بەناوی خوای بەخشندەی میهرەبان
جەماوەری کوردستان
پارتە سیاسیەکان
هەڵسوڕاوو کادرو ئەندامان و دەنگدەران
ئێمە کۆمەڵی ئیسلامیی و بزوتنەوەی گۆڕان پاش چەندین ساڵ لە خەبات لەپێناو بەرپاکردنی حوکمێکی ڕەشید و نەهێشتنی گەندەڵی و چەسپاندنی شەفافیەت و گۆڕینی سیستەمی حوکمڕانی و نوسینەوەی دەستور و ڕێکخستن وبەسیستەمکردنی دامەزراوەکانی حوکمڕانی بەگشتی وهێزەکانی پیشمەرگه و ئاسایش بەتایبەتی و دروستکردنی کۆدەنگی نیشتمانی وە خزمەتکردنی هاوڵاتیان، وە بێلایەنکردنی دەسەڵاتی دادوەری بۆپاراستنی ماف و ئازادییەکانی هاوڵاتیانی کوردستان.
بەشداریکردنی گۆڕان و کۆمەڵ لەحکومەتی بنکە فراوانی کابینەی هەشت، پێویستیەکی قۆناغەکە بوو، بۆ ئەوەی وێنەی سیستەمی حوکومرانی لەهەرێمی کوردستان و پرۆسەی سیاسی ڕاست بکرێتەوه و ڕۆڵێکی کاریگەرمان لەپرسی چاکسازی و ڕیشەکێشکردنی گەندەڵی لەهەرێمی کوردستان هەبێت.
لێرەدا پێویستە ئه و ڕاستیە بیربخەینەوە،کە دەسەڵات دارانی هەرێم بەشیوازێکی بەرفراوان درێژەیاندا بە گەندەڵی سیاسی،یاسایی،ئابوری و دارایی و،هەروەها بەدەر لە یاساکان ماوەی دووساڵی تریان بۆ سەرۆکی هەرێم درێژکردوەو،دواتر پەرلەمانی کوردستانیان پەکخست و کابینەی هەشتی حکومەتی هەرێمیان ئیفلیج کرد،وەک هەمیشە شەراکەتی ڕاستەقینەیان قبول نەکرد وە ئامادەش نەبون چاکسازی ڕاستەقینە ئەنجام بدریت.
دەسەڵاتداران بەهۆی عەقلییەت و شکستی فۆرمیی حکومڕانیان هەرێمیان توشی قەیرانیکی گەورەی ئابوری و دارایی کرد،دواجاربەهۆی سیاسەتی نا واقیعی و عینادی،هەڵەی ئەنجومەنی باڵای ڕیفراندۆم کوردستانیان توشی شکست و هەرەسێکی مێژوویی،سیاسی،سەربازی، مەعنەویی،جەماوەری، ئابووری و دارایی کرد
لەدوای ڕووداوەکانی پاش ڕیفراندۆم، ویستمان دەرفەتێک بدەین تاکو دەسەڵات بەدەم ئەرکی قۆناغەکەوە بێت و حکومەتێکی کاتی دابمەزرێنین بۆئەوەی ئیدارەی گفتوگۆیەکی سەرکەوتوو لەگەڵ بەغداد بدات و کار بۆ چاککردنی مووچە و بژێوی خەڵکی بکات و ئامادەکاریی بۆ هەڵبژاردنێکی پاک و بێگەرد بکات،دوایی پاککردنەوەی لیستی دەنگدەران لەسەدان هەزار دەنگی ساختە، بەڵام پاش چەند مانگێک لە چاوەڕوانی دەرئەرنجام بێئومێد بوین لە مانەوه لەم حکومەتەدا و ئەم بڕیارەشمان پێشتر لەلایەن هەردوو لاوە وەرگیراوە لەبەر ئه و هۆکارانەی سەرەوە بە پێویستمانزانی دوای بخەین، بۆیە ڕایدەگەیەنین:
1. کشانەوەی بزوتنەوەی گۆڕان وکۆمەلی ئیسلامی لەکابینەی هەشتەمی حکومەتی هەرێمی کوردستان.
2. لە ئیستاشدا بەپێویستی دەزانین ئەم حکومەت هەڵبوەشێتەوە و حکومەتێکی کاتی پێکبهێنرێت.
3. پشتیوانی لە هەموو داواو داخوازییە ڕەواکانی خۆپیشاندەران دەکەین لە چوارچێوەی خەباتی مەدەنی بێ توندوتیژی.
4. هێزەکانی پێشمەرگه و ئاسایشی ناوخۆ بەرپرسیارن لە پاراستنی گیانی خۆپیشاندەران و هیچ پاساوێک نییە بۆ گرتن و ئازاردان وکوشتنی خۆپیشاندەران،هەر لێرەوە داوا دەکەین هەموو ئەوانەی لەسەر خۆپیشاندان دەستگیر کراون ئازاد بکرین.هاوکات دیاردەی سوتاندنی بنکه و بارەگای حکومی و حیزبی ئیدانه دەکەین وه به کارێکی ناشارستانی دەزانین.
5. هەر هەڵبژاردنێک لە کوردستان بێ پاککردنەوەی لیستی دەنگدەران هیچ ماهیەت و نرخێکی نیە و پێشتر ئەنجامەکەی مسۆگەر کراوە!
بۆ بەدیهێنانی ئامانجی گەلەکەمان وەتێپەراندنی ئەم قۆناغە لە خەباتی مەدەنی بەردەوام دەبین بۆ بەدیهێنانی ژیانێکی بەختەوەر و ئازادو دادی کۆمەڵایەتی و پاراستنی قەوارەی هەرێمی کوردستان و چارەسەری کێشەکانی نێوان هەرێم و بەغداد بەپێی دەستور و لەسەرو هەمویانەوە ماددەی 140 و هەموو فشارێک دەخەینە گەڕ بۆ ئەنجامدانی هەڵبژاردنێکی پاک و بێگەرد، وە حکومەت ناچارە مل بدات بۆ داخوازیە ڕەواکانی خەڵکی کوردستان، وه ئه مه ش ده که ینه سه ڕه تای قۆناغێکی نوێی سیاسی،وە کۆکردنەوەی هیزو لایەنە سیاسییەکان لە هاوپەیمانی و بەرەیەکدا بەئەرکێکی هەنوکەیی ئەمرۆ دەزانین
#بزووتنەوەی گۆڕان# و #کۆمەڵی ئیسلامیی کوردستان#
#20-12-2017#

