ئەندامێکی ئەنجومەنی پارێزگای #سلێمانی# لە فراکسیۆنی گۆڕان، جەخت لەوە دەکاتەوە کە ئەگەر پارێزگاری سلێمانی هەڵنەستێت بە جێبەجێنەکردنی بڕیارەکەی ئەنجومەنی پارێزگا لە بارەی ڕەتکردنەوەی دانانی کامێرای چاودێری تیژڕەوی، ئەوا هەڵدەستیتن بە کۆکردنەوەی واژۆ بۆ بانگهیشتکردنی و لێپرسینەوە لەگەڵیدا، چونکە بەگوێرەی بڕگەی (3) لە مادەی 19 ی ئەنجومەنی پارێزگا، دەبێت بڕیارەکانی ئەنجومەن لەلایەن پارێزگاری سلێمانییەوە جێبەجێبکرێن.
کەریم عەلی، ئەندامی ئەنجومەنی پارێزگای سلێمانی لە فراکسیۆنی #بزوتنەوەی گۆڕان# بە بواری ڕاگەیاند: بڕیارەکەی ئەنجومەنی پارێزگای سلێمانی بە ڕەتکردنەوەی دانانی کامێراکانی هاتووچۆ، بڕیارێکە دەبێت پارێزگاری سلێمانی پێوەی پابەند بێت و جێبەجێی بکات، ئەگەر لە حاڵەتێکدا ئەو بڕیارەی ئێمە جێبەجێنەکرا ئەوا دەستدەکەین بە کۆکردنەوەی واژۆ بۆ بانگهێشتکردنی پارێزگاری سلێمانی بۆ کۆبوونەوەی ئەنجومەن و لێپرسینەوە لەگەڵیدا.
ئاماژەی بەوەشکرد، تا ئێستا هیچ ئاماژەیەکمان بۆ نەهاتووە باس لەوەبکات بڕیارەکەی ئەنجومەنی پارێزگای سلێمانی جێبەجێناکرێت، چونکە بەگوێرەی بڕگەی (3) لە مادەی 19 ی ئەنجومەنی پارێزگای سلێمانی، دەبێت بڕیارەکانی ئەنجومەنی پارێزگا لەلایەن پارێزگاری سلێمانییەوە جێبەجێبکرێن. تائێستاش پێمان نەوتراوە بڕیارەکە جێبەجێناکرێت.
وتەکانی ئەو ئەندامەی ئەنجومەنی پارێزگای سلێمانی لە کاتێکدایە کە سەرۆکی ئەنجومەنی پارێزگای #هەولێر# ئاماژەی بەوەکردووە کە لە دەستەڵاتی ئەنجومەنەکاندا نییە دژی بڕیارەکانی ئەنجومەنی وەزیران و وەزارەتەکان بڕیاربدەن، بەڵکوو تەنها بۆمان هەیە پێشنیار بکەین و گلەیی خۆمان بگەیەنین، بۆیە پێویستە کامێرای چاودێری خێرایی پۆینت توو پۆینت لە هەموو هەرێمی کوردستان دابندرێت. [1]

بەپێی ڕاپرسیەکی سایتی ئاوێنەنیوز کەماوەی هەفتەیەکی خایاندووە لە 68%ی بەشداربووان داوا دەکەن د.هەڤاڵ ئەبوبەکر ببێتە پارێزگاری سلێمانی و لە 21% داوا دەکەن د. ئاسۆ فەرەیدوون ببێت بەپارێزگار.
ئاوێنەنیوز، سلێمانی: ڕاپرسیەکی ئاوێنەنیوز، کە دوێنی (هەینی) کۆتایهات و ماوەی یەک هەفتەی خایاند، 1688 کەس بەشدارییان تێدا کردووە و پرسیارییان ئەوەیان لێکراوە کێیان پێ باشە تا ببێتە پارێزگاری سلێمانی.
بەپێی دواهەمین ئەنجامی ڕاپرسیەکە 1150 بەشداربوو بەرێژەی لە 68% داوایانکردووە د.هەڤاڵ ئەبوبەکر، سەرۆکی لیستی گۆڕان بۆئەنجومەنی پارێزگای سلێمانی بکرێتە پارێزگار و 348 بەشداربوو بەرێژەی لە 21% داوا دەکەن د.ئاسۆ فەرەیدوون، سەرۆکی لیستی یەکێتی بۆ ئەنجومەنی پارێزگای سلێمانی بکرێتە پارێزگار.
لەبەرامبەریشدا 190 بەشداربوو بەرێژەی لە 11% داوایانکردووە کەسێکی تر لەجێگای ئەو دووانە بکرێتە پارێزگار.
لەهەڵبژاردنی 30 نیسان بزوتنەوەی گۆڕان توانی 12 کورسی پارێزگای سلێمانی بەدەستبهێنێت و یەکێتیش 11 کورسی و لەئێستادا هەردوولا کێبڕکێیانە بۆ ئەوەی پارێ.گاری ئەو شارە بەهاوکاری لایەنەکانی تر بۆخۆیان مسۆگەر بکەن.
- 31-05-2014

