$باشووری کوردستان$
- شارەدێی #پردێ# لەلایەن هێزە ئێڕاقییەکانەوە داگیرکرا و ڕێگەی #کەرکووک#-#هەولێر#یش داخرا.[1]
- نەتەوە یەکگرتووەکان نیگەرانی خۆی سەبارەت بە ڕاپۆرتەکانی تاڵان و وێرانکاری ماڵان و شوێنەکانی کار و بارەگای پارتە سیاسیەکان دەردەبڕێت و دەڵێت هەواڵی سوتاندنی نزیکەی 150 خانوو لە دوزخورماتو و تەقاندنەوەی 11 خانووی تری خەڵک و بەرپرسی کوردی‌ پارتە سیاسییەکانیان بەدەستگەیشتووە.[2]
- حسێن ئەمیر عەبدوللەهیان یاریدەدەری سەرۆکی ئەنجوومەنی شورای ئێران ڕایگەیاند، حکومەتی عێراق بەتوانایە و لەتوانایدایە بەچەند خولەکێک شاری #هەولێر# بگرێت.[2]
- فڕۆکەکانی تورکیا هێرشێکی ئاسمانیان بۆ سەر ناوچە سنوریەکانی (زاب و ئاڤاشین و باسیان) دەستپێکرد و بۆردومانی بنکە و بارەگاکانی #پەکەکە# دەکەن.[1]
- عەلی ئەکبەر ولایەتی، ڕاوێژکاری باڵای ڕابەری کۆماری ئیسلامی ئێران بۆ کاروباری نێودەوڵەتی پیرۆزبایی لە حکومەت و گەلی عێراق کرد سەبارەت بە گرتنەوەی کەرکووک و ڕایگەیاند هەرێمی کوردستانی عێراق هەرگیز لەوڵاتەکە جیاناکرێتەوە.[2]
- پارێزگاری هەولێر ڕایدەگەیەنێت پارێزگای هەولێر ئارامە و هیچ مەترسییەکی سیاسی و سەربازی لەسەر نییە و ئەوەی ڕویداوە لەسنوری پارێزگای کەرکووک بووە.[2]
- #ڕێبوار تاڵەبانی#، سەرۆکی ئەنجوومەنی پارێزگای کەرکووک بەوەکالەت لە کۆنگرەیەکی ڕۆژنامەڤانیدا لە هەولێر ڕایگەیاند، کەرکووک لەلایەن حەشدی شەعبییەوە داگیرکراوە.[3]
- ژمارەیەک لە خەڵکی پارێزگای کەرکووک کە بەهۆی پێشڕەویەکانی سوپا و حەشدی شەعبی-ەوە پارێزگاکەیای جێهێشتوه و خۆپیشاندانێکیان بۆ بەردەم کونسوڵخانەی ئەمریکا لە هەولێر ئەنجامدا و داوای پشتیوانی دەکەن.[2]
- گەریلاکانی #هەپەگە# لە خەرەگۆل، لەدژی ئۆپەراسیۆنی سوپای تورک چالاکیان ئەنجامدا، لە ئەنجامدا سێ سەرباز کوژراون و شەڕیش لە سنوورەکە بەردەوامی هەیە.[4]
- کۆمەڵێک خۆپیشاندەر بە نیشانەی ناڕەزایەتی لە ڕۆڵی ئێران لە هێرشەکانی حەشدی شەعبی بۆ باشووری کوردستان و ئاوارەبوونی خەڵک، چوونە بەردەم کۆنسوڵخانەی ئێران لە هەولێر و ئاڵای کۆماری ئیسلامییان هێنایە خوارەوە.[1]

بە ناوی خودای بەخشندە و میهرەبان
جەماوەری سەربەرزی کوردستان
کوردستانیانی دەرەوەی وڵات
ڕای گشتی جیهان
پاش ئەوەی گەلی کوردستان بە شێوەیەکی ئاشتییانە تەعبیری لە ڕای خۆی کرد لە دیاری کردنی چارەنووس، کە مافێکی ئاسایی و سروشتی هەر گەل و نەتەوەیەکە، ئێستا گەلەکەمان کەوتووەتەوە بەر هەڕەشە و ئابلوقە و سزادانی بە کۆمەڵ. حکومەتی عێراقیش بە ناوی فەرزکردنی یاسا وا خەریکی سزادانی میللەتێکە کە تەنیا ڕای خۆی دەربڕیوە و هیچ تاوانێکی نەکردووە. ئەو سزادانەی کە لە دژی گەلەکەمان هەیە پێشێلکردنی هەموو سنوورەکان و یاسا و دەستوری عێراقە و هاوکات بە گەلەکۆمەکی دەیانەوێت ئیرادەی خۆیان بەزۆری چەک و شەڕ بەسەر گەلەکەماندا بسەپێنن و شکۆی گەلەکەمان بشکێنن. ئەوەش بووەتە هۆی تێکدانی ژیانی خەڵک و ئاوارەبوونی زیاتر لە سەد و پەنجا هەزار کەس.