روونکردنەوەیەک بۆ ڕای‌ گشتی‌ کوردستان
ئێمە وەک چوار لایەنی‌ بەشدار لە پرۆسەی‌ هەڵبژاردن لە سنوری‌ پارێزگای‌ #سلێمانی‌# هەر زوو هۆشداریمان دا بەوەی‌ کە لایەنێک دەیەوێت تەزویرێکی‌ ڕێکخراو بە چەند قۆناغێک و بە چەند شێوازێک ئەنجام بدات و مافێکی‌ سەرەتایی‌ هەموو دەنگدەرێک کە دەنگدانە پێشێل بکات، لە ڕۆژی‌ دەنگدانیشدا هەمان ئەو لایەنە تەزویرێکی‌ ڕێکخراوی‌ ئەنجامدا کە چەندین بەڵگەی‌ حاشاهەڵنەگرمان لەبەردەستدایە و سکاڵامان تۆمار کردوە.
پاش دەرکەوتنی‌ دەرەنجامی‌ سەرەتایی هەڵبژاردنەکان لەلایەن ڕاگەیاندنی‌ حیزب و کەناڵەکانەوە، ئەو لایەنە کەوتە ڕێخۆشکردن بۆ ڕەتکردنەوە و ئاوەژووکردنەوەی‌ ئەو ئەنجامانە بەوەی‌ کە تەنها سەرچاوە بۆ ڕاگەیاندنی‌ دەرەنجامەکان کۆمسیۆنە.
پاشان دەرەنجامی‌ ئەنجومەنی‌ پارێزگاکانمان لەلایەن ئۆفیسی‌ سلێمانی کۆمسیۆنەوە وەرگرت، کە تائێستا ئەنجامەکانی‌ نزیکەی‌ (100) وێستگەمان بەدەست نەگەیشتوە، ئەمە وێڕای‌ ئەوەی‌ کە چەند جار و لە ڕێگای‌ چەند کەناڵێکەوە داوای‌ ئەو ئەنجامانەمان لێکردون، بەڵام بێ‌ ئەنجام بووە.
هۆکارەکەشی‌ دەگێڕنەوە بۆئەوەی‌ گوایە بەدەستیان نەگەیشتوە، ئەمەش جێگای‌ گومانێکی‌ گەورەیە. چونکە وێنەی‌ دوەمی‌ فۆڕمی‌ ئەنجامەکان دەچێتە مەکتەبی‌ پارێزگای‌ کۆمسیۆن.
پاش بەراوردی‌ ئەنجامەکان دەرکەوت ئەنجامی‌ بریکارەکانمان لەگەڵ ئەنجامی‌ ڕەسمی‌ کۆمسیۆن تاڕادەیەک هاوتان، بەڵام لەلایەن لایەنێکی‌ سیاسیەوە بەشێوازێکی‌ بەرنامە بۆ داڕێژراو کاردەکرێت بۆ ئاوەژوکردنەوەی‌ ئەو ئەنجامە ڕاستەقینە فەرمیەی‌ کە لە کۆمسیۆنەوە وەرمانگرتوە.
ناکرێت دەرەنجامی‌ ڕاستی‌ دەنگی‌ خەڵک ساختەکاری‌ تێدا بکرێت بۆ ڕازیکردنی‌ تەنها یەک لایەن لە سلێمانیدا و لایەنەکانی‌ تر بێبەش بکرێن لە مافی‌ دەنگدەرەکانیان.
بۆیە ئێمە بەدەر لە دەرەنجامە فەرمییەکانی‌ کۆمسیۆن کە بە فۆڕمی‌ (902) گەیشتۆتە دەستمان بەهیچ دەرەنجامێکی‌ تر ڕازی نابین و ڕەتی‌ دەکەینەوە، ئۆباڵی‌ هەر پێشهاتێکیش دەخەینە ئەستۆی‌ بەرپرسی‌ ئۆفیسی‌ کۆمسیۆنی‌ سلێمانی‌ و لایەنی‌ ساختەکار.
ژوری‌ هەڵبژاردنی‌ بزوتنەوەی‌ گۆڕان - دەزگای‌ هەڵبژاردنی‌ پارتی‌ دیموکراتی‌ کوردستان - مەکتەبی‌ هەڵبژاردنی‌ یەکگرتوی‌ ئیسلامی‌ کوردستان - ناوەندی‌ هەڵبژاردنی‌ کۆمەڵی‌ ئیسلامی‌ کوردستان
16-05-2014

