خوشکان و دايکانی سەربەرزمان لە کوردانی ئێزیدی
خاتوو نادیە موراد..
جەماوەری خۆڕاگری کوردستان
ئاسوودەو بەختەوەرین بە دەستنیشانکردنی خاتوو نادیە موراد، وەک باڵیۆزی نیازپاکی لە ڕێکخراوی نەتەوە یەکگرتووەکان..
بەم بۆنەیەوە پیرۆزبایی لە خۆمان و سەرجەم ئافرەتانی کوردستان دەکەین، بەتایبەتی ژنان و کچانی شەرەفمەندی ئێزیدی و سەرجەم ژنان و کچانی تری قوربانی دەستی داعش..
ئێمە لە ئەنجومەنی باڵای کاروباری خانمان لە حکومەتی هەرێمی کوردستان هەردەم پاڵپشتی خۆمان لە خاتوو نادیە موراد و مەینەتی و مەرگەساتی دایکان و خوشکانی ئێزیدیمان کردووە، کە دووچاری دڕندەترین تاوانکاری سەردەم بوونەتەوەو هەموو هەوڵێکمان بۆ ڕزگارکردن و زانینی چارەنووسی ئەوانەی تا ئێستا لە ژێردەستی تیرۆریستان ماون، بەو هیوایەین دەستنیشانکردنی خاتوو نادیە موراد تەکانێکی تر بە هەوڵ و کۆششەکانمان بدات بۆ ئاشکراکردنی چارەنووسی ژنان و کچان لە قوربانیانی دەستی داعش، هەروها هیوای سەرکەوتن بۆ ئەرکی پیرۆزی نادیە خان دەخوازین، بەهەموو شێوەیەک و بەگوێرەی توانا ڕەخساوەکانی ئەنجومەنی باڵای کاروباری خانمان لە حکومەتی هەرێمی کوردستان، ئامادەین تەواوی پشتگیریی لەم ئەرکە پیرۆزەی خاتوو نادیە بکەین.
بێگومان دەستنیشانکردنی خاتوو نادیە موراد بە باڵیۆزی نیازپاکی لە گەورەترین ناوەندی نێودەوڵەتی، کە ئەویش بریتییە لە ڕێکخراوی نەتەوە یەکگرتووەکان، ڕەنگدانەوەی پاڵپشتی و هاوسۆزی نێونەتەوەییە بۆمەرگەساتی ژنان و کچانی ئێزدی و پێکهاتەکانی تر کە بوونە قوربانی دەستی تیرۆریستانی داعش..
بەو هیوایەین هەموولایەکمان هاوکاری خاتوو نادیە موراد بکەین تا مەرگەساتی ئێزیدییەکان وەک جینۆسایدی سەردەم بناسرێت و هەموو جیهان پاڵپشتی ئەو مەسەلەیە بکات..
بەهیوای سەرکەوتنی خاتوو نادیە موراد لەم ئەرکە نوێیەی داو بەهیوای ئەوەی هەموولایەکمان پالپشتی کارو خەباتی خاتوو نادیە بکەین لەسەر ئاستی کۆمەڵگەی نێودەوڵەتی، ئەنجومەنی باڵای کاروباری خانمان هەردەم هاوکار و پاڵپشت دەبێت بۆ هەر هەوڵ و کۆششێک بۆ ئاشکراکردنی چارەنووسی خوشکان و دایکانی ئێزیدیمان و بەجینۆساید ناساندنی مەرگەساتی خوشک وبرایانی ئێزیدی لەلایەن کۆمەڵگەی نێودەوڵەتی..
ئەنجومەنی باڵای کاروباری خانمان لە حکومەتی هەرێمی کوردستان
16-09-2016

شەماڵ عەبدوڵڵا

ڕێزدار: هاورێی خۆشەویست کۆسرەت ڕەسول جێگری سەرۆکی هەرێمی کوردستان
بەخەم و پەژارەیەکی زۆرەوە سەرەخۆشی خۆم ڕادەگەیەنم بۆ شەهیدبوونی لە ناکاوی فەرماندەی گشتی شێرکۆ فاتیح شوانی، (عەمیدی فەرماندەی یەکەی هێزی یەکی پێشمەرگە) و فەرماندەی گشتی حسین منصور، (عەمیدی فەرماندەی یەکەی دووی هێزی پێشمەرگە) و گشت ئه و پێشمەرگانەی ژیانی خۆیان بەخشی بەرامبەر ئه و هێرشە وەحشی گەریەی #داعش# کردیە سەر شاری کەرکووک لە چەند ڕۆژی ڕابردوو. هەروەها هاوسۆزی و خەمی هەموو ئه و خێزانانەی نەتەوە یەکگرتوەکان کە لە هەرێمی کوردستان و عێراق دەژین دەگەیەنین بە کەس و کاری شەهیدان.
بەرگری بێوێنەی پێشمەرگە نموونەی بەرخودانی درێژخایەنی ئێوەی بەرێزە لە بەرگری کردن. ڕۆلی بەرێزتان لەسەرکەوتنی شەڕی کەرکووک لە کۆتایی هەفتەی ڕابردوو و بەشداری کردنی کردنی بێ وێنەی لیوای سێی تایبەت بەرز دەنرخێنین هەروەها دەمەوێ پیرۆزبایی لە بەرێزت و سەربازە قارەمانەکنت بکەم بۆ ئه و سەرکەوتنەی پاراستنی کەرکووک و هاولاتیان لە هێرشی نا مرۆڤانەی داعش.
شەری جوامێرانەی ئه و کوردانەی کە ژیانیان بەخشی لە 30 و 31 ی مانگی یەکی 2015 نمونەی پاراستنی ئاشتیە.
ئەوان هاورێی تۆ بوون لە شەرەکە، هەوەها قوربانی ئەوان هەرگیز لەبیرناکرێت. لەناو بردنی ئه و هێزە شەرخوازانە و بەرگری کردن لە ئاسایشی هەرێمی کوردستا ن و عێراق دەبێتە باشترین پەند و وانە لە یادگاریەکانیان. نەتەوە یەکگرتوەکان بەردەوان دەبن لە هەماهەنگی و پاڵپشتی ئێوه و بەرخودانی ئێوە.
تکایە ڕێزو متمانەم قبووڵ بەرموون.
نیکۆلای. ی ملادینۆڤ
بەغدا 03-02-2015

