باخچێوە بېگەرد
ئاماڎەکەردەی: ئەسعەد ڕەشید
بەشەی سەڎ و شەسهەمە
عومەرو کوڕو خەتابی کە هەڵای چا عانەنە موسوڵمان نەبییەبۍ، شمشېرش هۊرکېشت، لوا پەی کۊ سەفای پەی کوشتەی موحەمەدی، ڕانە (سەعد و کوڕو ئەبو وەقاس)ی یاوا پەنەش، کۆتې واتە و واچ، عومەر ماچۊ من ملو پەی ئاگەی پەی ئانەی سەرەو موحەمەڎی بارو پەی خېلەکەیم، پەی قوڕەیشی، پی تەرزە:
شیی پەی کۊی سەفا وە عەزەم داوا
سەعد بەنی وەققاس ناگاه پېش یاوا
واتش: یا عومەر دڵ وە ئەندېشەن
یە ئەو کۊ مەشیی، خەیاڵت چېشەن؟
وات: مەشوون قەتڵی موحەمەد کەروون
فەرقش پەی قەومی قوڕەیش ماوەرون
سەعد وات: یەقین تۊ جەو خوارتەری
نادان و نەفام هەرزەکار تەری
قەتڵی موحەمەد باوەری نە دڵ
مورادت هەرگیز نمەبۊ حاسڵ
خەیاڵی فاسید عەقڵی مەحاڵەن
بەحسی بې مەعنا فیکری بەتاڵەن
موحەمەد حەبیب پەروەردگارەن
دینش تېغی تیژ ئەهلی کوففارەن
تایەفەی هاشم سیلسیلەی مەناف
مەکەرات وە ڕزق توعمەی تیغی ساف
وجوودت چەشنی دېوانەی بەڎخۊ
قەتڵی موحەمەد دەست بڎۊ پەی تۊ
عوممەر شمشېرش کېشا جه خیلاف
وات: قەسەم بە سەقف سەمای بې تەناف
مەبۊ جە وەردا قەتڵی تۊ کەروون
ئۆسا موحەمەد وە دەست باوەرون
سەعد هەم دەرلا دەس بەرد وە شمشېر
دوو ئەژدیهای جەنگ زنندە و دلېر
پېچیان هەردوو وېنەی پېچی مار
مڎاشان وە هەم وە حەربەی ناخار
ئاخر سەعد دیش عوممەر غالیبەن
پەی قەسدی قەتڵش تەمام تالیبەن
واتش: یا عوممەر ئامان وە یادت
سەعید بەنی زەید یانێ دامادت
چەنی زەوجەی وېش ئەو هامشیرەی تۊ
موسوڵمان بېیەن وەنەت مەعلووم بۊ
جارێ تۊ بشۊ قەتڵی ئەوان کەر
ئۆسا بشۊ پەی قەتڵی پېغەمەر.[1]