بۆ بزوتنەوەی گۆڕان و کۆمەڵی ئیسلامی و یەکگرتووی ئیسلامی لەبەردەم بەرپرسیاریەتیەکی مێژویداین.
ئێوە پشتیوانی چوار کۆمسیارتان کردووه، قبوڵکردنی ساختەکاری و زوڵم ئێستا لەدەستی ئەواندایە. دەتوانن زوڵم و ساختەکاری ڕەتبکەنەوه و ئومێد بۆ خەڵک و بەها بۆ هەڵبژاردن بگەڕێننەوە.
لەبەردەم بەرپرسیاریەتییەکی مێژویداین
خۆتان لەبریکارەکان و کارمەندەکانی کۆمسیۆن بپرسن.. باش دەزانن ئەمە هەڵبژاردن نەبووه و گاڵتەجاری بووە بە هەڵبژاردن.
1-هەڵکوتانە سەر بنکەکانی دەنگدان بەهێزی چەکدار، ساختەکاریکردنی دەنگ و لێدان لەبریکارەکان و کارمەندەکانی کۆمسیۆن. سیمای ئەم هەڵبژاردنەبوون.
2-دەسەڵاتداران نزیکەی 250 هەزار ناسنامەی ساختە دروستبکەن، چۆن دەهێڵن بدۆڕێن! چۆن ساختەی گەورە ناکەن، هەر خۆتان وێنه و بەڵگەی سەدان ناسنامەی ساختەتان لەبەردەستدایە لە سەرتاسەری کوردستان.
3-گۆڕینی ڕێژەی دەنگدەران لە 35٪ بۆ 55٪ لە پارێزگای #سلێمانی# چیمان پێدەڵێت؟
4-لە هەندێک بنکە لە کۆیه و #شەقلاوە# ڕێژەی بەشداری 120٪. بووە. بۆچی دەستیان گەشتووە به و دوو بنکه و بەوانی دیکە نەگەیشتووە؟ بەڵێ بەهووی گەشتوە، هەندێک کەم و هەندێک زۆر.
5-لە بریکارەکانتان لە شارۆچکەی #سۆران# و دوروبەری #هەولێر# بپرسن چیان دیوە، چۆن تەهدیدکراون و دەرکراون و لێیان دراوە، چۆن ساختەکراوە.
6-بپرسن بزانن چۆن لە #کەرکووک#ەوە خەڵک هێندراوە بۆ #چەمچەماڵ# و لە شارەزورەوە بۆ سلێمانی و لە #گەرمیان#ەوە بۆ کۆیه و چۆن ساختەکاری کراوە.
7-بەڵگە لەبەردەستە مولازمی ئاسایش لە هەولێر بە چەکدارەوە هاتووە و چەندین جار دەنگی داوه و وتوویەتی هەرکەس قسە بکات بێسەروشوێنی دەکەین!.
8-بەیاسا دەنگدەر ئازادە، بەڵام فشار لە دەیان هەزار دەنگدەرکراوە کە وێنەی دەنگەکانیان نەگرن فەسڵ دەکرێن. باشترین بەڵگەش ئه و 19 هەزار دەنگدەری تایبەتەیە کە دەنگیان بە دەسەڵاتداوه و وێنەیان گرتووه و سوتاندوویانە.
9-بڕۆن بە وردی ئه و سەدان سکاڵایە بخوێننەوە ئەوجا دەزانن ئەمە هەڵبژاردن نەبووە، تەنیا شانۆگەریەک بووە بۆ شەرعیەتدان بە حوکمی دیکتاتۆر.
بەڕێزان، ئێمە‌ بەشێک نین لەم ساختەکاریە، ساختەی گەورەمان لێکراوە، سوکایەتی و لێدان بە بریکارەکانمان کراوە بۆ قوبوڵی بکەین!.
ئه و چوار نوێنەرەی ئەم سێ هێزە ئەگەر واژوو لەسەر ئەنجامەکان نەکەن پەسەند ناکرێت بە دڵنیایی، ئەگەر واژووش بکەن بەشێک دەبن له و تاوانە گەورەی دەسەڵات کردوویەتی.
هیچ ساختەکاریەک وەک ئەمە نەبووە، پارتی و یەکێتی دوای ئەم هەموو نەهامەتیەی بەسەر ئەم میللەتەیاندا هێنا، 10 کورسی زیاد بکەن!
سوتاندنی دەیان سندوقیش هیچ لە بابەتەکە ناگۆڕێت، چونکە پرۆسەکە هەمووی ئیهانەی هەڵبژاردنە، خۆتان نەتانوتووە نابێت هێزی چەکدارو ئاسایش بچێتە ناوەندەکانی دەنگدان، ئەوان نەک چون، بەڵکو سندوقیان پڕکرد و هەڕەشەیان دەکرد و لە خەڵکیان دەدا..
خۆتان کاتژمێرێک پێش کۆتای دەنگدان نەتانوت دەیان ناوەند لەدەست کۆمسیۆندا نەماوە. ئێستا چی؟
داواکەی ئێمە قورس نیە، تەنیاو تەنیا ئەم ئەنجامە ساختانە واژوو مەکەن..
ئەگەر ئێستا ڕەتکردنەوەی ساختەکاری لەدەست ئێمەدا بێت و نەیکەین ئیدی خەڵک نە متمانەی بە هەڵبژاردن دەبێت نە بە ئێمە. ئەم چوار کۆمسیارە بەڕێزەی ئەم سێ لایەنە پشتیوانی کردوون بەڕەتکردنەوەی ئەنجامی ساختە بەها بۆ دەنگی خەڵک و هەڵبژاردن دەگەڕێننەوە.
ئەگەر یەکێتی و پارتیش لەدەرەوەی ڕێنمایی بە زۆر ئەنجام پەسەند دەکەن باوەک قەزافی و موبارەک 98٪ پەرلەمان هی ئەوان بێت.
عەلی حەمە ساڵح
#04-10-2018#