دەقی پیرۆزباییەکەی #هەڤاڵ ئەبوبەکر#:
د.هەڤاڵ ئەبوبەکر پارێزگاری #سلێمانی# بەبۆنەی 19یەمین ساڵەی PUKmedia پیرۆزبایی لەسەرنوسەرو ڕۆژنامەنوسانی PUKmedia دەکات و هیواش دەخوازێت چۆن لە ڕابردوودا لەبواری میدیاو ڕاگەیاندندا پیشەییانە کاریکردوەو پابەند بووە بەئیتیکی ڕۆژنامەوانی و متمانەی خوێنەرانی بەهەمان شێوە بۆ داهاتووش لەسەر هەمان ڕێکچە بەردەوام بێت.
جارێکی تر پیرۆزباییتان لێدەکەم و یادەکەتان پیرۆز بێت.[1]

03-12-2017

لەمیانەی کۆبوونەوەکانی مەکتەبی سیاسی #یەکێتیی نیشتمانیی کوردستان#، لەگەڵ ڕێکخەر و بەرپرسانی #بزووتنەوەی گۆڕان#، جێگری سەرۆکی حکومەت، سوور بووە لەسەر گۆڕینی پارێزگاری ئێستای سلێمانی.
بەپێی زانیارییەکانی بوار، لەمیانەی کۆبوونەوەکانی بەرپرسانی یەکێتیی نیشتمانی کوردستان و بزوتنەوەی گۆڕان لەبارەی ئاڵوگۆڕ و گۆڕانکاری پۆستە حکومییەکانی سنووری هەردوو پارێزگای #سلێمانی# و #هەڵەبجە#، #قوباد تاڵەبانی#، جێگری سەرۆکی حکومەتی هەرێمی کوردستان بە بەرپرسانی گۆڕانی وتووه سوورە لە گۆڕینی #هەڤاڵ ئەبوبەکر#، پارێزگای سلێمانی و دانانی کەسێکی دیکە.
بوار زانیویەتی، له و کۆبوونەوەیەدا قوباد تاڵەبانی زۆر بە توندی لەگەڵ بەرپرسانی گۆڕان قسەی کردووە، هەرچەندە بەرپرسانی گۆڕان ڕەتیان نەکردۆتەوە بە گۆڕینی پارێزگای سلێمانی، بەڵام بۆ ئه و ئاڵوگۆڕە داواکاری و مەرجی خۆیان هەبووە.
هەربەپێی زانیارییەکان، دواکەوتنی ئاڵوگۆڕی پۆستی پارێزگای سلێمانی پەیوەندی بە ناکۆییە ناوخۆییەکانی یەکێتیی و ڕێک نەکەوتنیانە لەسەر دیاریکردنی کەسێک و جێبەجێکردنی مەرجەکانی بزووتنەوەی گۆڕان. [1]

مامۆستای ڕۆژنامەگەری لە زانکۆی #سلێمانی#، کۆلێجی زانستە مرۆڤایەتیەکان. ماوەیەک لە ڕیزی حیزبە ئیخوانییەکاندا بووە. پاشتر لەسەر لیستی #بزووتنەوەی گۆڕان# بووە پارێزگاری سلێمانی.

