بە بۆنەی 16ی ئاب ساڵڕۆژی دامەزراندنی #پارتی دیموکراتی کوردستان# و هاوکات لەدایکبوونی جەنابی سەرۆک بارزانی، پیرۆزبایی گەرمی خۆم ئاراستەی سەرجەم پەیڕەوانی ڕێبازی پارتی و بارزانی و نیشتمانپەروەرانی کوردستان دەکەم.
بۆ من و سەرجەم دڵسوز و تێکۆشەرانی ڕاستەقینەی نیشتمان، سەرۆک بارزانی ڕێبەر و هێمایەکی مەزنی نیشتمانییە‌، کە تەواوی ژیانی خۆی، بۆ سەرفرازی میللەتەکەمان و چەسپاندنی ئاشتی و و پەرەپێدانی کولتووری مرۆڤدۆستانە و پێکەوەژیانی گشت پێکهاتەکانی کوردستان تەرخان کردووە‌.
وێڕای پێرۆزبایی، هیوای تەمەندرێژیی بۆ جەنابیان دەخوازم.
بەدەرفەتی دەزانم، سوپاس و پێزانینم ئاراستەی هەموو هەڤاڵانی پارتی (#پێشمەرگە#، کادر، ئەندام و لایەنگرانی) بکەم، کە وێرای هەموو سەختی و قەیرانەکان، بە هەوڵ و چالاکی بەردەوامیان، پارتی لە سەر ئاستی نیشتمان و ناوچەکەدا بە پێشەنگی و هێزەوە ماوەتەوە‌‌.
لەم بۆنەیەدا لەبەرانبەر شکۆی شەهیدانیشدا، سەری ڕێز دادەنوێنین و دووپاتیدەکەینەوه کە هەمیشه لە یادمان دەبن و خزمەتی خانەوادەی سەربەرزی شەهیدانیش بە ئەرکی هەرە لە پێشینەی خۆمان دەزانین.
پارتی، بە درێژایی 72 ساڵ خەباتی بە ڕێبەرایەتی بارزانی نەمر و جەنابی سەرۆک بارزانی، ڕۆژانی سەخت و پیلانی گەورەی تێپەڕاندووە، بەتایبەتی لە شەڕی دژ بە تیرۆر و دوژمنان و تێکشکاندنی پیلانی خیانەتکاران، لەمەولاش پارتی بەهێزی زیاترەوە بەرەو ئایندەیەکی گەش هەنگاو دەنێت و سەر بۆ هیچ فشارێک و هەرەشەیەک ناچەمێنتەوە.
ئەمڕۆ لە کاتێکدا، ساڵڕۆژی دامەزراندنی پارتی پیرۆز دەکەین، پارتەکەمان وەک هەمیشه ئاڵا هەڵگری بەدەستهێنانی مافەڕەواکانی گەلەکەمانە و لەو بۆنەیەشدا جەخت لە سەر خەباتی بێ وچانمان بۆ گەیشتن بە هەموو ئاوات و خواستە ڕەواکانی گەلەکەمان دەکەینەوە و لە هەمانکاتدا بە ڕەچاوکردنی بەرژەوەندییەکانی گەلەکەمان لە سەر بنەمای ڕێزی دوولایەنە هەوڵی چەسپاندنی ئاشتی و پێکەوە ژیان لە گەل گشت نەتەوەکانی ناوچەکە دەدەین.
گۆڕانکارییەکانی ناوچەکە، ئەوەمان لێدەخوازێت ئێمەی هەڤاڵانی پارتی ساز و ئامادەتر لە مەیدانی خەباتدا بین، چونکە لەگەڵ بەهێزیی پارتی، کوردستانێکی بەهێزمان دەبێت و هەر پارتی وەک هەمیشە هەوێنی یەکریزیی ناوماڵی کوردستانیش دەبێت.
بژی کوردستان.
بەره و سەرکەوتنی زیاتر.
#مەسرور بارزانی#
#16-08-2018#