Hêzên Ewlekariya Hundirîn-Jin bi dirûşma “Bi hêza Hêzên Ewlekariya Hundirîn a Jin em ê xeta xiyanetê têk bibin û ala azadiyê bilind rakin”, kongreya xwe ya sêyemîn li #Hesekê# li dar xist.
Hêzên Ewlekariya Hundirîn a Bakur û Rojhilatê Sûriyê bi tevlêbûna 600 delegeyan û endamên xwe kongreya xwe ya 3`yemîn li hola Serdem a kantona Hesekê li dar xist.
Di kongeryê de hevseroka Desteya Hundirîn a Bakur û Rojhilatê Sûriyê Firyal Hesen axivî û lidarxistina kongreyê li hemû endaman û rêber Abdullah Ocalan û dayîkên aştiyê pîroz kir û got: “Em bi rihê berxwedana şehîd Bêrîtan, Selwa, Jiyan, Zeyneb û hemû jinên têkoşer vê kongreyê li hemû gelan pîroz dikin. Ev kongre dê bibe peyameke diyar ji bo hemû xayînan ku hewl didin projeya neteweya demokratîk têk bibin.”
Firyal Hesen destnîşan kir ku hêzên dijberî projeya neteweya demokratîk hewl didin jinan bikin hedef ku şoreşê bi rêve dibin. Ji ber wê Firyal bang li hemû jinan kir ku têkoşîna xwe di hemû qadan de bi rêya parastina rewa mezin bikin.
YJA-STAR RASTI U CEWHERA JINAN DERXIST PES
Piştre endama Desteya Serokatiya Partiya Yekitiya Demokratîk (PYD) Foza Yunsif axivî û got: “Hêzên desthilatdar jinên pêşeng dikin hedef ku ji bo jin bigihêjin azadiya xwe tê dikoşin. Ev hêz naxwaz jin jiyaneke aram bijî. Ji ber wê ne tenê li Bakur û Rojhilatê Sûriyê lê belê li çiyayên Kurdistanê bi awayekî hovane wan dike hedef.”
Foza Yusif îşart pê kir ku hêzên desthilatdar jinên pêşeng li ser xwe xetere dibînin û wiha domand: “Jinan rastî û cewhera jinan derxist pêş ku YJA-Star nûnertiya wê dike. Dewleta Tirk jî bi çekên kîmyawî li Herêmên Parastinê yên Medyayê wan dike hedef.”
Her wiha di kongreyê de endama rêveberiya Meclisa Malbatên Şehîdan a Herêma Cizîrê Cewahêr Osman axivî û got: “Tevî hemû astengiyan û zehmetiyan û li gel pêvajoya ku em tê re derbas dibin, lê jinan di şoreşa Rojava de ji bo hemû jinan li seranserî cîhanê bûn mînak. Li gorî rêgezên rêber Abdullah Ocalan û fikrê azadiya jinan li hember zihniyeta baviksalarî xwe birêxistin kirin.”
MÎRASA ŞEHÎD BÊRÎTAN FIREHTIR DIBE
Endama Fedrasyona Gaziyan a Bakur û Rojhilatê Sûriyê Delîla Kobanê lidarxistina kongreyê bi salvegera 30 a şehadeta şehîd Bêrîtan (Gulnaz Karataş) ve girê da û got: “Şehîd Bêrîtan roleke pêşeng di avakirina artêşa jinan de lîst. Diyarkirina vê rojê ji bo lidarxistina kongreyê, xwedî peyameke girîng e ku mîrasa şehîd Bêrîtan firehtir dibe. Di kesayeta şehîd Bêrîtan de, kevirê bingehîn ê artêşa jinan hat danîn ku îro bi hezaran ciwan li ser şopa wê tê dikoşin.”
Delîla Kobanê wiha domand: “Divê em li hember planên qirkirinê yên li dijî vîna gelên herêmê û jinan bêdeng nemînin.”
Endama Koordînasyona Kongra Star Rîhan Loqo jî axivî û got: “Em vê rojê li Hêzên Ewlekariya Hundirîn-Jin pîroz dikin ku bi şev û roj ji bo pêkanîna ewlehiyê li herêmê tê dikoşin.”
`RÊXISTIBÛYÎNA JINAN CIVAKA ME JI YÊN DIN CUDATIR DIKE`
Cîgirê hevserokatiya Meclisa Rêveber a Rêveberiya Xweser a Bakur û Rojhilatê Sûriyê Emîne Osê axivî û lidarxistina kongreyê li gelên herêmê û malbatên şehîdan pîroz kir û got lidarxistina kongreyê di vê pêvajoyê de serkeftin e.
Emîne Osê teqezî bi girîngiya parastina ewlehiya herêmê li gel êrişên derve û hundir ên li dijî herêmê kir û got: “Êriş li dijî vîna jinan e ku vîna civakê temsîl dike. Ew dixwazin rê li pêşiya têkoşîna jinên azad û têkoşer bigirin. Lê em ê têkoşîna xwe û birêxistinkirina jinan di civakê de berdewam bikin.”
Emîne Osê wiha pê de çû: “Rêxistinbûyîna jinan, parastin û misogerkirina mafên xwe civaka me ji civakên din cudatir dike.”
Emîne Osê diyar kir ku parastina jinan û civakê ji êrişên derve û hundir, erka Hêzên Ewlekariya Hundirîn-Jin e.
Piştre sînevizyonek têkildarî damezirandina Hêzên Ewlekariya Hundirîn-Jin û karên wê yên du salan hate pêşandan.
Piştre kongre li pêşiya dezgehên çapemeniyê girtî berdewam kir. Li gorî komîteya amadekar, rewşa rêxistinî û rêziknameya hêzê hatin nîqaşkirin.
Endama rêveberiya Hêzên Ewlekariya Hundirîn-Jin a herêma Cizîrê Hilat Mihemed behsa biryarên di kongreyê de hatine girtin kir û got: “Yek ji biryarên herî girîng, mezinkirina têkoşînê û birêxistinbûyîna xwe ji bo rizgarkirina hemû jinan ji çewisandinê.”
Hilat Mihemed eşkere kir ku hinek guhertin di logoya Hêzên Ewlekariya Hundirîn-Jin de çêbû û guliya genimê û şiqinê zeytûnê û 7 stêrk lê zêde bûn ku her stêrkek a herêmeke Bakur û Rojhilatê Sûriyê ye.[1]
ANHA