#هەڤاڵ ئەبوبەکر# پارێزگاری #سلێمانی# داوای لە حکومەتی تورکیا کردووە، بەو بڕیارەدا بچێتەوە، کە بۆ قەدەغەکردنی گەشت بۆ فڕۆکەخانەی سلێمانی دەریکردووە.
هەڤاڵ ئەبوبەکر پارێزگاری سلێمانی لە میانی لێدوانێکی داوای لە ئەنقەرە کردووە پێداچوونەوە بە بڕیارەکەیدا بکات، ڕاشیگەیاندووە دڵنیاتان دەکەمەوە کە سلێمانی و فڕۆکەخانەکەی سەلامەتن، ئاماژەی بەوەشکرد کە دەستپێشخەری لەگەڵ لایەنە پەیوەندیدارەکاندا هەیە بۆ چارەسەری ئەو کێشەیە.
هاوکات وتەبێژی فڕۆکەخانەی نێودەوڵەتی سلێمانی، دانا محەمەد، ئاماژەی بەوەدا، کە ڕۆژانە یەک گەشتی مەدەنی هەیە لەنێوان سلێمانی و تورکیا ماوەی چەند ڕۆژێکە ئەو گەشتە بەهۆی بڕیارەکەوە ڕاگیراوە. [1]