‎بەناوی خوای گەورەو میهرەبان
‎بەرێز: مامۆستا عەلی باپیر- ئەمیری کۆمەڵی ئیسلامی کوردستان
‎بەڕێزان: ئەندامانی ئەنجومەنی سیاسی
‎بەناوی خۆم و هەڤاڵانم لە مەکتەبی سیاسی و ئەنجومەنی سەرکردایەتی گەرمترین پیرۆزباییتان ئاراستە دەکەین بەبۆنەی 18 ساڵ تێپەڕبوون بەسەر دامەزراندنی کۆمەڵی ئیسلامی کوردستان.
کۆمەڵی ئیسلامی کوردستان لە 18 ساڵی ڕابردووی تەمەنی خۆیدا، وەک یەکێک لەهێزە سیاسییەکانی کوردستان توانیویەتی لەگۆڕەپانی سیاسیدا خاوەن دید و بۆچوونی جیاوازی خۆی بێت و هاوتەریبی هێزە سیاسییەکانی تر ڕۆڵ و کاریگەری هەبێ لە ڕووداوەکان و بەرە و پێشبردنی پڕۆسەکە.
ئێمە لە #یەکێتیی نیشتمانیی کوردستان#، خوازیارین لەگەڵ سەرجەم هێز و لایەنە سیاسییەکان پەیوەندییەکی قووڵ و پتەومان هەبێ، پەیوەندی توندو تۆڵ و دۆستانەمان لەگەڵ کۆمەڵی ئیسلامی و هێزەکانی تری گۆڕەپانی سیاسی کوردستان پەرە پێ بدەین و هەوڵی جدی بدەین بۆ خزمەتکردنی زیاتری کوردستان و گەیاندنە کاروانی ئارامی پڕۆسەی سیاسی لە ناوچەکەماندا.
جارێکی تر پیرۆزبایی گەرمتان ئاراستە دەکەم و دەخوازم ئەم یادە پیرۆزەتان هەوێنی تەبایی و یەکڕیزی و ئاشتەوایی زیاتری نێوان لایەنە سیاسییەکان بێ و بەیەکگوتاری و یەک هەڵوێستیمان سازو ئامادەبین بۆ پێشهات و ئەگەرە نوێکانی ناوچەکە.
‎کۆسرەت ڕەسوڵ عەلی
‎جێگری سکرتێری گشتی
‎یەکێتیی نیشتمانیی کوردستان
#31-05-2019#

ئێمە وەفدی هاوبەشی (#بزووتنەوەی گۆڕان#، #کۆمەڵی ئیسلامی#، #هاوپەیمانی بۆ دیموکراسی و دادپەروەری#)، وەک ئەرک و بەرپرسیارێتی مێژویی و نیشتمانی ئەم قۆناغە هەستیارەی گەلەکەمانی پیادا تێپەڕدەبێت و لەپێناو کۆتاییهێنان بەو کێشە سیاسی و قەیرانە داراییە قوڵەی بەرۆکی خەڵکی کوردستانی گرتوە، سەردانی شاری بەغدامان کردوە و لەگەڵ سەرۆکی حکومەت و سەرۆک کۆمار و سەرۆکایەتی ئەنجومەنی نوێنەرانی عێراق و تەواوی هێزو لایەنە سیاسیەکان کۆبونەوە دەکەین.
لەکۆبونەوەکەمان لەگەڵ بەرێز د. حەیدەر عەبادی، سەرۆک وەزیرانی عێراق‌ باسمان لە پاراستنی دەستکەوتەکانی خەڵکی کوردستان و چوارچێوەی سیاسی هەرێم کرد، لەگەڵ چەسپاندنی شەراکەتی ڕاستەقینە لە ناوەندی بڕیاڕی سیاسی و دۆزینەی چارەسەرێکی ڕیشەیی بۆتەواوی کێشەکان لەڕێی ئەنجامدانی گفتوگۆیەکی جدی لە نێوان هەرێم و بەغدا لەسەر بنەمای دەستوری عێراق.
پرسی بودجە و موچە و شایستە داراییەکانی خەڵکی کوردستان و ماف و ئیمتیازی هێزەکانی پێشمەرگە یەکێکی تربو لەو پرسە گرنگانەی کە بە بایەخەوە باسمانکرد و داوامان لە بەڕێز عەبادی کرد وەک بەشێکی گرنگ لە ئەرک و بەرپرسیارییەکانی بەرامبەر بەهاوڵاتیانی کوردستان سنورێک بۆ نەهامەتیەکانی خەڵک دابنێت و پەڕەیەکی نوێ‌ لەپەیوەندنی سیاسی هەڵدەینەوە کە چەسپاندنی بنەماکانی هاوڵاتیبون و دادی کۆمەڵایەتی ناونیشانی سەرەکی بێت.
هاوکات پێویستی پەلەکردنمان لەچارەسەرکردنی کێشەی کەرکووک و قەزای دوزخورماتو و گەڕانەوەی ئاوارەکان و ڕاگرتنی هەر هەوڵێک بۆ تەعریب و گۆڕینی دیموگرافیای ناوچە کێشە لەسەرەکان خستەڕو و تەئکیدمانکرد جگە لەپێکەوە ژیانی ئاشتیانە کە خزمەت بەتەواوی پێکهاتە جیاوازەکان و سەقامگیری سیاسی و کۆمەڵایەتی دەکات هیچ بژاردەیەکی ترمان لەبەردەستدانیە، بۆ ئەمەش نابێت ڕێگە بەدوبارەبونەوەی ستەمی ڕابردو بدرێت.
زەرورەتی ئەنجامدانی هەڵبژاردنەکان لە وادەی دیاریکراوی خۆیدا تەوەرێکی تری کۆبونەوەکەمان بو لەگەڵ سەرۆک وەزیرانی عێراق و پێمان ڕاگەیاند، مەرجی سەرەکی ئەنجامدانی هەڵبژاردنێکی پاک و بێگەرد کە دەنگ و ئیرادەی خەڵک تیادا ڕەنگبداتەوە لەپاککردنەوەی تۆماری دەنگدەرانەوە دەستپێدەکات، لەوبارەیەشەوە داوامانکرد هەوڵەکانی بخاتە گەڕ بۆ کۆتاییهێنان بە پرۆسەی ساختەکاری لە هەڵبژاردنەکانی عێراق و هەرێمی کوردستان کە بە هەنگاوێکی گرنگی دەزانین بۆ دەستەبەرکردنی ئیرادەی ڕاستەقینەی هاوڵاتیان لە پرۆسەی دەنگداندا.
بە سوپاسەوە بەرێز حەیدەر عەبادی بەڵێنیدا بە خەرجکردنی موچەی فەرمانبەرانی هەرێم دوای وردبینیکردن و خەرجکردنی پارەی گەنمی جوتیاران و ئامادەیی خۆی دەربڕی هاوکار و پشتیوان بێت بۆ جێبەجێکردنی داواکارییەکانی تر و لەو چوارچێوەیەشدا داوای هاوکاری لەسەرجەم هێزە سیاسییەکان کردو بەڵێنیشیدا ناوچە جێناکۆکەکان بە هاوبەشی بەڕێوەببرێن.
#04-01-2018#

