتوانێت بەرگری لە مافەکانتان بکات. [1]

براتان
ئەدهەم عوسمان شێخ ئەحمەد بارزانی
16-12-2023

ڕاوەستانی جەنابتان لە بەرامبەر ئەو کارانەی لە دەرەوەی ڕوشتی کوردایەتی و پێچەوانەی بنەمایەکانی ئاینی ئیسلامن ،
و بریاری جەنابتان بۆ قەدەغە کردین ئەم شۆێنانە جێگای ڕێز و تەقدیری زۆربەی ھەرە زۆری میللەتەکەمانە .

بە ناوی خوای گەورە و مھرەبان
بۆ / جەنابی سەروکی یەکێتی نیشتیمانی کوردستان برای ئازیز بەرێز #بافڵ جەلال تاڵەبانی#
لە گەل سڵاو و ڕێزمان
پر بە دڵ دەست خۆشی لە جەنابتان دەکەم بۆ ئەو ھنگاوانەی چەند ڕۆژی ڕابردووی جەنابتان :
1- سەرەدانی ڕۆژ ئاوای کوردستان و پشتیوانی جەنابتان بۆ شەرڤانانی ئازادی و جەنگاوەرانی دژ بەترۆریستانی تاریکستان جێگای دەست خۆشی و شانازی ھەمو کوردێک و ئازادیخوازێکە .
2- ڕاوەستانی جەنابتان لە بەرامبەر ئەو کارانەی لە دەرەوەی ڕوشتی کوردایەتی و پێچەوانەی بنەمایەکانی ئاینی ئیسلامن ،
و بریاری جەنابتان بۆ قەدەغە کردین ئەم شۆێنانە جێگای ڕێز و تەقدیری زۆربەی ھەرە زۆری میللەتەکەمانە .
ڕاستە ڕێگای سەرکەوتنی ئێوەی خۆشەویست و یەکێتی نیشتیمانیە، لەم قوناغە سەختە دا کە دوزی ڕەۆای گەلەکەمان تێدا تێدەپرێت .
سەرکەوتو بن .

براتان
ئەدھەم عوسمان شێخ ئەحمەد بارزانی
#23-12-2022#
[1]
تێبینی: ئەم بەڵگەنامەیە کێشەی رێنووس و رێزمانیی هەیە، کوردیپێدیا بەمەبەست هیچ دەستکارییەکی نەکردووە!

شەوی ڕابردوو پەیوەندیم پێوەکرا کە ڕۆژی چوارشەممە سەعات 10:30 لە دەباشان ئامادەبین، ئەمڕۆ بۆ ئەو مەبەستە لەگەڵ کۆمەڵێک لە هەڤاڵانی ئەندامی سەرکردایەتی چووینە دەباشان و لەگەڵ بەڕێز هەڤاڵ بافڵ تاڵەبانی هاوسەرۆکی یەکێتیی کۆبووینەوە.
لە کۆبوونەوەکەدا نووسراوێک خرایە بەردەممان، دواتر هەڤاڵ بافڵ تاڵەبانی قسەی کرد و وتی؛ دەمانەوێت دۆخەکە ئارام بکەینەوە، .
داوای لێکردین نووسراوەکە بخوێنینەوە، دوای خوێندنەوەی نووسراوەکە پێنج خاڵ لە ناوەڕۆکەکەیدا هاتبوو کە ئیمزای بڕیاردەری کارگێڕی مەکتەبی سیاسی لەسەر بوو. لای خۆمەوە ئەو خاڵەم ڕەتکردەوە کە باس لە سەفەرکردنی هەڤاڵ لاهور دەکات بۆ دەرەوەی ووڵات.
بۆیە من لێرەوە ڕایدەگەیەنم کە ئیمزام کردووە بۆ ئەنجامدانی کۆبوونەوەی سەرکردایەتی نەک ڕێککەوتنی نێوان هەڤاڵانی هاوسەرۆک چونکە بۆمان ڕوونبووەتەوە کە هیچ جۆرە ڕێککەوتنێک نەکراوە.
بۆیە من ئیمزاکەم دەکشێنمەوە، دووپاتیشی دەکەمەوە کە هەر ڕێککەوتنێک لە نێوان هەڤاڵانی هاوسەرۆک بکرێت ئامادەم لە کۆبوونەوەی ئەنجوومەنی سەرکردایەتیی حزبەکەمدا دەنگی لەسەر بدەم.
چرا عومەر سابر
ئەندامی ئەنجوومەنی سەرکردایەتیی یەکێتیی نیشتمانیی کوردستان