-هاووڵاتیانی خۆشەویست و شکۆمەند..
-فەرمانگاو دامودەزگاکانی دەوڵەت..
-کۆمپانیاو خاوەنکارو کاسب و بازرگانان و کەرتی تایبەت..
-دەستەبژێرو ڕێکخراوە مەدەنیی و پیشەیی و جەماوەرییەکان..
-چالاک و ڕۆژنامەوان و دەزگاو کەناڵ و تۆڕە مێدیایی و کۆمەڵایەتییەکان..
-کەسایەتیی و هێزو حیزب و لایەن و ڕێکخراوە سیاسییەکان..
دۆخی تەندروستیی جیهان و وڵاتەکەی ئێمەو پارێزگاکەیشمان، بە دۆخێکی مەترسیداری هەستیاری کارەساتباردا تێدەپەڕێت، ئەرکی هەموو هەموومانە بەتەواوی جیاوازیی و ناکۆکیی کەسیی و شوێن و کارو کات و پایەو پلەو پۆست و ئەرکی مرۆیی و پیشەییمانەوە؛ بەیەکەوە کاربکەین بۆ بەرەنگاربوونەوەی کۆرۆناو کەمکردنەوەی قوربانیی و بەرکەوتەو زیان و لێکەوتە خراپ و وێرانکەرەکانی پەتای کۆرۆناو، بۆ پاراستنی ئاسایشی تەندروستیی و تەندروستیی گشتیی و تاکەکەسیی هاووڵاتیانی وڵاتەکەمان و، باشکردنی دەرفەتەکانی کارو کەسابەت و بازاڕو بازرگانییو، بەهێزکردنەوەی داهات و دارایی و ئابووریی دەوڵەت، کە هەموو ئەمانە لە ئێستادا بەهۆی ئەم پەتایەوە زیانی گەورەیان بەرکەوتووە.
ئەم دۆخە وادەخوازێت ئیرادەی هاووڵاتیان و ئیدارەدانی دەوڵەت، ئەخلاق و قانون، بەرپرسیارێتی ویژدانیی و کەسی و کۆمەڵایەتی و یاسایی و دەوڵەتیی، هاووڵاتیان و حکومەت و دامەزراوە مەدەنییەکان، بەیەکەوە لەسەر ئەم سێ تەوەرە، جیاکارییانەو تەواوکارییانە کاربکەین:
یەکەم: فەرمانگاو دامودەزگاکانی دەوڵەت، پێویستە بڕیارو ڕێکارو ڕێنماییە تەندروستیی و کارگێڕیی و ئارامییەکان بەوردیی و بەتوندیی و بەخێرایی و بەبێ چاوپۆشیی و کەمتەرخەمیی و بۆڵبژێریی و جیاکاریی بە بەرپرسیارانەو دادپەروەرانەو یاساییانە، جێبەجێ بکەن.
وەک لە بەیان و بڕیارەکانی لیژنەی باڵای ئۆپراسیۆنەکانی پارێزگای #سلێمانی# بۆ بەرەنگاربوونەوەی کۆرۆنا دیاریمان کردووە، ئەرکی هەر فەرمانگاو دامودەزگایەکی دەوڵەتییە ڕێکارو ڕێنمایی ورد لەسەر بنەمای ڕێنماییە خۆپارێزییە تەندروستییەکان دەربکات و هەر سێکتەرو شوێن و کەسێکی تایبەت بەو سێکتەرەی خۆیان ئاگادار بکەنەوە بە پەیڕەوکردن و پابەندبوونیان بە ڕێنماییەکانەوە، بەپێچەوانەوە لەلایەن ئەو فەرمانگاو دامودەزگا دەوڵەتییە پەیوەندیدارەوە بە هەماهەنگیی یەکە کارگێڕییەکانی سنورەکەوە ڕێکاری پێویستیان بەرامبەر دەگیرێتەبەرو سێکتەرو شوێنەکەیان دادەخرێت و لە مێدیاکان بڵاودەکرێتەوە.
پێویستە بەر لە هەر شوێنێک و کەسێک، فەرمانگاو دامودەزگاکانی دەوڵەت پابەندی ڕێنماییە تەندروستییەکان بن و هەر سەرپێچیی و سەرکەشیی و بەکەمگرتنێک، بەڕێوەبەرو بەرپرسی ئەو فەرمانگایە ڕووبەڕووی ڕێکاری یاسایی و کارگێڕیی توند دەکاتەوە.
دووەم: هاووڵاتیان و هەموو ئەو کایانەی لە پێشەکی ئەم نووسراوەدا ڕوومان لێناون، پێویستە هەموولایەک، یەک بەیەکیان پابەندیی تەواوی ڕێنماییە تەندروستی و خۆپارێزییەکان بن و ئاستی خۆپارێزیی خۆیان بەرزبکەنەوەو لە هەر بەریەککەوتن و تێکەڵاوبوون و کۆڕو کۆبوونەوەو قەرەباڵغییەک، لە هەر بۆنەیەکی شادیی و شایی و شین و نەخۆشیی و خۆشیی و ناخۆشیی و ئایینی و کۆمەڵایەتی؛ خۆیان بەدوور بگرن، لە هەوڵی بەردەوامیی خۆپاراستنی تەواودا بن و هانی دەوروبەرەکەشیان بدەن بۆ خۆپارێزیی زیاتر.
سێیەم: خۆپارێزیی و سزای کۆمەڵایەتیی و یاسایی هاوبەشن، لێرەدا پێویستە هاووڵاتیانی بەڕێز چاودێری وردی دۆخی تەندروستی و خۆپارێزیی گشتیی و کۆمەڵایەتیی بکەن، بەومەبەستەی لە هەر شوێن و بازاڕو کۆمپانیاو کایەیەکی گشتی و تایبەتیدا، ئەگەر بینییان خاوەن و کارمەندی شوێنەکان، پابەندی ڕێنماییەکان نابن، سەرزەنشتیان بکەن و کەلوپەلیان لێ نەکڕن و دابڕیان بکەن تا ئەوکاتەی پابەند دەبن و، لایەنە پەیوەندیدارەکانی دەوڵەتیان لێ ئاگاداربکەنەوە بۆئەوەی ئەو شوێنانە بەفەرمیی دابخەن.
بەڕێزان، بڕوا بە هیچ گومان و پڕوپاگەندەو شەڕێکی دەروونیی و ئەجێندایەکی سیاسیی و تێکەڵکردنی دۆزەکان، مەکەن، لە ڕابردوودا باوەڕکردنی بەشێکتان بەوانە، ئەم کارەساتەی خوڵقاندو، لە ڕاستیی مەترسیی و بوونی ڤایرۆسەکەی کەمنەکردەوە، لە ئێستادا ئەو کەس و لایەنانە کە ڕاکانیان بە درۆ گەڕاون، بۆ ڕاستکردنەوەی باری لاری خۆیان گومان لەسەر ئەرک و چالاکیی و خزمەت و خۆنەویستیی و خۆبەخشیی و دڵسۆزیی دامودەزگاکان و کەرتی تەندروستیی دروست دەکەن، مەهێڵن متمانەتان بکەوێتە چاڵەکانی گومانەوە، بە ئیرادەو هیممەتی هەموولایەک و بە گیانێکی بەرپرسیارانەی بەرزەوە؛ دامودەزگا دەوڵەتییەکان وەک ئەرکێکی مرۆییانەو ئەخلاقییانەو ئاینییانەو نیشتمانییانەی خۆیان، (بەر لە ئەرکە دەوڵەتیی و فەرمیی و کارگێڕییەکانیان)، ئەرکەکانیان جێبەجێ دەکەن.
ئەرکی حکومەتە، موچەی موچەخۆران و دەرفەتی کارو کەسابەتی بازاڕو پێداویستیی و خزمەتگوزارییە تەندروستیی و ژیانییەکان و ئارامیی و ئاسایشی گشتیی، دابین بکات، بەڵام ئەمە ئەو ڕاستییە لەق ناکات، کە دەبێت بە هەموومان بەرەنگاری ئەم ئاڵنگارییە تەندروستیی و دارایی و ئابوورییە گەورەیە ببینەوە.
بە ئیرادەو ئومێدو سوربوون و بەردەوامبوونەوە، وەک هەمیشە چاوەڕوانیی هەڵوێست و هیممەت و پشتیوانیی و پابەندیی و خۆپارێزیتانین و، دڵنیاتان دەکەینەوە بە ڕێکارەکانی دەوڵەت و بە خۆپارێزیی ئێوەی بەڕێزو بە سزادانی ئەوانەی سەرکەشیی و سەرپێچی دەکەن، ئەم دۆخە تێدەپەڕێنین.
بە ئومێدی تەندروستییەکی باش بۆ هەمووان.
خودا پشت وپەنای هەمووان بێت.
د.#هەڤاڵ ئەبوبەکر#
پارێزگاری سلێمانی
#09-06-2020#

