هەموان ئەزانن من بەر بەرچاوی ڕاگەیاندن و بۆ ڕای گشتی، لە کۆنفرانسێکی ڕۆژنامەوانیدا چەند مانگ پێش ئێستا، باسی ئەوەم کرد کە شاسوار عەبدولواحید خیانەتی لە خۆبەخشانی نەوەی نوێ کردوە و بە پێچەوانەی بەڵێنەکان، نەوەی نوێی کردوە بە کۆمپانیای بنەماڵە و کردویەتی بە قوربانی سەفەقات و عەقدی بازرگانی. لە خیانەتەکانی شاسوارەوە لە بەڵێنەکان تا ئێستا، من هەمیشە وەک قاچاخچیەکی ساختەچی سەیری شاسوارم کردوە، بەڵام بۆ خاتری پاراستنی یەکڕیزی ئۆپۆزیسیۆن لە پەرلەمانی کوردستان لەگەڵ هاوڕێکانم لە فراکسیۆنی نەوەی نوێ مامەوە.
دوای هاتنە پێشەوەی پرۆژە یاسای چاکسازی، ئێمە بە هاوکاری چەند پەرلەمانتارێکی دڵسۆز زۆر کارمانکرد کە ئەو کۆمپانیا چاوچنۆکانەی کە شاسوار یەکێکە لەوان، پێکەوە هەزار ملیۆن دۆلاری حکومەتیان لایە و حکومەتیش چاوپۆشییان لێئەکا و لێیان وەرناگرێتەوە، ناچار بکرێن ئەو پارەیە بگێڕنەوە بۆ حکومەت و حکومەتیش بیدات بە کەمئەندامان و کەسوکاری شەهیدان و موچە کەمەکان بەرز بکاتەوە، بۆیە شاسوار کە 52 ملیۆن دۆلاری حکومەتی لایە و بە سەفەقات و ڕێکەوتنی نهێنی و پشت پەردە نەیداوەتەوە حکومەت، شێت و هاربوە.
من وەک پەرلەمانتارێک کە سوێندم خواردوە بەرژەوەندی خەڵک بکەمە سەروی بەرژەوەندی حیزبەوە، کاتێک بینیم شاسوار خەریکە مامەڵە بە فراکسیۆنەکەمانەوە ئەکات و خەریکە لە پشتەوەی ئێمە ڕێکەوتنی نهێنی بکات و شکۆ و بڕیاری ئێمە بگۆڕێتەوە بۆ خاتری دەستبەسەراگرتنی 52 ملیۆن دۆلارەکە، ئیتر بڕیاری کۆتاییم دا و بە فەرمی نامەی وازهێنانم لە فراکسیۆنی نەوەی نوێ تەسلیمی سەرۆکایەتی پەرلەمان کرد. بۆیە من خۆم وازم لە فراکسیۆنی شاسواری قاچاخچی هێناوە نەک بە پێچەوانەوە.
جارێکیتر هەموان دڵنیا دەکەمەوە، من پابەندی بەڵێنەکانی خۆمم لە ڕوبەڕوبونەوەی گەندەڵی و ستەمی دەسەڵات لە کوردستان.
#شادی نەوزاد#
#16-01-2020#

- بەڵێ #هەولێر# سەقامگیرە، ڕاستتر بڵێین نزیکترە لە شامی شەریف و هیچ کێشەیەکی نییە، لە هەولێر کەس لەسەر فول لایتێک ناکوژرێت، هیچ کەس لە هەولێر نەچووەتە زیندان لەبەر ئەوەی کۆمێنتێکی نووسیوە و بەدڵی برادەرێک نەبووە، لە هەولێر مافەکانی مرۆڤ ئەوەندە پارێزراون کە گەنجەکانی کۆچ ناکەن بەس لەبەر ئەوەی بتوانن بڵێن ئەژین، بەڵێ هەولێر ئەوەندە سەقامگیرە دوو زۆن و سێ زۆن نییە لەناو مەڵبەندی پارێزگایەکدا لە یەکیاندا هەست بکەی لە ساڵی 1950یت و ئەویتریان 2022.
- خاتونی ئازیز هەولێری خۆشەویست ئەوەندە سەقامگیرە کوڕان لەگەڵ دۆلاراوا شەقامەکانیان ڕێک وەک یەکە، هیچ کەس لە هەولێر لەمسەری گەڕەکەکەی بۆ ئەوسەری گەڕەکەکەی بە دیوار هەڵنەچنیوە و پاسەوانی دانەناوە بۆ ماڵی وەزیرێک کە ئێستا ئەبێت دەست لە کار بکێشێتەوە چونکە پۆستێکی تریان داوەتێ لە حزبەکەی.
- ئەروەڵا هەولێر ئەوەندە سەقامگیرە هیچ کەس ناتوانێت هێز بۆ سەر ماڵی جێگری ئەو سەرۆک حکومەتەی ئەمڕۆ بینیت ببات و ئیجرائاتیشی لەگەڵ نەکرێت، بەڵێ هەولێر هەر زۆر سەقامگیرە لە ناو چاکسازییەکەیدا مەوادی هۆشبەرت دەست ناکەوێت بە هەرزانتر لە نرخی دەرەوەی چاکسازی و کام جۆریشت بوێت، شەقام و ڕێگا و بانەکانیشی زۆر تایبەتن و هیچ پارچە زەوی سەدان دۆنمی سەر ئەو شەقامانە نەدراوە بە هیچ بزنسمانێکی نزیک کوڕی فڵان و فیسار تا بییانکات بە یەکەی نیشتەجێبوونی خەیاڵی و بە نرخی خەیاڵی بییانفرۆشێتەوە، ئەوەشم بیر نەچێ لە هەولێری سەقامگیردا هیچ شوشتنەوەیەکی پارەش ڕوونادات. [1]

