لە ساڵی 1987 لە شاری شیروان لە دایکبووە و لە شاری قووچان دەستی بە خوێندن کردووە تا بڕوانامەی بەکالۆریۆسی لە تەکنۆلۆژیای زانیاری بەدەست بهێنێت، کاتێکیش دەستی داوەتە گۆرانی وتن، بە زیندووکردنەوەی موزیکی ڕەسەنی باکووری #خوراسان# دەستی پێکردووە، يەلدا کە لە تەمەنێکی بچووکدایە و بە گەنجترین ژەنیارەکانی ئامێری دووتار دادەنرێت و چەندین جار لە پێشبڕکێیە جۆراوجۆرەکاندا پلەی یەکەمی بەدەستهێناوە لەوانە لە فیستیڤاڵی خوراسان و لە هەمان کاتدا گۆرانیبێژیشە، لە ساڵی 2008دا يەلدا بەشداری لە فیلمێکی دۆکیومێنتاریدا کرد بەناوی (تەرەقە) کە لە دەرهێنانی محەمەد حەسەنە و 6 خەڵاتی ناوخۆیی و نێودەوڵەتی بەدەستهێناوە لەوانە خەڵاتی (فەیروز) و (سینەمای حەقیقەت)، بەڵام تا ئێستا نەیتوانیوە ڕەزامەندی وەربگرێت بۆ بڵاوکردنەوەی یەکەم ئەلبوومی گۆرانی خۆی.

ناونیشانی بابەت:یەڵدا عەباسی کۆنسێرتێکی موزیک و گۆرانی لە میونشن ساز کرد
#یەڵدا عەباسی#، کچە هونەرمەندی ڕۆژهەڵاتی #کوردستان#، بە ساز و دەنگە چیاییەکەی لە ماوەی ساڵێکدا چەندین ئاهەنگ و کۆنسێرتی هونەری لەگەڵ تیپێکی پڕۆفیشناڵ لە ژەنیارە ناسراوەکانی ئەڵمانیا ساز کردووە و لە بەردەوامی چالاکییە هونەرییەکانیشدا لە شاری میونشن بە ئامادەبوونی ژمارەیەکی بەرچاو لە ڕەوەندی کوردی کۆنسێرتێکی موزیک و گۆرانی ساز کرد.
لە کۆنسێترتەکەیدا چەپکێک لە بەرهەمە فۆلکۆرییەکانی چڕی و پاشان دوو بەرهەمی نوێی گۆرانی وەک سوپڕایزێک پێشکەشی هەوادارانی کرد.
یەڵدا عەباسی لە لێدوانێکی بۆ کوردستان24دا وتی: ئامانجی من لە سازدانی ئەو زنجیرە کۆنسێرتانە نیشاندانی توانا و بەهرەکانی ژنانی کوردە لە هەندەران و دووپاتکردنەوەی ئەو گەنجینە دەوڵەمەندەی کولتور و موزیکی کوردییە، کە ئێستا زۆربەی نەتەوەکان لە هەوڵدان بۆ کەڵک وەرگرتن لەو فەرهەنگ و کولتورە جوانەی ئێمە و چەندین جاریش هونەری ئێمە وەرگیراوە و بووە بە هەوێنی بەرهەمە بیانییەکان، لەم کۆنسێرتەشدا هەوڵمدا بەشێک لەم گۆرانیە فۆلکۆرییانە بڵێمەوە، کە تا بە ئەمڕۆش دەگات لە دڵی خەڵکی چوارپارچەی کوردستان و هەندەراندا هێشتا زیندوون، بەڵام پێویستیان بە داڕشتنەوە میلۆدییەکی نوێیە و دەکرێت بە ستایلی خۆم گۆڕانکارییان لێبکەم. [1]