چالاکوانی سیاسی و ئەندامی کۆمەڵەی مافی مرۆڤی کوردستان و خەڵکی ڕۆژهەڵاتی کوردستان.
باوکی دوو کوڕی زیندانی سیاسییە و ڕۆژی #17-07-2018# لەسەر ڕووباری #پێنجوێن# تیرۆرکرا. باوکی زیندانی سیاسی #زانیار مورادی#یە کە حکومەتی ئێران سزای لەسێدارەدانی بەسەردا سەپاندووە.

چالاکوانی ناسراوی کورد، ئیقبال مورادی لە شارۆچکەی #پێنجوێن#ی سەر بە شاری #سلێمانی#، بووە ئامانجی دەستی ڕەشی تیرۆرستانی دەوڵەت و بەکرێگیراوەکانی. کە بەداخەوە لە ئەنجامدا گیانی لەدەستدا.
ئیقبال مورادی، خەباتکەر و چالاکوانی مافەکانی مرۆڤ، بە درێژایی تەمەنی بێ پسانەوە لە تێکۆشاندا بووە بۆ دەستەبەرکردنی مافە ڕەوا زەوتکراوەکانی گەل کورد و کوردستان. مخابن شەوی 17 لەسەر 18ی ئەم مانگە لە شارۆچکەی پێنجوێن بەدەستی ڕەشی دوژمنان تیرۆر کرا.
لە کاتێکدا لە باشووری کوردستان، ئەمە جاری یەکەم نییە، چالاکوان و وڵاتپارێزانی پارچەکانی تری کوردستان دەکەونە بەر هەڕەشە و تیرۆر کردن. تیرۆرکردنی ئیقبال ورادی دوایین قوربانی هەوڵەکانی داگیرکەران و بەکرێگیراویانە کە لە ژێر سایەی باشووری ئازاد دا دەبێتە قوربانی. گومانی تێدا نییە کە ڕووداوی ئاوا دەرەنجامی بەربڵاوبوونی دەزگا سیخوڕیەکانی دەوڵەتانی داگیرکەرە لە هەرێمی کوردستان. هەروەها کەمتەرخەمیی دەزگاکانی ئاسایش و سەر بە حکوومەتی هەرێمن کە داگیرکەران بە ئاسانی کارە تێرۆریەکانیان بە ئەنجام دەگەیێنن. بۆیە پێویست و ئەرکیشە لە سەر حکوومەت و دەزگا تایبەتمەدەکانی، ڕێ لەبەر ئەم کردارانە بگرن و تۆمەتباران ئاشکرا بکەن و دادگایی بکرێن.
موردای لە هەڕەتی لاوێتیدا وەک #پێشمەرگە#یە‌ک‌ بەشداری شۆڕشی گەلانی ئێرانی کرد. دوای ئەوەی کۆماری ئیسلامی دەستی بەسەر دەسەڵاتدا گرت، لە ساڵی 1982 مورادی دەستگیردەکرێت و لە زیندانی شاری #مەریوان#ی سەر بە #سنە# زیندانی دەکرێت. بۆ ماوەی دوو ساڵ لە زینداندا مایەوە. دوای ئازادبوونیشی لە خەباتی مەدەنیانە کۆڵی نەدا و لە چالاکیەکانی مافی مرۆڤ لە تێکۆشاندا بوو. بۆیە بەردەوام لەلایەن هێزەکانی ئیتلاعاتی کۆماری ئیسلامی ئێرانەوە لە بەر چاودێری و هەڕەشەدا بوو و سەرەنجام لە ساڵی 2005 ناچار بوو ڕۆژهەڵاتی کوردستان بەجێبێڵێت و لە شارۆچکەی پێنجوێنی باشوور نیشتەجێ بێت.
ئیقبال مورادی ئەندامی دەستەی بەڕێوەبەریی کۆمەڵەی مافی مرۆڤی کوردستان بوو و بەبەردەوامی پێشێلکاری و تاوانەکانی دەوڵەتانی داگیرکەری کوردستان لە دژی گەل کورد و کوردستانی ڕادەگەیاند و بەسەر ڕای گشتیی مرۆڤایەتی بڵاوی دەکردنەوە. هەر ئەوەش وای کرد کە لە ساڵی 2018 دا هەوڵی تیرۆرکردنی درا و بریندار کرا.