بافڵ جەلال حیسامەدین تاڵەبانی. 19-02-1973 لە بەغدا لەدایکبووە. بافڵ کوڕە گەورەی #جەلال تاڵەبانی# و #هێرۆ ئیبراهیم ئەحمەد#ە و برای #قوباد تاڵەبانی#یە. بەناوی بافڵەکەی چەمی ڕێزانەوە ناونراوە. ژیانی منداڵی و گەنجێتی لە ماڵی برایم ئەحمەدی باپیری لە بریتانیا بەسەر بردووە.
تەمەنی گەنجێتی زیاتر بە خوێندنەوە و وەرزشەوە بەسەر بردووە. هاوسەرەکەی ناوی لاڤەیە و کچی #مەلا بەختیار#ی ئەندامی ئەنجوومەنی باڵای سیاسی یەکێتییە. کوڕ و کچێکی هەیە بەناوەکانی کۆبان و لەیلا. زۆر کەم لە تەلەڤزیۆنەکانەوە دەردەکەوێت و لەبارەی وردەکاری ژیانییەوە کەمدەزانرێت.
بەرپرسی نووسینگەی سکرتاریەتی تاڵەبانی بووە.=KTML_Photo_Begin=https://www.kurdipedia.org/files/relatedfiles/2017/102282/0014.JPG=KTML_Photo_Alt=بافڵ تاڵەبانی=KTML_Style=width:20%;height:20%;float:right;=KTML_Photo_Target_Link=https://www.kurdipedia.org/files/relatedfiles/2017/102282/0014.JPG=KTML_Photo_End=
ساڵی 1996 بەشداری لە ڕاهێنانەکانی فەیلەقی بیانی فڕەنسادا کردووە.
ساڵی 1998 یەکێک بووە لە بەشداربووانی ڕاهێنانە سەربازییەکانی بریتانیا 13 و ساڵی 2000 باری لە ڕاهێنانی هێزە تایبەتییەکانی ئەمریکادا کردووە.
لە ئەمریکا و بریتانیا ستراتیژی سیاسی خوێندووە.
یەکەمجار وەک وەرگێڕ لەگەڵ هێزەکانی ئەمریکا گەڕاوەتەوە بۆ کوردستان.
لەگەڵ لاهور شێخ جەنگی ئامۆزای دەزگای دژەتیرۆری دامەزراندووە.
بەرپرسی کاروباری دژەتیرۆری کوردستان بووە.
لە دوای کۆچی دوایی #مام جەلال# گەڕانەوەی تەرمەکەی بۆ شاری #سلێمانی# #بافڵ تاڵەبانی# زیاتر لە ن دەرکەوتەوە بە ئاڕاستەی یەکخستنەوەی ناوماڵی یەکێتی کاری دەکرد.
دەنگە ناڕازییەکانی ناو یەکێتی و دەرەوەی یەکێتی ئاشتکردەوە.
ڕۆڵی لە دانانی سەرۆککۆماری ئێراقدا هەبووە.
تا کۆنگرەی چوارەمی یەکێتی هیچ پۆستێکی لەناو یەکێتیدا نەبووە.
هەر لەو کۆنگرەیەدا بە 791 دەنگ بە ئەندامی سەرکردایەتی هەڵبژێردرا.
لە 18-02-2020 بە زۆرینەی دەنگی ئەندامانی ئەنجوومەنی سەرکردایەتی لەگەڵ لاهور شێخ جەنگی بە هاوسەرۆکی یەکێتی هەڵبژێردران.
و لە ڕێکەوتی 08-07-2021 بافڵ تاڵەبانی لاهور شێخ جەنگی دوورخستەوە و بەتەنیا خۆی وەک سەرۆکی یەکێتیی نیشتمانیی کوردستان مایەوە تا لە ساڵی 2023 لە کۆنگرەی 5ی یەکێتی زۆرترین دەنگی بەدەستهێنا و وەک سەرۆکی یەکێتیی نیشتمانیی کوردستان هەڵبژێردرا. [1]