لێرەدا موخاتەبەی ویژدانی گەلانی جیهان و ڕای گشتی و ئازادیخواز و ڕۆشنبیرانی سەرتاسەری جیهان دەکەم کە پشتیوانی گەلی کوردستان بن و ڕێگە لە جینۆساید و کارەساتێکی تازە بگرن کە بەسەر گەلەکەماندا دێت و گوشار بخەنە سەر حکوومەتەکانتان و ناوەندەکانی بڕیار بۆ ئەوەی بێنە دەنگ لەسەر ئەو ستەمەی کە لە گەلی کوردستان دەکرێت. چونکە حکوومەتەکان لەبەر بەرژەوەندییەکانیان، قوربانیی خەڵکی کوردستان و پێشمەرگەیان لە بیر چووە کە لە شەڕی تیرۆرستانی داعش بەخشیویانە و لە جیاتی هەموو جیهان بەرسینگی ڕێکخراوی تیرۆریستی داعشیان گرتبوو و هەزاران شەهید و بریندارمان لەو پێناوەدا. بۆیە داوا دەکەم ڕێگە لەم شەڕ فرۆشتن و کوشتار و پێشێلکاری و ئاوارە کردنی خەڵک بگرن کە حکوومەتی عێراقی لە ڕێگەی میلیشیا و هێزەکانییەوە بە هاوکاری و ڕێنمایی دەرەکی لە دژی کوردستان ئەنجامی دەدات.
هەر لێرەدا داوا لە هەموو کوردستانیانی دانیشتووی ئەوروپا و ئەمەریکا دەکەم کە بە شێوەیەکی یاسایی و ئاشتییانە بۆ پاڵپشتی کردنی گەلەکەمان، خۆپێشاندان و چاڵاکی مەدەنی ئەنجام بدەن و داوای هاوکاری گەلانی ئەو وڵاتانە بکەن کە تیایدا نیشتەجێن کە ئەم شەڕ و ئابلوقەیە لە دژی گەلەکەمان بە زووترین کات ڕابگرن. داواکارم دەنگی مەزلومییەتی کوردستان و پەیامی ئاشتیخوازانەی گەلەکەمان بە جیهانییان بگەیێنن.
مەسعود بارزانی
20-10-2017

ناوەندی ڕاگەیاندنی هێزەکانی پاراستنی گەل- #هەپەگە#، بە بڵاوکردنەوەی ڕاگەیەندراوێک سەبارەت بە چالاکیی گەریلاکانی لە چەلێ و گەڤەری سەربە #جولەمێرگ# و #خەرەگۆل#، کوژرانی 42 سەربازی تورکی ڕاگەیاند.