بسم الله الرحمن الرحیم
روونکردنەوەیەک بۆ ڕای گشتیی
بەپێویستم زانی لەبارەی کۆبوونەوەکەی ئەمڕۆی پەرلەمانەوە چەند سەرنجێک بخەمەڕوو:
1- لەلای هەمووان ئاشکرایە هەرێمی کوردستان و عێڕاقیش بەبارودۆخێکی زۆر هەستیارو دژواردا ڕەت دەبن، کە پێویستیمان بە هەرچی زیاتر پاراستنی تەبایی و یەکڕیزیی هەیەو، گرێدانی کۆبوونەوەی پەرلەمان لەم هەل و مەرجەدا کە خەڵک و جەماوەر چاوەڕێ ی چارەسەرکرانی گرفت و کێشەکانی گوزەرانیان دەکەن، بەمەبەستی لابردنی پارێزبەندیی (حصانە) لەسەر چەند پەرلەمانتارێک شتێکی سەیرو نالۆژیکییە!
2- بێگومان هیچ کەس نکووڵیی لەجێ بەجێ کردنی یاسا ناکات و ئێمەش گرفتاری پێشێلکرانی یاساین، بەڵام یاسا نابێ بە بانێکه و دوو هەوا پیادەبکرێ و وەک لاستیک بەکەیفی خۆت بەرەولای بەرژەوەندییەکانتی بکێشێ و، ئەگەر زانیت قازانجتە پەنای بۆ بەریو، ئەگەر زانیشت بۆت باش نیە پێشێلی بکەی!
3- ئێمە هەرگیز لەگەڵ لابردنی پارێزبەندیی پەرلەمانتاران نەبووین و نابین، مادام بەهۆی ڕەخنەگرتن و قسەکردنەوە بێ، چونکە ئەوە مانای بێدەنگ کردنی پەرلەمانتارانە و پەکخستنی گرنگترین کاروچالاکییانە کە ڕەخنە گرتن و چاودێریی کردنی حکوومەت و دام و دەزگاکانە.
4- لێرەوەش زۆر سوپاس و دەستخۆشیی ئاڕاستەی سەرۆکی پەرلەمان و سەرجەم فراکسیۆنە هاودەنگەکانیش دەکەم، کە کە ئامادەنەبوون مل بدەن بۆ ئه و هەوڵەی پارتی دیموکراتی کوردستان کە پێموایە زیانێکی گەورەی بەسومعەی پەرلەمان و قەوارە سیاسییەکەمان و خودی خۆیشی گەیاندو، درزێکی سیاسیی گەورەی پەیداکرد.
5- جێ ی سەرسوڕمانیشە کە پارتی دوێنێ گوێ ی بەداواکاریی حەوت فراکسیۆنی جۆراوجۆری پەرلەمان نەدا، بۆ چاوپێداگێڕانەوەی ئه و هەوڵ و هەنگاوەی، ئایا ئه و لایەنەی لەهەموو کەس و لایەنێک “بەحەق یان ناحەق”لەم وڵاتەدا زیاتر بەهرەمەندە نەدەبوو بەتەنگ پاراستنی تەبایی و یەکڕیزییەوەبێ ؟!.
6- هیواداریشم هیچ کەس گره و لەسەر ئەوە نەکات کە #کۆمەڵی ئیسلامی#ی لەژێر زەخت و فشاردا دەستبەرداری هەڵوێستە مەبدەئییەکانی بێت، بەتایبەت وەدەنگ هاتن لەسەر بەرژەوەندیی گشتیی و بەرگریی لەچینی هەژارو نەدار.
7- کاک #سۆران عومەر#یش کادیرێکی دڵسۆزو کارای کۆمەڵی ئیسلامییەو، هیچ کات لاریی نەبووە لە ئامادەبوون لەبەردەم دادگادا گرنگ ئەوەیە دادگاییەکی دادگەرانه و بێ غەرەز بکرێ.
برای دڵسۆزتان: عەلی باپیر
7/5/2020
14/ ڕەمەزانی/1441
⚠️ تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!