وابڕیارە لە ماوەی چەند ڕۆژی داهاتوو، #بافڵ تاڵەبانی# لەگەڵ کەسی یەکەم و سکرتێری حزبەکان لە بارەی پەیوەندییەکانی #یەکێتیی نیشتمانیی کوردستان# لەگەڵ #پارتی دیموکراتی کوردستان# کۆببێتەوە.
بافڵ تاڵەبانی سەرۆکی یەکێتیی نیشتمانی کوردستان بانگهێشتی سکرتێر و سەرۆک و کەسی یەکەمی حزبەکان دەکات، ڕۆژی پێنجشەممە، 10ی 11ی 2022 لە هاوینە هەواری #دوکان# کۆبوونەوەیەک لەبارەی ڕەوشی ئێستای هەرێمی کوردستان و پەیوەندییەکانی پارتی و یەکێتیی ئەنجامبدەن.
لەو کۆبوونەوەیەدا سەرۆکی یەکێتیی نیشتمانی کوردستان لە دوای سەردانەکانی شاندی یەکێتیی لە ماوەی دوو هەفتەی ڕابردوو بۆ لای لایەنەکان، داوای هاوکاری لەو هێزانە دەکات، بۆ ئەوەی بەیەکەوە کاربکەن بۆ ڕاست کردنەوەی سیستەمی حوکمڕانی هەرێمی کوردستان و وەستانەوە لە بەرانبەر هەڵوێست و ڕووداوەکانی ئەم دواییە بەتایبەت لەگەڵ پارتی دیموکراتی کوردستان. [1]

#بافڵ تاڵەبانی#، سەرۆکی #یەکێتیی نیشتمانیی کوردستان# پەیامێکی هۆشداریداوەتە بەرپرسانی #بزووتنەوەی گۆڕان#، کە تایبەت بووە بە پەیوەندییەکانی بزووتنەوەکە و پارتی دیموکرات.
بافڵ تاڵەبانی نیگەرانە لە باشی پەیوەندییەکانی نێوان گۆڕان و پارتی، بۆیە ئەو پەیامە هۆشدارییەی داوە بە بەرپرسانی بزووتنەوەکە.
بافڵ تاڵەبانی لە پەیامەکەیدا بۆ بەرپرسانی گۆڕان جەختیکردووەتەوە کە ئەگەر ئەجێندای پارتی لە سنووری #سلێمانی# جێبەجێدەکەن، ئەوە بچنە #هەولێر# سیاسەت بکەن، نەک لە سلێمانی.
هۆشدارییەکەی بافڵ تاڵەبانی زیاتر پەیوەندی بەباشی پەیوەندی تیمی حکومی گۆڕان و تیمی حکومی پارتییەوە هەبووە و باسی لەوەش کردووە، کە دەبێت لە هەڵوێستە سیاسییەکان پشتگیری یەکێتی بکەن، نەک پارتی. [1]

سەرۆکی #یەکێتیی نیشتمانیی کوردستان# لە دانیشتنەکانی ئەم دوایەی لەگەڵ #مەسعود بارزانی# بەڕوونی بە بارزانی وتووە: ئێستا کاتی ئەوەیە پارتی خۆی یەکلابکاتەوە کە لە سنووری زۆنی سەوز مامەڵە لەگەڵ چ هێزێکی سیاسی دەکات.
بەپێی زانیارییەکانی بوار، #بافڵ تاڵەبانی#، لە کۆبوونەوەکانی ئەم دواییەی لەگەڵ مەسعود بارزانی، سەرۆکی #پارتی دیموکراتی کوردستان# ڕایگەیاندووە، ئێستا کاتی ئەوەیە بزانین کە پارتی دەوێ لە سنووری زۆنی سەوز مامەڵە لەگەڵ چ هێزێکی سیاسی دەکات، چونکە بەدیلی یەکێتیی تەنها پەکەکە و #بزووتنەوەی گۆڕان# و #نەوەی نوێ#یە.
سەرۆکی یەکێتیی لە کۆبوونەوەکە ویستوویەتی ئه و پەیامە بە سەرۆکی پارتی دیموکراتی کوردستان بگەیەنێت ئەو هێزانەی کە لە سنووری زۆنی سەوزن چۆن دەتوانن ببنە بەدیلی یەکێتیی و پارتی چۆن مامەڵەیان لەگەڵ دەکات.
هەر بەپێی زانیارییەکان، له و کۆبوونەوەیەدا سەرۆکی یەکێتیی داواکاری هەبووە، بۆ ئەوەی یەکێتیی و پارتی بتوانن بەردەوام بن لە حوکمڕانی کوردستان. پێویستە لاپەڕەیەکی نوێ هەڵبدرێتەوە و ڕێککەوتنێکی نوێ ئەنجامبدرێت، چونکە هێزەکانی دیکەی #سلێمانی# ناتوانن ببنە بەدیلی یەکێتیی. [1]