لە ساڵی 1925ز. لە گوندی (لۆدێ) دەڤەری #بۆتان# لە #باکووری کوردستان# هاتووەتە دنیاوە، لە منداڵییەوە هەستی بە ستەمی کاربەدەستانی (تورکیا) کردووە بە تایبەتیی دوای کوژاندنەوەی شۆڕشەکەی کورد لە (ئاگری داغ) لە ساڵی 1930ز. بە سەرکردایەتی #ئیحسان نووری پاشا#، بۆیە لە ناوەڕاستی سییەکانی سەدەی ڕابردووەوە بەخاو و خێزانەوە زێدی باب و باپیرانیان بەجێهێشت و ڕوویان کردووەتە #باشووری کوردستان# و لە #زاخۆ# جێگربوون و ملیان دایە کاروکاسبی.
سەبری، لە تەمەنی هەرزەکارییەوە هەستی کوردایەتی لەلا خولقاوە و چووەتە پاڵ #پارتی هیوا# و لەسەر چالاکی ڕامیاری لە ساڵی 1945ز. بە تاوانی پشتگیری کردنی شۆڕشی بارزان گیراوە و لە شاری #موسڵ# خراوەتە بەندیخانەوە و کاتێکیش کە #پارتی دیموکراتی کوردستان# لە ساڵی 1946ز. دامەزرابوو ئەندامێکی بە جەرگ و چالاکی ئەم پارتە نەتەوەییە دیموکراتییەی کورد و لەو سەردەمەوە بەهرەی شاعیریی لەلا خولقاوە و هۆنراوەی نیشتمانی داناوه. لەگەڵ هەڵگیرساندنی شۆڕشی ئەیلوولی کورد لە (#11-09-1961#ز.) بووەتە #پێشمەرگە#ی کوردستان و ئەرکی چەکداری و خەباتکاری و ڕۆشنبیری و ڕاگەیاندنی بەجێهێناوه، لە دوای ڕێککەوتننامە مێژووییەکەی (11ی ئاداری 1970ز.) دێتە شاری #هەولێر# و دوای ماوەیەک دەچێتە #بەغدا# و بەشداری نووسینی ڕۆژنامە و گۆڤارە کوردییەکانی وەک (التاخی و برایەتی لە دواییشدا بەیان و ڕۆشنبیری نوێ و نووسەری کورد) دەکات.
لە دوای دەستپێکردنەوەی شەڕ لە کوردستان لە بەهاری (1974ز.) دووبارە دەچێتەوە پاڵ شۆڕشی کورد و لە بەشی ڕاگەیاندن ئیش دەکات و لە دواییدا لەبەر باری تەندرووستی دەچێتەوە بەغدا تاکوو هەردەم لەژێر چاودێری پزیشک بێت و لە دوای ڕاپەڕینە مەزنەکەی بەهاری (1991ز.) لەگەڵ کۆڕەوە ملیۆنەکەی کورد دەچێتە دەرەوەی وڵات و لە ساڵی 1992ز. خۆی دەگەیەنێتە وڵاتی (نەروێژ) و دەبێتە پەنابەر و لە هەموو چالاکییەکی وێژەی و ڕۆشنبیری و ڕامیاری کورد لەو وڵاتەدا بەشداری دەکات تاکوو لە (#25-10-1998#ز.) کۆچی دوایی کردووە.
سەبری بۆتانی شاعیرێکی هەستناسکی بەهرەداربووه، شاعیری سرووشت و جوانی بوو، هۆنراوەکانی لە ڕۆژنامە و گۆڤارە کوردییەکاندا بڵاودەکردەوە، لە دواییدا لە دیوانێکی خنجیلانە بە ناوی (شین و شادی) لە ساڵی (1979ز.) لە بەغدا بە چاپی گەیاند و دەکەوێتە (262) لاپەڕەی قەبارە ناوەنجی و زۆربەی هۆنراوەکانی لە سەرکێشی سووکی (7 بڕگەیی 3-4 خۆماڵی کوردین) و ناوەرۆکێکی پتەویان هەیه. [1]
Այս տարրը գրվել է (کوردیی ناوەڕاست) լեզվով, սեղմեք պատկերակը
բացել իրը բնագրի լեզվով
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
Այս տարրը արդեն դիտվել 230,478 անգամ
Գրեք ձեր մեկնաբանությունը մոտ այս նյութը!