=KTML_Bold=شادی نەوزاد، پەڕڵەمانتاری پەڕڵەمانی کوردستان دەڵێت: وا بڕوات دوو ساڵی تر دەلاکخانە لە هەولێر دەبێتە قەسابخانە.=KTML_End=

ئەو پەڕڵەمانتارە پێی وایە، چاوەڕ‌وانکراوە لەژێر دەسەڵاتی کابینەیەکی حکومی کە بەشی زۆری دەسەڵاتدارە باڵاکانی لە دەزگایەکی ئەمنییەوە هاتبن، ئەو شێوازە بەربەرییە مامەڵەکردنە لە سایەیاندا پەرە بستێنێت.
ئاخر تەنیا یەک کەس و دەزگایەکی ئەمنی چۆن دەتوانێت خۆی مەدەنی بێت و مەدەنییەتیش لەناو هاونیشتمانیانی بچەسپێنێت؟ بۆیە دەبێت ئەم هاوکێشە لاسەنگەی دەسەڵات چی زووە هاوسەنگ بکرێتەوە و مەدەنییەت بکرێتە بنەمای حکومڕ‌انیی ڕیشەیی، #شادی نەوزاد# وا دەڵێت. [1]

لە گەڕەکی سەرکارێز لە شاری #سلێمانی# لە 01-03-1989 دایک بووە
لە 2014 بەشی پەروەردە و دەروونناسی زانکۆی #دهۆک#ی تەواوکردووە، زمانەکانی عەرەبی و ئینگلیزی بە باشی دەزانێت.
لە مناڵپارێز کار دەکات لەگەڵ مناڵانی تووشبوو بە شێرپەنجە
لە ساڵی 2012 یەکەم کۆڕی شیعری لەگەڵ ڕاهۆز کامەران بووە کە کۆڕێکی سەربەخۆ بووە بۆ شعر، دووەم کۆڕلە یەکیەتی نوسەرانی #هەولێر# لەگەڵ هێمن بەرزنجی و ژاوێن شاڵی
سێیەم کۆڕی لەیەکیەتی نوسەرانی سلێمانی لەگەڵ شانیا ئەو بە شعرەکانی و ئەمیش چیرۆکەکانی.

هێرشەکان بۆ سەر سەنتەری جێندەری زانکۆی ئەمریکی پلانی بۆ داڕێژراوە
ئەگەر بە وردی دیقەت بدەینە ئەو هێرشانەی دەکرێتە سەر چالاکوانانی کۆمەڵگەی مەدەنی بە تایبەت ئەوانەی کار لەسەر کەیسەکانی ژنان و یەکسانی جێندەری دەکەن بۆمان دەردەکەوێت کە هێرشەکان بۆ ئەو خاڵانە دەچنەوە کە کەسایەتی کەسەکان بگرنەوە نەک جەوهەری کارەکە و پرسیاری جددی لەسەر بابەتی کارکردن، یاخود تۆمەتبارکردن بەو سیفاتانەی کە کۆمەڵگە بە گشتی ڕەتی دەکاتەوە.
بەشێکی زۆری ئەو هێرشانە یەک بە دوایەکن و بەرنامە بۆ داڕێژراون تا هیچ کات نەتوانین لە کۆمەڵگایەکدا کار بکەین لەوپەڕی ڕاستەوە تا ئەوپەڕی چەپ شوێنێکی ئارامی تێدابێت بۆ ئەنجامدانی چالاکی و بەردەوامی کارەکانمان، ئەم پلان و هێرشە یەک بە دوایەکانە دەست بۆ هەموو دامەزراوەکان دەبەن و هیچی لێ بەدەر نەبووە.
ئەم هێرشانەی کرانە سەر سەنتەری جێندەری زانکۆی ئەمریکی و بەتایبەت چۆمان هەردی بەشێکن لە هەمان پلان، دەیانەوێ پێمان بڵێن یان بێدەنگ دەبن و لە کۆمەڵگا گەڕێن بەدڵی خۆمان بەرەو تاریکی و هەڵدێری ببەین و نەهێڵین بەشی زۆری مافە سەرەتاییەکان بۆ هەموان بێت وەک یەک، یان ئاوها ناهێڵین کەسی لێ بەدەر بێت و هێرش بۆ هەمووتان لە هەموو شوێن هەیە.
بۆیە دەبێت کارکردن بۆ کەیسەکانی ژنان و یەکسانی جێندەری بە یەک بازنەی لێک نەپچڕاو پێکەوە بێت، سەرەڕای جیاوازی بیر و بۆچونەکانمان و تێبینی و ڕەخنەکانمان لەسەر یەک کە هەمانە. [1]
#شادی نەوزاد#