ئێقباڵ مورادی باوکی زانیار مورادی و مامەی لوقمان مورادی یە. زانیار و لوقمان لە ساڵی 2009 لە زیندانەکانی زوڵم و تیرۆری دەوڵەت دا زیندانیی سیاسیین و سزای لەسێدارەدانیان لەسەر سەپێندراوە.
ئێمە لە کۆمیتەی مافی مرۆڤی #کۆنگرەی نەتەوەیی کوردستان# ک ن ک، دیسانەوە بە توندی تیرۆرکردنی ئیقبال مورادی مەحکووم و شەرمەزار دەکەین و داوا لە دەزگا پەیوەنددارەکانی حکوومەتی هەرێمی کوردستان و حکوومەتی مەرکەزیی عێراق دەکەین کە هەرچی زووە تاوانباران و بکوژانی ئیقبال مورادی بدۆزنەوە و ئاشکرای کەن و دادگایی بکرێن.
سڵاو لە گیانی پاکی ئیقبال مورادی و هەموو خۆبەختکراوانی ڕێگای ئازادی و ڕزگاری کوردستان.
نەفرەت لە تیرۆرست و داگیرکەران
کۆمیتەی مافی مرۆڤ
کۆنگرەی نەتەوەیی کوردستان ک ن ک
#19-07-2018#

ئەو دەستانەی لەخوێنی گەنجانی نیشتمانمان گەوزاون ئەوڕۆیش دیسانەوە باوکێکی تێکۆشەر و بەرخۆدەری لێوەرگرتێنەوە.
زانیاری خۆشەویست برینەکانم دەبەخشم بەتۆ ئەمە باشترین خەڵاتی ژیانە بۆمن، چونکە هەرکام لەو برینانە هێمای هەنگاوێک بۆ پێشەوەیە لەڕێی گیان بەختکردوانی ڕێی ئازادی کە هاوشێوەی دار #سنە#وبەر هەموو دەم سەوزەکانی نیشتمانمانن.
سنەوبەر لەگەڵ هەموو دارەکان جیاوازترە چونکە سنەوبەر هەرچەندیش گەڵاکانی بڕژێ،سەوزتر و ڕاوەستاوتر دەبێت.نەسەرمای سوتێنەری زستان ئەتوانێ لە گەشەی بخات، نە گەرمای هاوینیش توانای بەرنگاربوونەوەی لەگەڵی هەیە.
بەڵێ زانیاری خۆشەویست بۆهەر شوێنێکی ئەم نیشتمانە هەنگاو هەڵدەگرم، نیشانەیەک لە گیان بەختکردوان ڕێی ئازادی کوردستان دەبینم.
کێوە سەخڵەت وئاستەمەکانی #ماکۆ#، شیرین عەلەم هوولی خۆشەویست وهاوڕێی سەردەمی منداڵیم بیردەخاتەوە وکێوە بەرزەکانی هەورامانیش هەڤاڵی زۆر هێژام فەرزادکەمانگەر و ئاویەری میوانگر فەرهاد وەکیلی باوکی هەورام، هاوڕاز و هێنگامە.
ئەوڕۆیش هارمۆنیای دەنگی باوکی گیانباز و لەخۆبردوومان، ئەم سەمفۆنیا بەشکۆ وناوازەیە کە گوێی جیهانیان دەئاخنێ.
بەڵێ هەڤاڵی خۆشەویستم ئەمەم کوت بۆئەوەی بزانی هاودەردی تۆم ونەمری وهەرمانی باوکی خۆشەویستتان لێ پیرۆز دەکەم.
تیرۆری باوکت، ئێقباڵ مورادی باوکێکی دڵسۆز و لەخۆبردوو، کە لە ڕاستیدا تیرۆری ئەو دەستانەیە کە یارمەتیدەر و بەهاناوەچووی مرۆڤایەتییە،تۆ بە کۆڵنەدان و لەخۆ بردوویی بووی بە میراتگری ئاڵای ئەم خەباتکارانەی ڕێی ئازادی.
سەرەڕای مەحکووم کردنی ئەم تیرۆرە،لەودیووی مێڵەکانی زیندانەوە بەڵێنێکی سەرلەنوێ دەدەم تا مسۆگەر بوونی ئامانجی ئەم گیان بەختکردوانە کە شتێک نییە جگە لە ئازادی،درێژەدەری بەخەبات و بەرنگاربوونەوە بم.
کۆمەڵەی مافی مرۆڤی کوردستان
#25-07-2018#