داستانەو حەیدەر و سنۊبەرې
بەشەی یەکەمە
نویستەی و ئاماڎەکەردەی: #ئەسعەد ڕەشید#
داستان نویس، سەرەتا بە نامې خوڎای بەزەییمەڼی ڕەحمینی دەسپەنەکەرۊن، مەگنۊنە تاریفدای زاتو هەقی، تەواناکاش، بەزەییۊ بەزەییش، بەخشڼەیی و سڕپۊشیش، دەلیلو گرد کەسێ داماگی، سایەو بېنەوایا، شیفابەخشو گرد دەردەکا، شاهەنشاو عالەمیانی:
شەهەنشای بې باک.....
ئەڵڵای لا شەریک، شەهەنشای بې باک
فەردی فەریاد ڕەس زاتی تەنیای تاک
باعیسی ئیجاد، عەرز و ڕووی ئەفلاک
بې خورد و بې خاب، بې ڕوو بې فرزەند
قودرەت نمای دەور، نە تاق بەخشای بەند
قادری کردار، کەس حەیی نەکەردە
ئاگاه جە ئەسرار، پەشت و ڕووی پەردە
شەهەنشای عەزیم، قەدیمولئەیام
مەعبوودی بەر هەق، حەیی لایەنام
شیفا بەخشی نوور، خورشیدی خاوەر
پەی ڕوشنی عەرش، ئەیوانی ئەخزەر
زاتی بې میسال، تاکی تەنیای فەرد
یەکتای بې هەمتا، نەزاد و نەمەرد
کانی کەرەمدار، کەرەم بې شومار
یا، دانای سڕپۊش، واحیدولقەهار
قەراردادەی لەوح، مەحفوزولقەلەم
خالقی ڕووی عەرش، شەهەنشای بې غەم
جان نە بەتنی دوڕ، دوڕ نە بەتنی حووت
یا سیڕڕی ئەسرار، حەیی لا یەمووت
عاقڵ جە تەدبیر، کارت مەسیرەن
هەر کەس شیی نە فکر، بې شک سەهیرەن
کې کەردەن تەمام، زاتی حەیاتت
کې کەردەن تەمام، وەسفی سیفاتت
هەر ئېد مەزانوو، لا مەکانەنی
عالەم گرد فانی، جاویدانەنی
حەقەن کە مەعبوود، هەم سوبحانەنی
کەریم و ڕەحیم، هەم ڕەحمانەنی
نیەن سیوای وېت، مەکان سەخا بۊ
ڕجا کەردەی وېت، کانی ڕجا بۊ
کېن سیوای وېت، ڕەببولعالەمین
کەردەبۊش ئیجاد، سەما و سەرزەمین
کېن سیوای وېت، دەهەندەی داوەر
زاڵمان زەلیل، زەلیل عالەم کەر
کېن سیوای وېت، حوکمش بە تاو بۊ
تاکی تەنیای فەرد، بې خورد و خاو بۊ
کېن سیوای وېت، کەرەم بې شومار
با خەبەر جە حاڵ، بەندەی شەرمەسار
ئەر ئەسڵ خەیرەن، وەگەر هەن نە شەڕ
گرد، کەردەی وېتەن، بینای بانی سەر. [1]