ناوی ڕێکخراو: بەرەی ڕزگاریی زەحمەتکێشان.
کورتکراوەی ناوی ڕێکخراو: بەرزە.
جۆری ڕێکخراو:سیاسی
پێناسی ڕێکخراو: ڕێکخراوێکی مارکسی_لینینی. چەپی ڕادیکاڵ.
هەرێم: کوردستانی باشوور.
بەرپرسی یەکەمی ڕێکخراو: نەجمەدین فەقێ عەبدوڵڵا (نەجم فەقێ).


بەرەی ڕزگاریی زەحمەتکێشان کە کورتکراوەکەی (بەرزە) یە، ڕەوتێکی فکریی نهێنی بوو لەسەرەتادا لە شێوەی (ئەڵقەی ڕۆشنبیری) لەناو هەناوی (کۆمەڵەی ڕەنجدەرانی کوردستان) لە ساڵی 1979 لەلایەن کۆمەڵێک کادر بیرۆکەی درووستبوونی هاتە کایەوە. لە تەموزی ساڵی 1982 وەکو ڕێکخراوێکی کۆمۆنیستی خۆیان ڕاگەیاند لە کۆبوونەوەیەکدا لە گوندی (مەلا سەفی). وە یەکەمین کۆبوونەوەی فراوانی لەشێوەی کۆنفرانسیان بەستووە لە هاوینی ساڵی 1984 لە گوندی (ئیلنجاغی گەورە)ی ناوچەی کۆیە.
بە کورتی بیر و باوەڕی ئەم ڕێکخراوە ئەوەبوو کە کۆمەڵە و پارتە چەپەکانی تری ئەوکات لە ڕێبازی مارکسیەت و سۆسیالیزم لایانداوە و بوونەتە حزبی بۆرژوازی بۆیە پێویستە ئەڵتەرناتیڤیان درووستبکرێت بە تایبەتی ئەڵتەرناتیڤی کۆمەڵە درووست بکرێت ئەویش بە درووست کردنی حزبێکی مارکسی تر و سۆسیالست تر وە حزبێک کە لە بەرەی زەحمەتکێشان دابێت لە کوردستانەوە خەبات بکات بۆ بەرپاکردنی شۆڕشی کرێکاریی و دامەزراندنی حکومەتی کرێکاریی لە سەرتاسەری عێراق، بۆیە ئەو کات ئەم جۆرە ڕێکخراوانە وەکو ڕێکخراوی (عێراقچی) یاخود بە (عێراقچیەتی) تۆمەتباردەکران. دوای ئەوە لەسەرەتای ساڵی 1986 سەرکردایەتی (بەرزە) بە ڕەخنەگرتن لە سیاسەتی خۆیان و ڕێکخراوە چەپەکانی تری ئەوکات وەکو بەخۆداچوونەوەیەک و پەیڕەوکردنی سیاسەتێکی نوێ ڕێکخراوی (بەرزە)یان هەڵوەشاندەوە و ڕێکخراوی (یەکێتی خەباتی کۆمۆنیستی)یان دامەزراند و سەرجەم ئەندامانی پێشووی (بەرزە) لەم ڕێکخراوە نوێیە واتە (یەکێتی خەباتی کۆمۆنیستی) درێژەیان بە تێکۆشان و خەبات دا. دواجار لە ناوەڕاستی ساڵی 1988 و لەهەلومەرجی تایبەتی ئەوکاتدا ڕێکخراوی (یەکێتی خەباتی کۆمۆنیستی) بە تەواوی هەڵوەشاوە و ئەندامانیان پەرش و بڵاوبوونەوە و هەندێکیان وازیان لە خەباتی سیاسی هێنا و ئەوانی تر لە ڕێکراوە جیاجیاکاندا درێژەیان بە خەباتدا.