ئەمڕۆ ناوەندی ڕاگەیاندنی هەپەگە لە سەر ماڵپەڕی فەرمییدا ڕاگەیەندراوێکی بڵاوکردەوەو، زانیاری و وردەکارییەکانی چەند چالاکییەکی گەریلاکان و ئۆپەراسیۆنەکانی سوپای تورکی ڕاگەیاند.
هەپەگە ڕایگەیاند: ئۆپەراسیۆنی سوپای تورک ڕۆژی 16ی مانگ بەرەو زاپی هەرێمەکانی پاراستنی مەدیا دەستپێکرد، گەریلاکانمان لە بەرامبەر ئەو ئۆپەراسیۆنەدا وەستاون و لە دوو ڕۆژی ڕابردوو شەڕی سەخت لە نێوان گەریلاکان و سوپای تورک ڕوویداوە.
لە ڕاگەیەندراوی هەپەگەدا هاتووە: دوێنێ دوو یەکینەی دوژمن هەوڵیاندا خۆیان بگەیەننە ئەو ناوچانەی خەرەگۆل کە لە کۆنتڕۆڵی گەریلاکانماندان، گەریلاکانمان دژیان چالاکییان ئەنجامدا، لەو چالاکییەدا 11 سەربازی تورک کوژران.
لە بەردەوامیدا هەپەگە ڕایگەیاند: بەرەبەیانیی ڕۆژی 19ی مانگ کاتژمێر 02:30 خولەک، فڕۆکە جەنگییەکانی سوپای تورک گردی شەهید سیداریان بۆردومان کرد، پاشان کاتژمێر 06:00ی سەرلەبەیانی لە نێوان هێزەکانمان و سەربازەکانی سوپای تورک لەو ناوچەیەدا شەڕێکی سەخت ڕوویدا، لە ئەنجامدا 14 سەربازی تورک لەوێ کوژران، هاوکات دەستەیەکی دیکەی سوپای تورک کە هەوڵیاندەدا خۆیان بگەیەننە شەڕەکە، کرانە ئامانجی چالاکیی گەریلاکانمان و لەو چالاکییەشدا شەش سەرباز کوژران.
لە بەشێکی دیکەی ڕاگەیەندراوەکەدا هاتووە: چالاکیی گەریلاکان دژی ئۆپەراسیۆنی سوپای تورک لە دەڤەری بارزان بەردەوامە، دوێنێ کاتژمێر 06:00ی سەرلەبەیانی لە سەر گردی بەیرەق چالاکییەک دژی یەکینەیەکی سوپای تورک ئەنجامدرا، لەو چالاکییەدا چوار سەرباز کوژران، کاتژمێر 06:20خولەکی سەرلەبەیانیی دوێنێ گەریلاکانمان لە گردی شەهید مونزور چالاکییەکی دیکەیان ئەنجامدا، لەو چالاکییەشدا دوو سەبازی تورک کوژران.
ڕاشگەیەندراوە: لە دووەمین قۆناغی هەنگاوی شۆڕشگێڕانەی شەهید بەدران گوندیکرامۆ و شەهید نالین مووشدا، گەریلاکانمان لە چەلێ و گەڤەر دژی سوپای تورک چالاکییان ئەنجامدا، دوێنێ کاتژمێر 09:00ی سەرلەبەیانی، لە گەڤەری سەربە جولەمێرگ چالاکییەک دژی ئۆتۆمبێلێکی سوپا ئەنجامدرا، کە دوو فەرماندە و دوو سەربازی تێدابوو، لە ئەنجامی ئەو چالاکییەدا هەموو ئەوانەی لە ئۆتۆمبێلکەکەدا بوون کوژران و ئۆتۆمبێلەکەش تێکشکێندرا، کاتژمێر 06:45 خولەکی سەرلەبەیانیی ئەمڕۆش گەریلاکانمان بە قەناس لە قەڵا پەریخانی سەربە گەڤەر چالاکییەکی دیکەیان ئەنجمادا، لەو چالاکییەشدا سەربازێک کوژرا.[1]
20-10-2017