بسم الله الرحمن الرحیم
ذلک ومن یعظم شعائر الله فإنها من تقوی القلوب
جەماوەری مسوڵمانی هەرێمی کوردستان و دەرەوەی هەرێمیش!
السلام علیکم ورحمة الله
بەبۆنەی هاتنەوەی جەژنی مانگی ڕەمەزانی پڕ پیت و پێزەوە، پیرۆزبایی لەهەموولایەکتان دەکەم و، لەخوای میهرەبان داواکارم خواپەرستیی و چاکەکاریی هەمووانی بەباشترین شێوە وەرگرتبێ و، لەهەڵه و پەڵه و کەم و کوڕییەکانمانی بوردبێ.
بێگومان ژیانی دنیای هەرکامێکمان تاکە دەرفەتێکە لەبەردەمماندا بۆ ئیسپاتی بەندایەتییمان بۆ خوا، ئه و ئامانج و حیکمەتەی کە خوا جینن و مرۆڤی تەنیا بۆ وی هێناونەدی: (وما خلقت الجن والإنس إلا لیعبدون) الذاريات -56-.
ئنجا مانگی ڕەمەزانیش وێستگەیەکی یەکجار گرنگ و بایەخدارە لەژیانماندا، کە ساڵانە دووبارە دەبێتەوەو، هەرکەس له و وێستگەیە بەهرەمەندبێ، بۆ بەخۆداچوونەوه و لەخوا نیزیک بوونەوە، بەهۆی خۆ پاک و چاککردن (تزکية النفس)ەوە، ئەوە نیشانەی عاقڵمەندیی و بەختەوەرییەتی (قد أفلح من تزکی. وذکر اسم ڕبه فصلی) الأعلی -15، 14-.
ئاشکراشە ئێمە لەهەرێمی کوردستان و عێڕاق و سەرجەم بەشەکانی کوردستان و وڵاتانی دراوسێ و دەورووبەریشماندا، لەبارودۆخێکی سەخت و دژواردا ئەم جەژنە دەکەین، چونکە لەگەڵ گەلێک قەیران و کێشەی جۆراو جۆردا دەسته و یەخەین، کە بەشێکیان دەرهاویشتەی پەتای (کۆڕۆنا)ن و، زۆربەشیان قووڵ و ڕیشەدارو لەمێژینەن و، بەوبۆنەیەشەوه دوای جەژنە پیرۆزە لێکردن، ڕوو دەکەمە حوکمڕان و بەرپرسانی هەرێم و دەڵێم:
یەکەم: پێویستە هەرچی زووترە هەنگاو بنێن و هیممەت بخەنە گەڕ بۆ گێڕانەوەی شکۆو ئیعتیبار بۆ دامەزراوەکانی هەرێم، بەجۆرێک کە خەڵک و جەماوەر متمانەی پێیان هەبێ و بەهی خۆییان بزانێ، نەک بەهی حیزب و شەخس و گرووپ، کە بێگومان دامەزراوه و دام و دەزگاکانی هەرێمەکەمان نیشانەی پرسیاری زۆریان کەوتۆتە سەرو لەکەدار کراون!
دووەم: چی دیکە لەکەوڵ و قاوغی تەسکی حیزبیی و شەخسیی و بەرژەوەندییە بچووک و تایبەتییەکاندا خۆتان قەتیس مەکەن و، وەرنە نێو بازنەی فراوانی دەوڵەتداریی و خزمەتی کۆمەڵگا بەگشتیی و، دڵنیابن ئامڕازی حوکمڕانیی سینگ فراوانییە (آلة الرئاسة سعة الصدر) بۆیه هەرگیز بەبێ عەقڵی گەوره و دڵی فراوان، حوکمڕانییەکی سەرکەوتوو ناکرێ.
سێیەم: ئەگەر دەتانەوێ ڕەخنەی هەقتان لێ نەگیرێ “ئەگەرنا هیچکەس لەڕەخنه و گلەیی ناهەق سەلامەت نابێ” پێویستە عەیب و کەم و کوڕییەکانتان چارەسەر بکەن، وەک گوتراوە: (الباب الذي یجیئک منه الریح سدّه، تستريح) ئەگەرنا بێگومان خەڵک هەتا عەقڵ و ویژدانیان زیندووبن، لە بەرانبەر ستەم و قۆرخکاریی و گەندەڵی و قڕیی و پڕیی و چینایەتییدا، کە لەم ڕۆژگارە لە هەرێمدا یەکجار زەقە، بێدەنگ نابن.
با هیچ بەرپرسێکیش پێی وانەبێ: چونکە خۆی و دەوروبەری تێروپڕن و بارودۆخەکەیان بە کەیفێیە، دنیا شامی شەریفە! تکای دڵسۆزانەتان لێدەکەم لە بورجە عاجییەکانتان وەرنە خوارێ و، بچنە نێو خەڵک و جەماوەر، تاکو بە چاوی سەرتان حاڵ و باڵی شپرزو مەینەتباریی زۆرکەس ببینن، نەک دەوروبەری سوود وەرگر، بە ڕاپۆرت و زانیاریی ناڕاست، چەواشەتان بکەن و ڕەشتان بە سپی پێشان بدەن و، دڵنیاشبن ئەم بارودۆخە بەم شێوەیە بەردەوام نابێ.
چوارەم: لە کۆتاییدا دەڵێم جەژن دەرفەتێکە بۆ ئاشتەوایی و تەبایی و نەهێشتنی تەم و مژی نێوانمان، بۆیە با حوکمڕان و دەسەڵاتدارانی هەرێم ئەو دەرفەتە بقۆزنەوە بۆ ئاشتەوایی لەگەڵ جەماوەری پەست و بێزارداو، خەمێکی جیددیی لە ژیان و گوزەرانی خەڵک بە گشتیی و بەتایبەت چینی هەژارو نەدار بخۆن و، گوێیان سووک بێ بۆ بیستنی دەنگی ئاخ و ناڵەو ناسۆریان و، بەره و بێ ئومێدیی و بێزاریی زیاتریان نەبەن، چونکە بێگومان هەموومان زیانی گەورەی لێدەکەین.
لەخوای پەروەردگارو بەخشەر داواکارم، دەرووی خێری خێرا بکاتەوە لە کۆی مرۆڤایەتی بە گشتیی و مسوڵمانان بە تایبەتیی و، بە تایبەتتر خەڵکی عێڕاق و هەرێمی کوردستان.
دووبارە جەژنی هەموو لایەک موباڕەک و تەمەنتان پڕبەرەکەت و هەر شادو سەرفرازبن
عەلی باپیر
30/ ڕەمەزان/1441 ک
#23-05-2020#