لە بارەگای نەتەوە یەکگرتوەکان بە دروشمی (ئازادی ژنانی شەنگال ئازادی مرۆڤایەتییە) کۆنفرانسێک ڕێکخرا. ڕۆژی هەینی 19-06-2015 لەبارەگای نەتەوە یەکگرتوەکان لە شاری (جنێڤی) سویسرا، کاتژمێر 16:00 تا 17:30 کۆنفرانسێک لەژێر دروشمی ئازادی ژنانی شەنگال ئازادی مرۆڤایەتیە ڕێکخرا. کۆنفرانسەکە بە سپۆنسەری ناوەندی ئاشتی ژنان (جەنی)، نوێنەرایەتی تەڤگەری ژنانی نەتەوەیی کورد، تەڤگەری ژنانی کورد لە ئەوروپا، ئەنجومەنی ژنانی ئێزدی بێریڤان و دەزگای ژنانی فێممیس ئەنجامدرا. نوێنەری ژنانی ئێزدی (لەیلا بۆران) کە بەڕێوەبەری کۆنفرانسەکەی دەکرد لە قسەکانیدا باسی لە مێژووی کۆمەڵکوژی ژنان کرد و وتی:"قرکردنی ژنان تاوانێکی مرۆڤایەتییە". بۆران ئاماژەی بەوەش کرد کە کۆمەڵکوژی ژنان لەسەر بنەمای ڕەگەزی پێکدێت و وتی:" من وەک کچێکی ئێزدی داوا دەکەم ئیدی کۆمەڵکوژی 73 هەمینی ئێزدیەکان کۆتایی بێت و پەلە بکرێت لە ئازادکردنی ژنانی شەنگال". پاشان نوێنەری کۆمەڵی مافناسانی دیموکرات و نێونەتەوەیی (باربارا سپینەللی) قسەی کرد و سەرنجی ڕاکێشایە سەر ئەوەی کە پێویستە لەبەرامبەر قڕکردنی ژنان تێکۆشانی ستراتیژیک و ماوەدرێژ بەڕێوەبچێت. سپینەللی لەبەرامبەر ئەو هۆڤیەتانەی دژی ژنان بەڕێوەدەچێت باسی لە گرنگی ئاواکردنی کۆمێن و گەیاندنی بە ئاستی گەردونی کرد. هەروەها نوێنەری جەنی (جانان پۆڵات) لە کۆنفرانسەکەدا قسەی کرد و تیشکی خستە سەر ئەوەی کە دوای داگیرکردنی شەنگال ئەوان وەک ڕێکخراوی جەنی کەمپینێک یان بەناوی (ئازادی ژنانی شەنگال ئازادی مرۆڤایەتیە) دەستپێکردوە، بۆئەوەش چەندین ئەندامی خۆیان ناردوەتە کوردستان، لەهەمان کاتدا ڕاپۆرت ئامادە دەکەن، پانێڵ، سیمنار، کۆبونەوە و کۆنفرانس ئەنجام دەدەن. پۆڵات بانگی لە دامودەزگاکانی ژنان بەگشتی، ڕێکخستنە مەدەنیەکان، لەسەرویانەوە نەتەوە یەکگرتوەکان و تەواوی مرۆڤایەتی کرد کە لەو کەمپینەی ئەواندا جێگە بگرن و پشتیوانیان بکەن. لە ئەنجامنامەی کۆنفرانسەکەدا بڕیار درا کەمپینی ئازادی ژنانی شەنگال لە هەموو وڵاتان بەردەوام بێت، و لەو بارەیەوە چالاکی جۆراوجۆر ڕێکبخرێت. هەروەها بڕیاردرا ئەندامانی کەمپینەکەیان بنێرن بۆ شەنگال و ڕۆژئاوا، لەهەمان کاتدا بۆ ڕزگارکردنی ژنانی شەنگال پشتگیری ماددی و مەعنەوەی کۆبکرێتەوە، کۆنفرانس ڕێکبخرێت و کۆمێن ئاوابکرێن.