Li parka Norra Bangtoget a Stockholmê Kurdistaniyan ji bo şermezarkirina êrişên kîmyewî ji hêla dewleta Tirk ve û hevkariya hikumeta Swêd bi dewleta Tirk re li dijî #gelê Kurd# meşeke girseyî li dar xist.
Bi mebesta şermezarkirina êrişên bi #çekên kîmyewî# li ser #gerîla#, her wiha helwesta dewleta Swêd li dijî gelê Kurd û ketina wê bin şantaja dewleta Tirk a dagirker Kurdistaniyan li Stockholmê meşeke girseyî li dar xist.
Xwepêşandan li parka Norra Bangtoget a Stockholmê bi armanca şermezarkirina bikaranîna çekên kîmyewî li dijî gerîla û her wiha helwesta dewleta Swêd ku dixwaze li gorî daxwaza siyaseta qirkirin û krîmînalîzekirina kurdan a ji hêla dewleta Tirk ve nêzî kurdan bibe, meşeke girseyî bi beşdariya komîteya piştgîriya rojava, Kurdistaniyên li Stockholm û bakurê Swêd pêk hat. Meşa ku heya bi meydana Normamlmstorget a navenda bajêr domand, gelek alayên PKK hatin hilanîn û her wiha gelek pankartên mezin ku wêneyên gerîlayên bi çekên kîmyewî hatine şehîdxistin hatin hildan.
Di destpêka meşê de hevserokê NCDK-Skandînavya Hemîd Amed axaftin kir û got: Dewleta Swêd û Fînlandiya ji bo endambûna NATO′yê serlêdan kirine. Helbet em weke kurd ne li dijî vê yekê ne, tiştê ku em napejirînin û rexne dikin, Kurd kirine mijara bazariya navbera xwe û dewleta Tirk. Ev yek hem li dijî pîvanên demokrastî ya Swêd e û şermeke pir mezin e.
Piştî axaftinê girse bi nava bajêr de heya bi meydana Normalmstorget meşiya. Di meşê de diruşmên Bijî şervanên gelê Kurd, Bijî berxwedana gerîla û Kujer Erdogan hatin berzkirin.
Piştî girse gihaşt qada mîtîngê, hevseroka NCDK-Skandînavya Nadya Salih axaftin kir û got: Em îro li vir kom bûne, cîhaneke ku tê de ji hêla dewleta hov a Tirk ve têkoşer û şoreşgerên Kurd bi çekên kîmyewî dişewitînin û qetil dikin. Her wiha siyaseta dewleta Swêd a ku keseke dijminê kurdan û xwînxareke hov a weke Erdogan weke miroveke baş û kurdan jî weke terorîst bi nav dikin, şermezar dikin û bila çavên xwe ji rastiya heyî re negirin. Her wiha qurbanîkirina ji bo berjewendiyên xwe yên qirêj jî siyaseteke pir çewt û xeter dibînin. Ji ber ku pirsgirêka Kurd û Kurdistanê rastiyek e, tu kes nikare şoreşa Kurdan û rastiya şoreşa Rojava ji nedîtî ve were û mafê tu kesî nîne ku Kurdan ji xwe re bikin mijara bazariyê.
Li ser navê Partiya Sosyalîst a Gel (Socialistisk Politik Efolket) Peter Widén ku ji bajarê Eskilstuna hatibû axaftin kir û got: Di berdêla azadkirin û guhertina ji bo jiyana jinan li Rojhilata Navîn bi pêşgentiya Kurdan hate kirin û tevayî cîhan serbilindiya xwe ya ji bo ku kar û xebateke wisa nîşan da. Lê mixabin ew komploya ku li ser PKK′ê dimeşe bi tevahî girêdayî NATO′yê ye. Ji ber ew şêwaz û sîstema ku îro li Rojava hatiye damezirandin, bi rastî jî dikare ji bo tevayî Rojhilata Navîn jî bibe mînak. Ew jiyan û ew demokrasiya ku bi rastî jî serbilindî pê dikin hemû jî ya PKK′ê ye, lê îro ji tirsa PKK wê dixin nava lîsta terorê. Ev yek ji bi rêya keseke hov weke Erdogan pêk tê. PYD-YPG-YPJ bi hezaran şehîd dan. Ew çekên kîmyewî û qaşo di cîhanê de qedexe ne û Kurd pê şehîd ketin jî, ji xwe tevahî ya NATO′yê bûn.
Peter Widén di dawiya axaftina xwe de got: Azadi ji bo #Ocalan#. Erdogan terorîst e.
Di pey re li ser navê KNK Karwan Seîd û li ser navê Partiya Çep Daniyel Riyazat axaftin kirin. Karwan da zanin ku îro dewleta Tirk bi pêşengtiya keseke hov û dîktator weke Erdogan bûye polîsê çavdêriya li ser Kurdan. Li her derê hovîtî û dijminatiya xwe ya li hember Kurdan tîne ziman.
Daniyel Riyazat jî di axaftinên xwe de bal kişand ser bikaranîna çekên kîmyewî ya li ser gerîla û got: Çawa dibe dewletek hem peymana li dijî çekên qedexekirî îmze bike û hem jî li ber çavê cîhanê bi kar bîne. Dîsan îro Swêda dixwaze ji ber daxwazên dîktator û qeşmerekî weke Erdogan biryara guhertina hin qnûnên welatê xwe bide. Rastî jî ev tişteke pir şerm e. Pêwîst e ew siyaseta Swêd ji kiryarên dewleta Tirk re ya li ser Kurd û Kurdistanê re nebe palpişt û piştgir. Ji ber ku îro ji her demê zêdetir rastiya Kurdan li ber çavan e. We bi Erdogan re civîn kir û weke koleyan serê xwe tewand û li vir li hember Kurdan xwe weke qehreman nîşan didin. Lazim e ev siyaset nebe malê Swêd. Heger rast dibêjin û dibêjin em ji daxwazên dîktatorekî weke Erdogan re serî natewînin, bila daxwaza derxistina PKK ya ji lîsteya terorê bikin. Êdî lazim e Ewropa bi giştî ji siyaseta Erdogan a weke hov û dijminatiya berçav a li hember Kurdan re bê deng nemîne.
Çalakî bi diruşmên Azadî ji bo Ocalan, terorstî Erdogan, Bijî Şoreşa Rojava, Bijî berxwedana gerîla û Jin, jiyan, azadî bi dawî bû.[1]