ناوی دامەزرێنەرانی بەرەی ڕزگاریی زەحمەتکێشان (بەرزە):
دامەزرێنەرانی (بەرزە) دەکرێن بە دوو بەشەوە
1- ساڵی 1979 لە شێوەی (ئەڵقەی ڕۆشنبیری و فکری) کە هێشتا ناوی لێنەندرابوو بیرۆکەی دامەزراندنی هاتە کایەوە کە بریتی بوون لە (نەجمەدین فەقێ عەبدوڵڵا،گوشاد عەبدولڕەحمان بایز، عوبێد خالید، سەباح حەسەن خورشید ناسراو بە سۆران). کە لە سەرەتادا خاوەنی بیرۆکەکە (نەجمەدین فەقێ عەبدوڵڵا) بوو.
2- ساڵی 1982 و لە تەمموزی ساڵی 1982 ڕێکخراوی (بەرەی ڕزگاریی زەحمەتکێشان - بەرزە) وەکو ڕێکخراوێکی مارکسیستی بە فەرمی خۆیان ڕاگەیاند وە ناوی ڕێکخراوەکە لەلایەن (نەجمەدین فەقێ عەبدوڵڵا) پێشنیارکراوە و لەلایەن ئەندامانی دیکەی دامەزرێنەر پەسەندکراوە دامەزرێنەرانی (بەرزە) لە 1982 بریتین لە (نەجمەدین فەقێ عەبدوڵڵا، هۆشیار عەبدولخاڵق، سەباح مەحمود). وە نەجمەدین فەقێ عەبدوڵڵا (نەجم فەقێ) وەکو بەرپرسی ڕێکخراوەکە کاری کردووە.

‎سەرلەبەیانی ڕۆژی شەممە 23ی خاکەلێوە، مستەفا سەلیمی کە بۆ ماوەی 17 ساڵ بوو بەند کرابوو، لە لایەن کۆماری پەت و سێدارەوە لە زیندانی #سەقز# ئیعدام کرا.
‎مستەفا سەلیمی دوای ئەوەی ماوەی دوو هەفتە لەوەپێش لەگەڵ کۆمەڵێک بەندکراوی دیکە لە زیندانی سەقز ڕادەکەن، پەنا دێنێ بۆ باشوری کوردستان، بەڵام بەپێی لێدوانی فاتمە کەریمی بەڕێوەبەری تۆڕی مافی مرۆڤی کوردستان مستەفا سەلیمی پاش هاتنی بۆ خاکی باشوری کوردستان لەلایەن هێزە ئەمنییەکانی هەرێمی کوردستان لەسنوری #پێنجوێن# ڕادەستی هێزەکانی کۆماری ئیسلامی دەکرێتەوە.
‎ سەرەڕای ئەوە کە ئەو کەسە چ تاوانێکی هەبووبێ، کاتێک پەنای هێناوە حەقوابوو وەک پەنابەرێکی کورد ڕەفتاری لەگەڵ کرابایە و یاساکانی مافی مروڤ و پەنابەری بۆی لەبەر چاو گیرابا. بۆیە ڕایدەگەیەنین کە:
‎ 1. لەسێدارەدانی مستەفا سەلیمی تاوانەکەی دەکەوێتە ئەستۆی ڕژیمی جینایەتکاری کۆماری ئیسلامی کە دامودەزگا سەرکوتگەرەکانی لەوانە دەزگای قەزاییەکەی هیچ شەرعییەتێکیان نەماوە و ئەم تاوانەش بە هەموو پێوانەیەک مەحکومە و دەبێ لێی لە قاو بدرێ.
‎ 2. ڕادەست کردنەوەی ناوبراو لەلایەن هەر کەسێکەوە بێت، کارێکی ناڕەوایە کە نەریتی تا ئێستای هەرێم بەرانبەر پەنابەران، بە تایبەتی کوردانی پەنابەر، پێشێل دەکات و دەبێتە ڕچەشکێنییەک بۆ نەریتێکی نەشیاو. ئەو کارە کاریگەریی نەرێنی لەسەر پێوەندی و هاوپشتی خەڵکی ڕۆژهەڵات و باشور دادەنێ.