محەمەد فەریق
2015

#09-06-2014#

بەناوی خوای بەخشندەی میهرەبان
بۆ/ بەڕێزان لیژنەی باڵای ئامادەکاری کۆنگرەی سێیەمی کۆمەڵی ئیسلامی
ئەندامان و کادیران و لایەنگرانی کۆمەڵی ئیسلامی
السلام علیکم و ڕحمەالله و برکاتە
بابەت/ ڕوونکردنەوە

ئەنجومەنی چاودێری و بەدواداچوون وەک ئەرک و تایبەتمەندی خۆی لە بواری چاودێرییکردن و هەڵسەنگاندنی کار و ڕەوتی کۆمەڵی ئیسلامی بە شاهیدیی زۆرینەی ئۆرگانەکان، چالاکیی بەرچاوی هەبووە و ڕۆڵی گرنگی بینیووە لە چالاککردنەوەی ئۆرگانەکان، لەو پێناوەشدا -لە لایەن چەند ئەندامێکەوە کە پشتگیریان لێکراوە و بەردەوام کۆسپ بوون لەبەردەم پرۆسەی چاکسازی وگۆرانکارییدا - دووچاری چەندین ئاستەنگ و کۆسپ بووەتەوە. هەرچەندە لەو پێناوەدا ئێمە لە ڕوانگەی (لاخیر فیکم ان لم تقولوها ولا خیر فینا ان لم نسمعها) بەردەوام بووین و ماندوو نەبووین.

ئێستاش لەسەروبەندی بەستنی کۆنگرەی سێیەم و بە هیوای ئاسۆیەکی گەشتر و پێگەیەکی بەهێزتر بۆ کۆمەڵی ئیسلامیی لە کوردستاندا، هەوڵی خۆمان خستنەگەڕ بۆ دەستنیشانکردنی کەموکورتییەکان و خستنە بەردەستی نەخشە و پلانی گونجاو بۆ بەرەوپێشبردنی کۆمەڵی ئیسلامیی. لەڕێگەی داڕشتنەوەی ڕەشنووسی پەیڕەوێکی تۆکمە بۆ بەردەستی ئەندامانی کۆنگرە و دەنگدان لەسەری.

پەیڕەوێک کە بریتییە لە گرێبەستێک کە تیایدا ئەندامانی کۆنگرە بە نوێنەرایەتی سەرجەم ئەندامانی کۆنگرە لەگەڵ سەرکردایەتی نوێ لەسەری ڕێکدەکەون و پەیمانی پابەندبوونی پێوە دەدەن.

پەیڕەوێک تیایدا ئەرک و مافەکان بە ڕوونیی دەستنیشان بکرێت و دەسەڵاتەکان جیابکرێتەوە و سەربەخۆیی و لامەرکەزیی بدرێتە ئۆرگانەکان و بنەمای دەستاودەستکردنی دەسەڵاتەکان پیادەبکرێت و میکانیزمی ئاسان و سادەی بۆ دابنرێت، لەگەڵ ڕەچاوکردن و بەرزنرخاندنی هەوڵ و خەباتی پێشینەکان و دەرفەت بەخشین بە توانا و بەهرە نوێیەکان.