#هەڤاڵ ئەبوبەکر# پارێزگاری #سلێمانی# لەمیانی لێدوانێکی ڕۆژنامەوانی مەترسییەکانی سەر #هەرێمی کوردستان#ی خستەڕوو، وتی: دەبێت لایەنە سیاسییەکانی هەرێم بەزووترین کات کۆببنەوە.
هەڤاڵ ئەبوبەکر وتیشی: لە ئێستادا بازاڕ، زانکۆکان، خوێندگەو قوتابخانەکان، هەموو کایەکانی تر لەژێر دەسەڵاتی #پارتی دیموکراتی کوردستان# و #یەکێتیی نیشتمانیی کوردستان#دایە، بۆیە دەبێت ئەو دوو لایەنە کۆببنەوە و کۆتایی بە کێشەکانی نێوانیان بهێنن.
هەروەها وتی: پارتی و یەکێتی دەسەڵاتیان بەدەستەوەیە، دەبێت بە دوو ئاڕاستە کار بکەن، ئاڕاستەی یەکەمیان ئەوەیە کۆتایی بە کێشەکانی نێوانیان و کێشە ناوخۆییەکان چارەسەر بکەن، دووەمیشیان ئەوەیە، کە نابێت خۆیان لەو ململانێ‌ هەرێمی و نێودەوڵەتییەکان نەگلێنن، کە لە ناوچەکە هەیە.
پارێزگاری سلێمانی هۆشداریشدا، ئەگەر حکومەتی هەرێم بەزوویی کێشەی مووچە چارەسەر نەکات، ئەوە لەدڵنیایی کێشەی گەورەتر درووست دەبێت، کە ئەنجامەکەی خراپ دەشکێتەوە. [1]

#هەڤاڵ ئەبوبەکر# پارێزگاری #سلێمانی# ڕایگەیاند، ئەوەی حکومەتی ئێراق بەرانبەر هەرێم و فەرمانبەرانی دەیکات ئیکۆساید و تاوانە و دەبێت کۆتایی بەو دۆخە بهێنرێت.
هەڤاڵ ئەبوبەکر، لەمیانی وتارێک لە دیداری میزۆپۆتامیا لە سلێمانی پێشکەشیکرد، ڕاشیگەیاند، سیاسەتی برسیکردن و مووچەبڕین، هەمان سیاسەتە ڕژێمە یەک لە دوای یەکەکان بەرانبەر خەڵکی هەرێمی کوردستان پیادەیان کردووە.
پارێزگاری سلێمانی ئەوەشی ڕاگەیاند، کە ئەوە تاوانە بەرانبەر خەڵک دەکرێت، بۆیە پێویستە ئەو تاوانە ڕاگیرێت، چونکە خەڵکی مافی خۆیەتی شایستە داراییەکانی لەکاتی خۆی پێبدرێت.
ئەو داواشی کرد، لە کۆتایی ئەمساڵ (2023) ئەو کێشە داراییانەی نێوان #هەولێر# و بەغدا هەیە چارەسەر بکرێت، بۆ ئەوەی لە ساڵی نوێ ئەو دۆخە بەردەوام نەبێت و کۆتایی پێبهێنرێت، بەوەی بەرانبەر خەڵکی هەرێم پەیڕەو دەکرێت. [1]