مەڵێن کێ بەرپرسە لەو کارە، کام لایەن و کام شوێن، هەموومان بەرپرسیارین، یەک بە یەکمان بەرپرسیارین لەوەی شوێنێک هەبێت کچەکانمانی تێدا پارێزراو نەبن.
تەنیا کوڕەکانتان پەروەردە بکەن لەوەی ژنان ڕەگەزێکی دیکە نین و جیاواز نین لەتۆی نێرینە، کوڕەکانتان پەروەردە بکەن کە ڕێزی ئەوی تر بگرن بێ بیرکردنەوە لەوەی ژنن یان پیاو، گەورەن یان بچوک. [1]
#شادی نەوزاد#

(لەم جوڵانەوەیەدا مرۆڤی بەرژەوەندخواز و خۆپەرست جێگای نابێتەوە)
وەک هەموو لایەک دەزانن جوڵانەوەی #نەوەی نوێ# پێش هەڵبژاردنەکان و لەسەروەختی بانگەشەی هەڵبژاردندا بەردەوام باسی لە نەمانی موچەی خانەنشینیی پلە بالاکان دەکرد.
هەروەها پەرلەمانتارانی نەوەی نوێ بەڵێننامەیان واژۆ کردووە بە هیچ شێوەیەک موچەی خانەنشینیی وەرنەگرن. جگە لەوانەش، هەمو کاندیدانی جوڵانەوەکە جی سوێندیان خواردووە هیچ جۆرە موچەیەکی خانەنشینیی وەرنەگرن.
بەڵام سەرباری ئەوانە پەرلەمانتارێک کە بە دەنگی جوڵانەوەکە و سەرۆکی جوڵانەوەکە بووە بە پەرلەمانتار و تەنها 500 (پێنجسەد) دەنگی هێنابوو، ئەمرۆ پێچەوانەی سیاسەت و ستراتیژی جوڵانەوەکە خیانەتی لە خودا و لە سوێندەکەی و لە دەنگدەران و هاوڵاتییانکرد، پەرلەمانتار (#شادی نەوزاد#) دەنگیدا بە خانەنشینیی پەرلەمانتاران و پلە باڵاکان.
بۆیە لەپێناو هێشتنەوەی ئەخلاقی سیاسیی و ڕێزگرتن لە هاوڵاتییان و دەنگدەرانمان، ئەنجومەنی سیاسیی جوڵانەوەکە بڕیاریدا بە دەرکردنی پەرلەمانتار (شادی نەوزاد) لە فراکسیۆنی نەوەی نوێ، چونکە ئەم جوڵانەوەیە جێگای مرۆڤی لەو شێوەیەی تیدا نابێتەوە و ئامانجی جوڵانەوەکەمان خزمەتی هاوڵاتییان و ڕاستگۆیی و هێشتنەوەی بنەمای ئەخلاقییە، نەک خزمەتکردنی گیرفانی خۆمان و بەرژەوەندیی شەخسیی.
هەروەها پێویستە هەموومان بزانین مرۆڤی مەرد و بەڕەوشت لەم ساتانەدا تاقیدەکرێنەوە، لە کاتیکدا بەرژەوەندیی و پارە و پۆست دەخرێتە بەردەستیان، ئەوسا دەردەکەون ئاخۆ خەڵکانی خاوەن مەبدەئن یاخود بەرژەوەندخواز و خۆویست.
ئەنجوومەنی سیاسیی نەوەی نوێ
16-01-2020