ئازیز نەپەرسای...

میڕزا ئۆلقاڎر، جە دووری یارەکېشەنە، دەروونش مەجۊشیۊ، فیراق و دووریش، فەرقش پارە پارە کەردەن، نەفەسەو هەناسەیش دلۍ قەفەسو سینەیشەنە پڕنان، ئاڎە چا دوورۆ، بەبۍ ئانەی ڕۊخسارش دیاربۊ، بەبۍ ئانەی دەنگش بەی وە گۊشش، بەڵام پېسە هۆرەبرووسکەو وەهاری، مەدۊ لېش، تاقەتش بی بە هوون، ماتڵ و سەبرش بی بە ئاو.
میرزا گلەیۍ جە بەختەو وېش کەرۊن، ئاڎ ماچۊ: فەرەنگیۍ و ئیسلام دمای چن ساڵا ناوەشی میانیشا، کەچی سوڵحەشا کەردە، ڕومەکۍ بە ئازادی وېشا، بە ئاهەنگو سەڎا، کەوتۍ ڕا، قاتڵ و مەقتوڵ ڕېکۍ کەوتۍ، بڕیا عەداوەت ماجەرای مازی، کەچی قار و قینەو تۊ هەر نەبڕیا!.
ئازیز نەپەرسای جارێ جە حاڵم
سەبرت سۊچنان یانەی خەیاڵم
سارای دەشتی دڵ بەرشییەن جە دەس
مەزرەعەی شاڎییم کەردەن وە قەقنەس
دووخان دووکەل هەناسەی سەردم
کەردەن وە زوخال مەجموعەی فەردم
چوون کوورەی ئایېر مەخېزو کۊ کۊ
یانی یە ڕاسەن نیاوان وە تۊ
فیراقت فەرقم پارە پارە کەرد
نەفەس جە قەفەس تەن ئاوارە کەرد
فیدای دووریت بام جەمین جامی جەم
دووری تۊ بېیەن بەردەسیلەی خەم
بۍ چەخماخەو بەرق، بۍ باد و باران
مەدەی لېم وېنەی ڕەعد وەهاران
تاقەت بی وە هوون ماتڵ بی وە ئاو
تک تک چەنی هەرس زوخاو و سەیلاو
ڕېزا وە دامان دیسان هەم جە نۊ
توخوڎا سا ڕاسەن نیاوان وە تۊ
یانە وېران بام ئەر نەیاوابۊ
مەبۊ مەنزوورت هەر وە داوا بۊ
فەرەنگی سوڵحش چەنی ئیسلام کەرد
ڕەهگوزەر ڕوم جە عرووس ویەرد
کۊتابی ئاشووب شاهان سەروەر
دریا تەساڵەی جەنگ هەفت لەشکەر
قاتل جە مەقتووڵ یەکسەر بېیەن ڕازی
بڕیا عەداوەت ماجەرای مازی
دنیا گرد تەمام سازیان وە هەم
قار و قین جە لای تۊهەر نەبی کەم
فایدەم جە لات مەردە مەردەن بۊ
کوچ خېڵ ئەو خوار لەحد کەردەن بۊ
تۊ بۍ بەڵا بای من کەردم بە وېم
بادا کە هەرچی مەیۊ بەیۊ پېم
مەزانوون دوزەخ هەر پەی من تاوەن
چی وەرتەر عەزاو چا هەم عەزاوەن.[1]