مەحموود زامدار، ساڵی 1944ز. لە شاری #هەولێر# لەدایکبووە، ساڵی (1970 _ 1971ز.) بەشی کوردی کۆلێژی ئەدەبیاتی بەغدای تەواوکردووە، سێ ساڵ و نیو فەرمانبەر بووە لە فەرمانگەی زەریبەی گشتی، 32 ژمارەی خەباتی قوتابییانی بڵاوکردووەتەوە، 7 ساڵ لە ئێستگەی کوردی بەرنامەی هەبووە، 144 ژمارەی گۆڤاری منداڵانی بە هاوکاری هاوسەرەکەی بڵاوکردووەتەوە، 46 بابەت و لێکۆڵینەوەی زمانەوانی و کۆمەڵایەتی و ئەدەبی لە گۆڤار و ڕۆژنامەکاندا بڵاوکردووەتەوە، لە ژمارە 9 تا ژمارە 545 ئەندامی دەستەی نووسەران و بەرپرسی بەشی هونەری ڕۆژنامەی هاوکاری بووە، 7 ساڵ لە گۆڤاری بەیان سکرتێری نووسین بووە، 1 ژمارەی گۆڤاری شمس کوردستانی بە تەنیا دەرکردووە، 2 ساڵ مامۆستای کوردی بووە، 750 کۆری جیاجیای لە بەغدا و شارەکانی کوردستان ئەنجامداوە، 8 مانگ لاپەڕەی التقافة الکوردیةی ڕۆژنامەی ئێراقی ئامادەکردووە، 1970ز. بۆ 1981ز. لە هەرسی گۆڤار و ڕۆژنامەی بەیان و ڕۆشنبیری و هاوکاری بە 937 بەرهەمی بڵاوکراوە، توانیویەتی پلەی یەکەمی بەدەست بهێنێت، ئەندامی چەندین دەزگا و سەندیکا و ڕێکخراوی ڕۆژنامەنووسی و هونەری نووسەرانی کوردستانی و ئێراقی و عەرەبییە، تا ئێستاش زیاتر لە 30 پەرتووکی بەچاپ گەیاندووە.[1]
ڕۆژی (#08-09-2011#ز.) لە هەولێر کۆچی دوایی کرد.