سوپایا پاسدارێن ئیرانێ داخواز ژ وەزارەتا ناڤخوە یا ئیرانێ دکە کو 33 گوندێن سینۆری یێن پارێزگەهێن ئورمیە و سنە ڤالا بکە دا کو رێ ل بەر چالاکی و بزاڤێن پارتییێن رۆژهلاتا کوردستانێ بگرن.
فەرماندارێ بریارگەها هەمزە یا سوپایا پاسداران و سەرۆکێ لژنەیا ئیستیخبارات و ئۆپەراسیۆنان یا ئەنجومەنا پێشڤەبرنا ئەولەکاریێ ل رۆژهلات و رۆژئاڤایێ ئیرانێ محەمەد تەقی ئۆسانلوو د نامەیەکێ دە ژ وەزیرێ ناڤخوەیێ ئیرانێ ئەحمەد وەحیدی خوەست کو 33 گوندێن ل باژارێن مەریوان، بانە، سەردەشت، ئورمیە و ماکو وەرن ڤالاکرن.
فەرماندارێ بریارگەها حەمزە د نامەیا خوە دە دبێژە کو ئەو گوندێن ل دەڤەرێن سینۆری یێن قەدەغەکری جﮪ دگرن و هێزێن کوردێن دژبەری کۆمارا ئیسلامی یا ئیرانێ د سالێن داوی دە سوود ژ هەبوونا ئەڤان گوندان ژ بۆ چوون و هاتنێ و هەروەسا شاندنا چەکان د ناڤا ئیرانێ دە وەرگرتنە. هەروها نشتەجهێن گوندێن سەر سینۆر ژی ب ڤەگوهاستنا تشتێن نەقانوونی ل سەر سینۆر تێن تاوانبارکرن.
د نامەیێ دە کو د 20-11-2022ان دە هاتیە نڤیساندن و مۆهرا نهێنی ل سەر هەیە و نوو هاتیە ئەشکەرە کرن، فەرماندارێ سوپایا پاسداران دبێژە کو ب سالانە بریارا ڤالاکرنا گوندان هاتیە دایین، لێ ژ بەر کو هن سازیێن سیاسی و ئەولەکاریێ ب وان رە هەڤکاری نەکرنە و هەژمارەک ژ پارلامەنتەران ل هەمبەری ڤالاکرنا وان هەلوەست نیشان دانە، بریار ب جﮪ نەهاتیە ئانین و ب دەمێ رە وێ نفووسا گوندان زێدە ببە.
ئەندامێ ئەنجومەنا یەک ژ گوندێن سەردەشتێ کو بریارا ڤالاکرنا وێ هاتیە دایین ژ رووداوێ رە گۆت کو حکوومەتا ئیرانێ ب سالانە ژ بۆ ڤالاکرنا گەل ب زانەبوون خزمەت نەدایە گوندان، لێ بەلێ ژ بەر کار و دەبارا گەل یا ژ گوندان ل سەر چاندنی، خوەدیکرنا پەز و کارێ سینۆر، نشتەجهێن وێ ل گوندان دمینن.
ئەندامێ ئەنجومەنێ راگهاند ئەگەر ئەڤ گوند بێن ڤالاکرن، ژیانا ل سەر سینۆر ب کیلۆمەترەیان کوورتر دبە و هەرێم ب تەمامی وێ ببە هەرێمەکە سەربازی. هەروەها گۆت ژی دەزگەهێن حکوومەتێ و لەشکەری بەریا نها ب وان رە ل سەر ڤێ یەکێ ئاخڤینە.
فەرماندارێ بریارگەها حەمزە یا سوپایا پاسداران داخواز ژ حکوومەتێ کر کو بریارێ ب تەمامی جیبجی بکە و بوودجەیا پێویست ژ بۆ دابینکرنا ئەولەهیێ ل ناڤچەیێن سینۆری تەرخان بکە. هەروەها پێشنیار دکە کو گەل ژ بۆ ڤالاکرنا گوندان، ل گوندێن دن ئەرد ژ وان رە وەرە دایین دا کو خانیان ئاڤا بکن و حکوومەت ئالیکاریا وان بکە و هەروەها دەینێن چاندنیێ و بانکێ بدن وەلاتیێن ڤان گوندان دا کو دەرفەتێن کار ژ وان رە پەیدا بکن.
ل گۆری نامەیا فەرماندارێ بریارگەها حەمزە ل ماکۆ 1 گوند، ئورمیێ 8 گوند، سەردەشت 11 گوند، بانە 8 گوند و مەریوانێ 5 گوند بێن ڤالاکرن. ژ 33 گوندان 21 ژێ نشتەجهن و 765 ژی مالبات لێ دژین. هەروەها ب سالانە 10 گوند هاتنە ڤالاکرن و دو گوندێن بانا و مەریوانێ تەنێ د دەمسالێن بهار و هاڤینێ دە ئاڤەدانن.[1]