‎ ئێمە ئەو کردەوەیە مەحکوم دەکەین و داواکاریان ئۆرگانە پێوەندیدارەکانی هەرێم لەو بارەوە لێکۆڵینەوە بکەن و ڕوونکردنەوە بۆ ڕای گشتیی خەڵکی کوردستان بدەن و ئەو کردەوە ناڕەوایە بێ وڵام نەهێڵنەوە. پێویستە هەموو دەسەڵات و حیزبەکانی کوردستان لەو هەلومەرجە هەستیارەدا نەهێڵن ڕیزەکانی گەلی کورد لە هەموو بەشەکان نیگەرانی و کەلێنی تێبکەوێ.
‎ کۆمەڵەی زەحمەتکێشانی کوردستان
‎ 23ی خاکەلێوەی 1399 – 11-04-202

[1]

لەرۆژی 2 /1/ 2018 هەردوو مەکتەبی سیاسی #حزبی شیوعی کوردستان# و #حزبی زەحمەتکێشانی کوردستان# کۆبوونەوەیەکی هاوبەشیان سەبارەت بەبارودۆخی سیاسی کوردستان و عێراق و ناوچەکە کرد.لەبابەتە گرنگەکانی کۆبوونەوەکەدا هەڵبژاردنی نوێنەرانی عێراق بوو.
سەبارەت بەو بابەتە هەردوو حزب لەو بڕوایەدان کە پێویستە هەموو لایەنە سیاسیەکانی هەرێمی کوردستان بەلیستێکی نیشتمانی هاوبەشی هەمووان بەیەکەوە بەشداری ئەوپرۆسەیە بکات، کە لیستەکە ببێتە نوێنەری ڕاستەقینەی گەلی کوردستان و لەوێ داکۆکی لەمافە ڕەواکانی گەل بکات و دوور بێ لەبەرژەوەندی تەسکی حزبیایەتی.
مەکتەبی سیاسی مەکتەبی سیاسی
حزبی زەحمەتکێشانی کوردستان و حزبی شیوعی کوردستان
#02-01-2018#

رۆژی هەینی ڕێکەوتی 25ی مانگی ئاگۆستی 2017 لە بناری هەڵگورد بە هۆی دەمەقاڵێی نێوان چوار برای خەڵکی “#گوندەژۆر#”ی دەڤەری #باڵەکایەتی# و پێشمەرگەکانی کۆمەڵەی شۆڕشگێڕی زەحمەتکێشانی کوردستان ئێران، دوو برای خەڵکی گوندەژۆر گیانیان لەدەستدا و دووی دیکەشیان بریندار بوون. دواتر خەڵکی دەڤەرەکە هەڵیانکوتایە سەر سەنگەر و شوێنی نیشتەجێبوونی هێزی پێشمەرگەی حیزبەکانی ڕۆژهەڵات و هێزەکانی پێشمەرگەش بۆ ئەوەی بەر بە تێکهەڵچوون لەگەڵ خەڵک بگرن، بەخێرایی شوێنەکانی خۆیان چوڵ کرد و لە ئەنجامدا بنکە و سەنگەرەکانی پێشمەرگەی هەموو لایەنەکان سوتێنرا.
ئێمە لەو بارەوە سەرنجی هەمووان بۆ ئەو خاڵانەی خوارەوە ڕادەکێشین:
1. بە هیچ شێوەیەک ئەو پێشمەرگانە نەدەبوو تەقەیان کردبا تا وەها کارەساتێک نەخوڵقابا. ئێمە کردەوەی ئەو کەسانەی وا بە هەر پاساوێک تەقەیان لە خەڵک کردووە بە کارێکی خراپ و نەشیاو دەزانین و مەحکومی دەکەین، ئەو ڕەفتارە لەگەڵ پڕەنسیپی پێشمەرگەی کۆمەڵە بە تەواوی نامۆیە.
2. ڕادەستکردنی تاوانباران بۆ هێزە یاساییەکانی هەرێمی کوردستان کارێکی پێویست بوو و ئاماژەیە بۆ ئەوە کە ئەو حیزبە لەو ڕووداوە نەخوازراوە و لە کردەوەی کەسەکانی لەوێ ناڕازی بووە. پێمانوایە پێوێستە لێکوڵینەوەی تەواو لەو ڕووداوە بکرێ.