پەیڕەوێک کە بڕیار بوو ببێتە هۆکاری دڵدانەوەو گێڕانەوەی دەستەیەک لە ئەندامان و کادیرانی پێشکەوتووی کۆمەڵی ئیسلامیی، کە تەنیا هۆکاری نیگەرانیان پێداگیریان بوو لەسەر چاکسازیی و گۆڕانکاریی لە پەیڕەوی کۆمەڵی ئیسلامیی و بەو هیوایەوە بگەڕێنەوە نێو ڕیزەکانی کۆمەڵ و درێژە بە کاروچالاکیان بدەن.

لێرەدا بەشێک لەو گۆڕانکاریی و چاکسازییانە دەخەینەڕوو:
1- بە دامەزراوەیی کردنی ئۆرگانەکانی کۆمەڵ لەڕێگەی جیاکردنەوەی دەسەڵاتەکان و سەربەخۆکردنی ئۆرگانەکان لە میانەی پیادەکردنی سیستەمی لامەرکەزی لە بەڕێوەبردندا بە جۆرێک کە بواری گەشەکردن و داهێنانی بۆ بڕەخسێنێت و دەستکراوە بێت لە بڕیارداندا.

2- کەمکردنەوەی ڕۆتینی ئیداری و سادەکردنەوەی پەیکەری حزبی و سنوردارکردنی ژمارەی پۆست و ئۆرگانە باڵاکان.

3- بەڕێوەبردنی کۆنفرانسەکان بەجۆرێک زۆرترین بوار بدرێت بە ئەندامان و باشترین فرسەتیان هەبیت بۆ گفتوگۆکردن لەسەر نەخشەڕێگا و پەیڕەو و پەیماننامه.

4- پابەندبوون بە پەیڕەو و پرۆگرام و کارنامە و بنەما شەرعییەکانی کۆمەڵی ئیسلامی کە تا ئێستا زۆربەی خاڵەکانی جێبەجێ نەکراوە و فەرامۆشکراوە.

5- بەهێزکردنی دەزگای چاودێریی و لێپرسینەوە، بەمەبەستی بەدواداچوونی بڕیار و ڕاسپاردەکان و داکۆکیکردن لە ئەرک و مافەکانی سەرجەم پۆست و ئاست و ئۆرگانەکان، کە سەرچاوەی کێشەکان دەگەڕێتەوە بۆ کەمتەرخەمی لە جێبەجێکردنی ئەرکەکان و زیادەڕۆیی لە سنوری مافەکان.

6- بەهێزکردنی کاروباری سیاسیی و دیپلۆماسی حزب لەڕێگەی تایبەتمەندکردنی مەکتەبی سیاسی بۆ سەرپەرشتی کاروباری پەیوەندییە سیاسییەکان سەرقاڵنەکردنی بە کاروباری ئیداری و ڕۆتینی ڕۆژانەی ئۆرگانەکانەوە.

بەڵام بە داخەوە پاش هەوڵ و تێکۆشانێکی زۆر و دەیان کۆبوونەوە و وتووێژ لەو بارەیەوە نەگەیشتینە ئەنجامێک کە جێگەی ئومێد بێت و دواجار گۆرانکاڕییەکی ئەوتۆ نەهاتەدیی لەنەخشە ڕێگا و ئاراستەی کۆمەڵ، بەوپەری بێمنەتیی و بێباکیی مامەڵەکرا لەگەڵ خواستی زۆربەی هەرە زۆری کادیر و ئەندام و دۆست و لایەنگراندا، هیوایەک نەهێڵرایەوە بۆ گۆڕانکاریی و چاکسازیی، ئەمەش ئێمەی ناچارکرد وەک بەشێک لە ئەندامانی ئەنجومەنی چاودێریی و بەدواداچوون هەڵوێست وەربگرین و بڕیاری ناچاریی بدەین بە بەشداری نەکردن لە کۆنگرەدا، بەڵام بەردەوام دەبین لە هەوڵەکانی چاکسازیی نێو کۆمەڵا و داکۆکیی دەکەین بۆ گەڕانەوە وکارکردن بۆ چەسپاندنی بنەما شەرعییەکانی کۆمەڵی ئیسلامیی، لەهەمانکاتدا داواکارین ئەندامانی کۆنگرەی سێیەمی کۆمەڵی ئیسلامیی داکۆکی بکەن لەسەر پرۆسەی گۆرانکاریی ڕیشەیی لە پەیکەر و ئاراستەی کۆمەڵی ئیسلامیی لەپێناوی گەیشتن بەئامانجەکانمان.

ناوەکان :
1. ئارام قادر – کارگێڕی ئەنجومەنی چاودێریی
2. عەبدولڕەحمان ئەحمەد- کارگێڕی ئەنجومەنی چاودێریی
3. عەبدولحەمید جەلال- بەرپرسی مەڵبەندی سلێمانی و ئەندامی ئەنجومەنی چاودێریی
4. یاسین زەنگەنە- ئەندامی ئەنجومەنی چاودێریی
5. فایەق محەمەد سەلیم- ئەندامی ئەنجومەنی چاودێریی
6. شەمسە سەعید – ئەندامی ئەنجومەنی چاودێریی
7. جەمال قەرەداغی- ئەندامی ئەنجومەنی چاودێریی
8. شوان هەورامی- ئەندامی ئەنجومەنی چاودێریی
9. ئەمیر محمد فەقێ فەرج -بەرپرسی لیژنەی دارایی ئەنجومەنی چاودێریی
10.جەلال ئەحمەد- ئەندامی لیژنەی یاسایی ئەنجومەنی چاودێریی