Piştî 55 salan deriyê Komeleya Huner û Wêje ya Kurdî a li Rewandizê hatiye girtin. Hunermend dibêjin, hikumet girîngiyê nade hunerê û wisan biçe wê li Rewandizê huner ber bi tinebûnê biçe.
Hunermend mamosta Zirar Rewandizî di sala 1977’an de Komeleya Hunerî ya bi navê ‘Komeleya Huner û Wêjeya Kurdî ya li Rewandizê’ damezrand. Karê sereke ya vê komeleyê lidarxistina karê hunerî û qeydkirina stranane. Herwiha di komeleyê de şêwekarî jî dihate fêrkirin. Demek dûr û dirêj komeleyê xizmeta hunera Rewandiz dike û bi dehan kes di komeleyê fêrî hunerê bûne.
Di çil salên borî de, bandora çalakiyên hûnerî yên komeleyê gelek diyar bûn. Lê niha komele tê girtin û hunera bajêr jî ber bi windabûnê diçe.
Niha deriyê komeleyê hatiye qulfkirin û demek dirêje hatiye girtin. Herwiha metirsiya rûxînê jî li ser dîwarê komeleyê heye, kel û pelên di nava komeleyê de bi salane nehatine bikaranîn. Endamê Desteya Rêveber ya Komeleya Huner û Wêjeya Kurdî ya li Rewandizê Piştîwan Cemal derbarê mijarê de ji Rojnews re axivî.
Piştîwan da zanîn ku piştî qeyrana 2014’an hikumetê alîkariya ji bo komeleyê qutkir, ev jî bandorek nerênî li ser çalakiyên hunerî yên komeleyê kir. Piştîwan destnîşankir ku pêwîst bû hikumetê alîkariyê ji komeleyê qutnekiriba, lê piştî hate birîn çalakiyên komeleyê jî rawestan û komele yekser qepat bû.
Piştîwan di dewamê de behsa karê komeleyê kir û wiha got; “Komeleya Huner û Wêje ya Kurdî a Rewandizê karê hunerê ji bo komên hunerî dikir û li her çar parçeyên #Kurdistan#ê çalakiyên xwe pêktanî. Di salên 90’ê de bi dehan sirûdên netewî ji bo şoreşên Kurdan qeyd kir. Hunermend Nasir Rezazî û Necmedîn Xulamî jî li vê komeleyê stran û sirûdan qeyd kirin. Herwiha hunermend Ednan Kerîm di dema xwe de livir bi hunerê re xerîk bû. Ji ber çalakiyên komeleyê, li Rewandiz hestên hunerê zindî bûn.”
Hunermend Karmend Rewandiz ji bo vê hikumetê rexne kir û got; “Nabe êdî ev komele bi vî awayî bibe, pêwîste hikumet kar li ser vê bike û komele dest bi karê xwe bike. Ji ber ku ev komele xizmetek mezin ya hunerî a bajarê Rewandizê kiriye û nabe bi vî şêweyî muamele pêre were kirin. Komele weke peymangeha Hunere Ciwanek ya Rewandizê bû, lê girtina wê ziyane. Ji ber ku komele malbendek taybet û girîng bû, li komeleyê kes heya digihiştin peymangehan dihatin perwerde kirin. Li peymangehan tenê ew kes dibûn kesek akademî. Lê bi girtina komeleyê re bandorek nerênî li ser peymangehê jî çêbû.”[1]