Ciwan Paşeroj in
Selwa Cemîl Ebûd

Ciwan ruh û mêjîyê ku civak xwe pê rêxistin dike ne. Bi ciwanan, civak li pêşîya şerê dinyayê yê qirej li ber xwe dide. Ciwantî qonaxeka guhertin û veguhartinê ye. Ji ber ku ciwan xwedî roleka pir mezin in. Lewra civak bingeha xwe ji hêza ciwanan digire û paşeroja xwe li ser ciwanan saz dike.
Ciwan xwedîyê taybetmendîyên çêker û xirabker in. Ji ber ku ciwanekî bê rêxistin, wekî çekeka atomî ye, qirker û wekî karesatekê ye. Ciwan dema rêxistinkirî û zane bin, ji bo pêşîgirtina wê hêza qirker, dê ewqasî bi bandor û avaker bin. Her wiha dîyar e û li ber çavan e ku dewlet dixwazin ciwanan û bi taybet ciwanên kurd, dûrî bingeha wan a rêxistinkirî bikin.
Dewlet dixwazin ciwanan her tim ji bo xwe bikar bînin. Ji bo vê divê her tim ciwan ji xwe ra perwerdeyê bingeh bigirin. Tu carî dûrî perwerdeyê nemînin. Ji fen û fûtên dewletên qîrker û nijadperest ra bibin bersiv. Divê ciwan xwe li dora perwerdeyê bikin xelekeka ji pola. Xwe rêxistin bikin û nebin lîstoka di destê dijminan da. Divê ciwan her tim vê bersivê ji birsa xwera bidin: Ez ciwan im, bingeha avabûna welat û civaka xwe me, ne amûr û lîstoka dijminan im. Her dem erka xwe nas bikin û xwedî li welat û doza xwe derkevin. Nebin firoşê welat û doza bi hezaran salan. Bikevin zanîna warê xwe. Li hember pîlanên ku dijmin ji wan ra datînin şîyar bin. Nebin hezkirîyê cîh û warê ku hûn tê da bibin penaber û bindest. Ev armanca dijmin e ku te dûrî welat dixe. Te dike penaber û bindest, yan jî di nav welatê te da te dike sîxur û xwînmijê birayê ji wê dayîka ku te mezin kirî ye. Dijmin bi rêya van tiştan şerê xwe yê taybet dimeşîne û dixwaze xwe bi ser bixe. Ji bo vê divê her ciwan bi sekna xwe ya fedayî û dilê xwe yê pak û zelal, li pêşîya tundîyan bisekinin. Divê ciwan parastina welatê xwe ji xwe ra wekî erkeka jîyanî bigirin dest û li hember şerê taybet yê dijmin xwedî hêz û sekin bin.
Civakbûyîn li dora ciwanan tê avakirin, ciwan jî li dora civakê tên avakirin. Li ser bingeha ku divê her du werin parastin, bi rêya hêza ciwanan. Ji ber ku yek ji taybetmendîyên ciwanan hêz e. Hêza wan ya afirîner û lêgerîner ku ji hemû pirsgirêkên civakê ra dibe çareserî, ji pîlanê dijminan ra dibe astengî, li pêşîya lîstokên dijminan dibe benda herî mezin. Ciwanê ku xwe û civakê bi rêxistin bike, divê xwedî li taybetmendîyên xwe derkeve û nebe kujerê civaka xwe.
Çi bi şerê bi çekê be, çi bi şerê pênûsê be. Bi perwedeyê xwe ji kiryarên dijmin biparêzin! Dijmin di rêya çanda teqlîd û kopîpest, ciwanan dixapîne û jiyaneka şaş bi wan dide jîyandin. Dijmin bi pir awayan ciwanan dixapîne. Ji wan awayan hinek jî ev in: Wan dûrî çand, civak û malbata wan dixe. Ev dûrxistin hêvîyên ciwanan tune dike. Li şûna wan jî ramanên bê wate di mejî da çêdike. Di heman demê da ji welat û doza wan dûr dixe. Di encamê da ciwanên wendayî derdikevin holê.
Divê were zanîn ku mejî û çanda dewletê dijberê azadîya civakê ye. Pêwîste ciwan û civak bizanibin ku kuştina rojane li ser sînorên dewletan, lîstokeka qirêj e û têkildarî azadîyê nine. Ev sîyaseteka dewletê ye li hemberî ciwanan e. Dixwaze ciwanan ji nasnameya kurd dûr bixe, ji welat û dozê dûr bixe. Her weha dixwaze ciwanan ji diruşmeyên “Bijî Rêber Apo”, “Me Bi Ciwantî Dest Pê Kir, Em Dê Bi Ciwantî Bi Ber Bikevin” dûr bixe. Em dê sîyaset û kiryarên dijmin têk bibin. Em bi Rêbertî û tevgera xwe ve girêdayî ne. Di vê dozê da em ên ciwan pêşeng in û em dê her dem bi xurtî têbikoşin.[1]