باخچێوە بېگەرد
ئاماڎەکەرڎەی: ئەسعەد ڕەشید
بەشې سەڎ و حۆتەمە
ئەچی بەشەنە، محەمەڎ تەمەنش یاوان بە سېڼزە ساڵی، ئەبوتالیبی مامۊش، نیازو سەفەریش هەن پەی (شام)ی، گەرەکشەن محەمەڎی جیابازۊن، بەڵام محەمەڎ بەگوفتە شیرینەکاش پەنەش ماچۊ؛ گەرەکتەن ئەچېگە منێ بې تاتەی، بې ئەڎای، بې برای جیابازین؟ بە ئەژنیەی ئا واتە شیرینا، ئەبوتالیب جەرگش بی بە ئاوی و داش پرمەو گرەوای، ماچۊ؛ هەرگیز جیاتنمازۊ، تەدارەکېش پېتۆ و محەمەڎش سوارکەردو چەنی وېش بەردش پەی شامی.
جە قەولی ئیخبار شیرین ئینتیخاب
وەیتەور، جە مەکتوب، ڕەوزەتولئەحباب
ساڵی سېڼزەهەم، جە بەتحا، مەقام
عەمری (هەمایۆن)، شای خەیرولئەنام
چوون ئەبوتالیب، سەرداری سەروەر
جەو دەمدا، کەردش، ئیرادەی سەفەر
بشۊ، تا بە شام، پەرێ، تجارەت
خەرمانی حەسرەت، بدۊ وە غارەت
حەزرەت بە مەجزووم، فەرماوا، ئەی عەم
من مازیی، نە جا، جە مەککە بې خەم
نە مادەر، پدەر، نە ئیخوان، داروون
وە بې تۊ ئەوقات، وە تاڵ مەویاروون
ئەبوتالیب، ئەژنی، دیققەت کەرد حاسڵ
دەریاچەی ڕەحمش، جۊشیا، نە دڵ
وات: وەڵڵا حەرفت، گرد نەقشی دڵەن
فیراقت جە لام، خەیلێ موشکېڵەن
ئەر جەردە، ئەهل عەلعان یاوان، پېم
مەبۊ ببەرووت، یەقین، چەنی وېم
پەرېشان، مەبەر، خاتر، بکەر شاڎ
نمازوون، نەجا، هەرچی، بادا، باد
خولاسەی، کەلام، تەدارەک، کەردش
خواجەی کائینات، چەنی وېش بەردش
قافیڵەی قوڕەیش، دەردەم بیی ڕاهیی
هەم ئەبوتالیب، ئەمینی ڕاهیی
حەزرەت سوار کەرد، چەنی تجاران
وە عەزمی مایەی، خەڕیدی شاران.[1]