3. حیزبەکان و خەڵکی ڕۆژهەڵاتی کوردستان هەموو کاتێک پشتیوانی خەباتی ڕەوای خەڵکی باشورن و لە هەر کوێ تێکەڵاوی خەڵکی باشور بوون، پێوەندییان لەگەڵ خەڵک باش بووە و لەو پێناوەدا قوربانیان داوە و هاوخەباتی ڕاستەقینە بوون. بە تایبەتی کۆمەڵە لەو بوارەدا گەلێک کرداری بۆ بەرگری لە خەڵکی باشور و جۆشدانی خەباتی ئەو دوو بەشەی کوردستان لە مێژوودا بۆخۆی تۆمار کردوە.
4. ئەو ڕووداوە نەخوازراوە نابێ ببێتە بیانوو بۆ بەرتەسک کردنەوەی کار و هەڵسوڕانی حیزبەکانی ڕۆژهەڵات. کارێک کە بە داخەوە بەشێک لە مێدیا و دەستگەلێک هەوڵیان بۆ داو، نەک هەر نەیانویست ئاو بەو ئاورەدا بکەن، بەڵکوو بوونە هەڵخڕێنەری ئیحساسات و کەم بایەخکردنی خەباتی ڕۆژهەڵات. ئێمە ئەو جۆرە هەڵسوکەوتە مەحکوم دەکەین و لامانوایە کەلێن دەخاتە نێوان ڕۆژهەڵات و باشوری کوردستان. بە تایبەتی ئێستا کە پرسی ڕێفراندۆم و سەربەخۆیی باشوری کوردستان لە ئارادایە ئەو هەڵوێستانە تەنیا دوژمنانی پێ شاد دەبێت.
5. ئێمە لە هەڵچوون و توڕەیی خەڵکی دەڤەرەی باڵەکایەتی بە هۆی کوژرانی نابەحەقی ئەو دوو برا تێدەگەین و، خۆمان بە شەریکی خەمیان دەزانین و سەرەخۆشی گەرم ئاراستەی بنەماڵە و کەسوکاریان دەکەین و دڵنیایان دەکەینەوە کە ڕەنجی ئەوان لە شۆڕشی باشوردا بەرز دەنرخێنین و بە هەموو شێوەیەک بۆ ساڕیژبوونەوەی ئەو برینە هەوڵ دەدەین.
6. لە هەمانکاتدا هێرشکردنە سەر سەنگەر و بنکەی پێشمەرگەکانی ڕۆژهەڵات و سوتاندنیان بە ناڕەوا و بە کارێک دەزانین کە دڵی دوژمنانی گەل خۆش دەکات. لە هەموو لایەنێکی بەرپرس داواکارین کە لەسەر ئەو ناحەقیە وەدەنگ بێن و ئەم هەلە بقۆزنەوە بۆ ئەوەی تۆوی هاوخەباتی نێوان باشور و ڕۆژهەڵات بڵاوبکەنەوە و فەرهەنگی مەدەنییانەی سەردەم و نەتەوەیی بۆ چارەسەری کێشە خولقاوەکان پەرەپێبدەن نەک ڕق بچێنن.
#کۆمەڵەی زەحمەتکێشانی کوردستان# لەو هەلومەرجە هەستیارەی وا کوردستان پێیدا تێپەڕ دەبێ، بە پێویستی دەزانێ کە حیزبەکانی ڕۆژهەڵات هاوئاهەنگییەکی زۆرتر لە نیوان خۆیان پێکبێنن و، ئەوە بە ئەرکێکی فەوری دەبینێ. هەروەها داوا لە هێزە سیاسیەکانی هەرێمی کوردستان دەکەین کە بۆ چارەسەری ئەو کێشەیە هاوکار و ڕێگاخۆشکەر بن.
کۆمەڵەی زەحمەتکێشانی کوردستان
26-08-2017